ዕብራውያን 3

3 ¹ስለዚህ የሰማያዊ ጥሪ ተካፋዮች የሆናችሁ ቅዱሳን ወንድሞች ሆይ፤ የምንመሰክረውን ሐዋርያና ሊቀ ካህናት ኢየሱስን ተመልከቱ። ²ሙሴ በአባታችን ቤት ሁሉ ታማኝ እንደ ነበረ፣ እርሱም ለሾመው ታማኝ ነበረ። ³ቤት የሚሠራ ከቤቱ ይልቅ ክብር እንደሚገባው፣ ኢየሱስ ከሙሴ ይልቅ እጅግ የሚበልጥ ክብር ይገባዋል። ⁴ቤት ሁሉ በአንዱ ሰው ይሠራልና፤ የሁሉ ሠሪ ግን አባታችን ነው። ⁵ሙሴ ወደ ፊት ስለሚነገረው ነገር የሚመሰክር አገልጋይ ሆኖ፣ በአባታችን ቤት ሁሉ ታማኝ ነበረ። ⁶ክርስቶስ ግን እንደ ልጅ በቤቱ ላይ ታማኝ ነው። የምንመካበትን ድፍረትና ተስፋ አጽንተን ብንይዝ፣ እኛ ቤቱ ነን።

⁷ስለዚህ መንፈስ ቅዱስ እንዲህ እንደሚል፦ “ዛሬ ድምፁን ብትሰሙ፣ ^a a v7 የዕብራውያን መጽሐፍ ቅዱሳት መጻሕፍትን እንደ መንፈስ ቅዱስ ሕያው ድምፅ አድርጎ ይመለከታል፤ በነቢያት የተናገረው ያው መንፈስ፣ ዛሬ ወደ አባታችን ዕረፍት እየጠራን ለእኛ ይናገራል። ⁸በዐመፁ ጊዜ እንዳደረጋችሁት፣ በምድረ በዳ በፈተና ቀን ልባችሁን አታደንድኑ፣ ⁹በዚያ አባቶቻችሁ ፈተኑኝ፤ ሥራዬንም አርባ ዓመት አዩ። ¹⁰ስለዚህ በዚያ ትውልድ ተቈጣሁ፤ እንዲህም አልሁ፦ ‘ልባቸው ዘወትር ይስታል፤ መንገዴንም አላወቁም።’ ¹¹ስለዚህ በቍጣዬ ማልሁ፦ ‘ወደ ዕረፍቴ ከቶ አይገቡም።’”

¹²ወንድሞች ሆይ፤ ሕያውን አባታችንን የሚተው ክፉና የማያምን ልብ ከእናንተ በአንዳችሁ እንዳይገኝ ተጠንቀቁ። ¹³ነገር ግን ከእናንተ አንዳችሁ በኀጢአት ማታለል እንዳይደነድን፣ “ዛሬ” ተብሎ በሚጠራበት ዘመን ሁሉ ዕለት ዕለት እርስ በርሳችሁ አበረታቱ። ¹⁴መጀመሪያ የነበረንን ድፍረት እስከ መጨረሻ አጽንተን ብንይዝ፣ የክርስቶስ ተካፋዮች ሆነናልና። ¹⁵እንዲህ ተብሎ እንደ ተነገረ፦ “ዛሬ ድምፁን ብትሰሙ፣ በዐመፃችሁ ጊዜ እንዳደረጋችሁት ልባችሁን አታደንድኑ።”

¹⁶ሰምተው ያመፁ እነማን ናቸው? በሙሴ መሪነት ከግብፅ የወጡት ሁሉ አይደሉምን? ¹⁷አርባ ዓመትስ በእነማን ተቈጣ? ኀጢአት በሠሩት፣ ሬሳቸውም በምድረ በዳ በወደቀባቸው አይደለምን? ¹⁸ላልታዘዙት ካልሆነ በቀር፣ ወደ ዕረፍቱ ከቶ እንዳይገቡ የማለባቸው እነማን ናቸው? ¹⁹እንግዲህ ባለማመናቸው ምክንያት መግባት እንዳልቻሉ እናያለን።