Mukunga wa Pha
Mukunga.
Mukunga wa kinunga kya diambu dyamanisa kala — luhulusu luna Tata wetu kánungila ni koku dyandi dya kitata amana wásongila ku mesu ma makanda mana masi tala, wisi lunda kwikama kwena Kiseledi. Buna nsambi yi phungi bisi yandika kusika, amana banzadi babula moku yi mina mya khunda myayimbila, mukuma yandi wisi kwisa fundisa tsi mu masonga.
98 1Yimbilenu Tata wetu mukunga wa pha, mukuma yandi wásala mambu ma kuyituka; koku dyandi dya kitata yi koku dyandi dyatoma byámunungila luhulusu. 2Tata wetu wázayikisa luhulusu lwandi; wásongila masonga mandi ku mesu ma makanda. 3Yandi wáyubuka lungongu lwandi lwa bulunda yi kwikama dyandi kwena kanda dya Kiseledi; tsuka zoosu za tsi zámona luhulusu lwa Tata wetu.
4Thutenu ndinga ya kyesi kwena Tata wetu, benu tsi yosu; bulenu mu mukunga wa kyesi amana yimbilenu mikunga mya lukumu. 5Yimbilenu mikunga mya lukumu kwena Tata wetu mu nsambi, mu nsambi yi ndinga ya mina. 6Mu tuphita yi ndinga ya phungi, thutenu ndinga ya kyesi ku thwala ya Kyamvu, Tata wetu.
7Yanga dya mbuta dyabula malokosi, yi bima byosu bina byenina mukati dyandi; tsi yi batu boosu bana bisi zingila mwamuna. 8Banzadi babula moku; mina mya khunda myayimbila yi kyesi hakimosi, 9ku thwala ya Tata wetu, mukuma yandi wisi kwisa fundisa tsi. Kafúndisa tsi mu masonga, amana batu mu busongama.
