Tata Wetu Wisi Yala
Mbawu, mutsyenzya yi mongu misi yunguka bisi munzayikisa, kaasi mupfundila wa kiti kyandi kya luyalu yenina masonga yi mukanu. Bana bisi sadila bifwanisu bakwátuka tsoni, Siyoni dyisi sangwala, amana dilongi dyenina dya ndinga yimosi: benu lweku bana bisi zola Tata wetu, mengenu mbi.
97 1Tata wetu wisi yala! Tsi yasangwala; binzunga byamingi bya yanga bisangwala.
2Matuti yi phipha ya lawu byamuzyeta; masonga yi mukanu benina mupfundila wa kiti kyandi kya luyalu. 3Mbawu yisi kwenda ku thwala yandi, amana yisi yoka bambeni bandi muma mwosu. 4Mutsyenzya wandi wisi yinika tsi; tsi yisi mona amana yisi tekita. 5Mongu myisi yunguka hanga mafuta ku thwala ya Tata wetu, ku thwala ya Pfumu wa tsi yosu. 6Mazilu masi samuna masonga mandi, amana bikanda byosu bisi mona khembu yandi.
7Boosu bana bisi sadila bifwanisu bakwátuka tsoni, bana bisi ditsikisila mu biteki bya khatu; mufukaminenu, benu boosu lweku banzambi! a a v7 Mukanda wa Baebeleyi 1:6 wubongidi mbila yayi — «Banzyo boosu ba Nzambi bamufukamina» — amana wusi tadisa yawu kwena Yesu, Mwana wuna Tata wetu kakotisa mu tsi.
8Siyoni dyisi yuka amana dyisi sangwala, amana bandumba ba Yuta basangwala kikuma kya mikanu myaku, A Tata wetu. b b v8 «Bandumba ba Yuta» yenina ndinga ya Kiebeleyi yisongila mbanza yi mala mana mazyeta Yuta. 9Mukuma ngeyi, A Tata, wenina Wa Zulu-Zulu, wuluti tsi yosu; ngeyi wena watombulwa, wuhitini banzambi boosu kwa thama.
10Benu lweku bana bisi zola Tata wetu, mengenu mbi! Yandi wisi lunda moya ma batu bandi bana basila mbundu; yandi wisi bahulula mu koku dya batu ba mbi. 11Mwini wisi kunina kwena batu ba masonga, amana kyesi kwena bana basungama mu mbundu. 12Sangwalenu mu Tata wetu, benu batu ba masonga, amana vutulenu matondu kwena khumbu yandi yatoma.
