Oteche Koonyeguk eng' Jeso
Ki po iman Musa eng' kootap Kwandanyo; Jeso ne yaindennyi. Kong'etee olooto kochoor sirindet ng'aleegap ibinooto ne po surkwen che ki kas kaalyeet ak kongelelji mugulelwek, ak koyai kobee komyee: ogimit okeei eng' peet age tugul, ye tai kiguure rani, si ma ngelelji chii age tugul eng' lembetap tengekto.
Ng'alaali Kwandanyo eng' mustarisyek 7–11
3 1Nooto anyun, tupchosyek che tiliileen, che kiguure eng' kipsengwet, obwaati Jeso, kayooktoindet ak tisiindet ne oo ne ng'aanyei acheek. 2Ki po iman ineendet eng' ne ki kinde ineendet, ko uu ye ki po iman agine Musa eng' kootap Kwandanyo komugul. 3Nyoljin Jeso toroornatet ne oo miising' kosiir Musa, ko uu ye nyoljin yaindetap koot teegisto ne oo kosiir koot ineegei. 4Amu kiyai koot age tugul eng' chii age, ago yaindetap tuguuk tugul ko Kwandanyo. 5Ki po iman Musa eng' kootap Kwandanyo komugul, kiboityot ne paoryanji tuguuk che ki kemwa let. 6Ago Kristo, ko uu weeriit, ko po iman eng' koonnyi. Ak acheek ko koonnyi—ngot kinam kogimit kayaneet ak kamang'unet che iloskeech.
7Nooto anyun, ko uu ye le Kabuuset ne Tiliil: “Rani, ngot ogas kutinnyi, a a v7 Ibwaatei Bukuitap Ziburaniik Ng'olyootap Kamuktaindet ko uu kootitap Kabuuset ne Tiliil ne sabei — Kabuusenooto age ne ki ng'alaal eng' maotik ko ng'alaalech rani, koguurech kechut ineng'eetap Kwandanyo. 8amouuiit mugulelwekwok ko uu ye ki ongelelji, eng' peetuutap tyemset eng' surkwen, 9ole ki kotyeme kwanisyekwok ak kogeer poisyonikyuk kenyiisyek artam. 10Eng' nooto anyun ki anereech ibinooto, ak ale, ‘Betotei mugulelwekwak kotugul, ak ma kagonai ortinwekyuk.’ 11Ki ayasyo anyun eng' angeennyu, ‘Ma kochut ole atebee koigeny.’”
12Tupchosyek, oriipkei si matinye age tugul eng' okweek muguleldo ne ya, ne ma po kayaneet, ne istoegei Kwanda ne sabei. 13Ago ogimitosye peetuut age tugul, agoi ye kuurei “rani,” si ma uuiitu age tugul eng' okweek eng' lembeitap tengekto. 14Amu kageek acheek che yamegei ak Kristo, ngot kinam kogimit eng' iman kayaneennyo ne tai agoi let. 15Ko uu ye kemwaei: “Rani, ngot ogas kutinnyi, amouuiit mugulelwekwok ko uu ye ki ongelelji.”
16Ng'oo che ki kogas ak kongelelso? Tos ma icheek tugul che ki kobunu Misiri eng' Musa? 17Ng'oo che ki konereechi kenyiisyek artam? Tos ma icheek che ki koyai tengekto, che ki kobek muuswekwak eng' surkwen? 18Ng'oo che ki koyasyo kole ma kochut ole tebee, kobatee icheek che ki kongelelji? 19Nooto anyun kegeer kele ma kimuuchi kochut amu ma ki kotinyei kayaneet.