Tsale Kesa
Chele.
Ne ketozo kelakeyi la tsale kesa—ha Poe Pü be mu Pü kemesa bo-e ngoyipü kelakeyi, mu ngo keba shuye metü mhüjülü mesemengo süta, Israel ce Pü kemelü rekrata. Süsa füse metü tsale thi, mu Rive-e u be khusü mu cejütuko-e tsale thi tate, kekrelamori Pü cejüo kemezilü mejo thiyi vorite.
98 1Ha Po ce tsale kesa thiyite, kekrelamori Pue mha ungo kekro thisüte; Pü kematho be mu Pü kemesa bo-e kelakeyi ngoyita. 2Ha Poe Pü kelakeyi mese süte; Pue shuye metü mhüjülü Pü kemezi mesemengo süta. 3Pue Pü jükho kekhrü mu Pü kemelü Israel cekro ce rekrata; cejü vala metü-e ha Po kelakeyi ngo kevala.
4Cejü metü, ha Po ce nü de krasüte; kenü tsale thi de krasüte, mu tsale thiyite. 5Bina lü ha Po ce tsale thiyite, bina mu küle füse lü tsale thiyite. 6Thecü mu singa füse lü, Kedeo, ha Po mhüjülü nü de krasüte.
7Jükezho mu sülü ketako metü, cejü mu sülü keba thüma metü-e rü meho tate. 8Rive-e u be khusü; cejütuko-e lüpü nü de tsale thi tate, 9ha Po mhüjülü, kekrelamori Pü cejüo mejo kütola vorite. Pue cejüo kemezilü mejo thito, mu thümako pütüpüzholü mejo thito.
