ਜ਼ਬੂਰ 98

98 ¹ਸਾਡੇ ਪਿਤਾ ਲਈ ਇੱਕ ਨਵਾਂ ਗੀਤ ਗਾਓ, ਕਿਉਂ ਜੋ ਉਸ ਨੇ ਅਚਰਜ ਕੰਮ ਕੀਤੇ ਹਨ; ਉਸ ਦੇ ਸੱਜੇ ਹੱਥ ਅਤੇ ਉਸ ਦੀ ਪਵਿੱਤਰ ਭੁਜਾ ਨੇ ਉਸ ਲਈ ਮੁਕਤੀ ਪ੍ਰਾਪਤ ਕੀਤੀ ਹੈ। ²ਸਾਡੇ ਪਿਤਾ ਨੇ ਆਪਣੀ ਮੁਕਤੀ ਪਰਗਟ ਕੀਤੀ ਹੈ; ਉਸ ਨੇ ਕੌਮਾਂ ਦੀਆਂ ਅੱਖਾਂ ਸਾਹਮਣੇ ਆਪਣੀ ਧਾਰਮਿਕਤਾ ਪਰਗਟ ਕੀਤੀ ਹੈ। ³ਉਸ ਨੇ ਇਸਰਾਏਲ ਦੇ ਘਰਾਣੇ ਲਈ ਆਪਣੇ ਨੇਮ ਦੇ ਪ੍ਰੇਮ ਅਤੇ ਆਪਣੀ ਵਫ਼ਾਦਾਰੀ ਨੂੰ ਚੇਤੇ ਰੱਖਿਆ ਹੈ; ਧਰਤੀ ਦੇ ਸਾਰੇ ਕੰਢਿਆਂ ਨੇ ਸਾਡੇ ਪਿਤਾ ਦੀ ਮੁਕਤੀ ਵੇਖੀ ਹੈ।

⁴ਹੇ ਸਾਰੀ ਧਰਤੀ, ਸਾਡੇ ਪਿਤਾ ਲਈ ਖ਼ੁਸ਼ੀ ਨਾਲ ਜੈਕਾਰਾ ਗਜਾਓ; ਅਨੰਦ ਦੇ ਗੀਤ ਵਿੱਚ ਫੁੱਟ ਪਓ ਅਤੇ ਉਸਤਤ ਦੇ ਭਜਨ ਗਾਓ। ⁵ਬਰਬਤ ਨਾਲ ਸਾਡੇ ਪਿਤਾ ਦੀ ਉਸਤਤ ਦੇ ਭਜਨ ਗਾਓ, ਬਰਬਤ ਨਾਲ ਅਤੇ ਸੁਰੀਲੀ ਧੁਨ ਨਾਲ। ⁶ਤੁਰ੍ਹੀਆਂ ਅਤੇ ਨਰਸਿੰਗੇ ਦੀ ਅਵਾਜ਼ ਨਾਲ, ਰਾਜੇ, ਸਾਡੇ ਪਿਤਾ ਦੇ ਸਾਹਮਣੇ ਖ਼ੁਸ਼ੀ ਨਾਲ ਜੈਕਾਰਾ ਗਜਾਓ।

⁷ਸਮੁੰਦਰ ਅਤੇ ਉਸ ਦੇ ਵਿਚਲਾ ਸਭ ਕੁਝ ਗਰਜੇ; ਜਗਤ ਅਤੇ ਉਸ ਦੇ ਵਿੱਚ ਵੱਸਣ ਵਾਲੇ ਸਾਰੇ। ⁸ਦਰਿਆ ਤਾੜੀਆਂ ਵਜਾਉਣ; ਪਹਾੜੀਆਂ ਰਲ ਕੇ ਖ਼ੁਸ਼ੀ ਨਾਲ ਗਾਉਣ, ⁹ਸਾਡੇ ਪਿਤਾ ਦੇ ਸਾਹਮਣੇ, ਕਿਉਂ ਜੋ ਉਹ ਧਰਤੀ ਦਾ ਨਿਆਂ ਕਰਨ ਲਈ ਆ ਰਿਹਾ ਹੈ। ਉਹ ਜਗਤ ਦਾ ਨਿਆਂ ਧਾਰਮਿਕਤਾ ਨਾਲ ਕਰੇਗਾ, ਅਤੇ ਲੋਕਾਂ ਦਾ ਨਿਆਂ ਇਨਸਾਫ਼ ਨਾਲ।