ዘሌዋውያን 16 FHB Father's Heart Bible™

16 ¹ኣቦና ድማ ድሕሪ ሞት እቶም ናብ ኣቦና ቀሪቦም ዝሞቱ ክልተ ደቂ ኣሮን፥ ንሙሴ ተዛረቦ።

²ኣቦና ድማ ንሙሴ ከምዙይ በሎ፦ “ንሓውካ ኣሮን ንገሮ፤ ኣነ ኣብ ልዕሊ እቲ መኽደን ስርየት ብደበና እግለፅ እየ እሞ፥ ኣብ ዝደለዮ ጊዜ ኵሉ፥ ናብ ውሽጢ እቲ መጋረጃ ናብ ዘላ ቅድስቲ ቦታ፥ ናብ ቅድሚ እቲ ኣብ ልዕሊ ታቦት ዘሎ መኽደን ስርየት ኣይእቶ፤ እንተ ዘይኮነ ኺመውት እዩ።”

³“ኣሮን ናብ ቅድስቲ ቦታ ብኸምዙይ ይእቶ፦ ክንዲ ሓጢኣት ዝቐርብ መስዋእቲ ዝራብዕን ክንዲ ዝቃፀል መስዋእቲ ድማ ድቤላን። ⁴ብሃሪ ዝተሰርሐ ቕዱስ ቀሚሽ ይልበስ፤ ብሃሪ ዝተኣልመ ስረ ኣብ ልዕሊ ስጋኡ ይከደን፤ ብሃሪ ዝተሰርሐ ቕናት ድማ ይቕነት፤ ብሃሪ ዝተሰርሐ መጠምጠምያውን ይጠምጥም። እዚኣቶም ቅዱሳት ኣልባሳት እዮም፤ ቅድሚ ምልባሶም ከዓ ሰብነቱ ብማይ ይተሓፀብ። ⁵ካብ ማሕበር እስራኤል ድማ ክንዲ ሓጢኣት ዝቐርብ መስዋእቲ ኽልተ ተባዕትዮ ኣጣልን ክንዲ ዝቃፀል መስዋእቲ ሓደ ድቤላን ይውሰድ።

⁶ኣሮን ድማ ነቲ ምእንቲ ሓጢኣቱ ዝቐርብ ዝራብዑ የቕርብ፤ ንርእሱን ንስድራ ቤቱን ድማ ስርየት ይገብረሎም። ⁷ነተን ክልተ ኣጣል ድማ ወሲዱ፥ ኣብ ኣፍ ደገ መራኸቢ ድንኳን ኣብ ቅድመይ የቕውመን። ⁸ኣሮን ድማ ኣብ ልዕሊ እተን ክልተ ኣጣል ዕፃ የውድቕ፤ ሓደ ንኣይ፥ ሓደ ድማ ንኣዛዝኤል። ^a a v8 ኣዛዝኤል ማለት፥ ስም እታ “ዝተሰደደት” ጤል እዩ፤ እታ ንሓጢኣት እቶም ህዝቢ ካብቲ ሰፈር ኣርሒቓ ናብ ምድረ በዳ ዝፆረት ጤል ማለት እዩ። ⁹ኣሮን ድማ ነታ ብዕፃ ንኣይ ዝወፀት ጤል ኣምፂኡ፥ ክንዲ ሓጢኣት ዝቐርብ መስዋእቲ ገይሩ የቕርባ። ¹⁰እታ ዕፃ ንኣዛዝኤል ዝወፈያ ጤል ግና፥ ኣብ ልዕሊኣ ስርየት ምእንቲ ኽግበር፥ ናብ ምድረ በዳ ናብ ኣዛዝኤል ክትልኣኽ፥ ብህይወታ ኣብ ቅድመይ ትቐርብ።

¹¹ኣሮን ድማ ነቲ ምእንቲ ሓጢኣቱ ዝቐርብ ዝራብዑ የቕርብ፤ ንርእሱን ንስድራ ቤቱን ስርየት ይገብረሎም፤ ደሓር ከዓ ነቲ ምእንቲ ሓጢኣቱ ዝቐርብ ዝራብዑ ይሓርዶ። ¹²ካብ መሰውኢ ኣብ ቅድመይ ዘሎ ፍሕሚ ሓዊ ዝመልአ ፅንሃህ ይውሰድ፤ ክልተ ዕፍኞ ለጥ ኢሉ ዝተፈጨ ምዑዝ ዕጣንን የምፅእ፤ ናብ ውሽጢ እቲ መጋረጃ ድማ የእትዎም። ¹³ነቲ ዕጣን ድማ ኣብ ቅድመይ ኣብ ልዕሊ እቲ ሓዊ ይገብሮ፤ ደበና እቲ ዕጣን ነቲ ኣብ ልዕሊ ምስክር ዘሎ መኽደን ስርየት ምእንቲ ኽኸድኖ፥ ንሱ ኸዓ ምእንቲ ኸይመውት። ^b b v13 እቲ ምስክር ማለት፦ እቲ ኣብ ውሽጢ እቲ ታቦት ዝተቐመጠ፥ ናይ ሕጊ ኪዳን ፅላት እምኒ እዩ። ¹⁴ካብ ደም እቲ ዝራብዕ ድማ ወሲዱ፥ በፃብዕቱ ኣብ ቅድሚት እቲ መኽደን ስርየት ብወገን ምብራቕ ይንፀጎ፤ ካብቲ ደም ከዓ በፃብዕቱ ሸውዓተ ሻዕ ኣብ ቅድሚ እቲ መኽደን ስርየት ይንፀግ።

¹⁵ደሓር ከዓ ነታ ምእንቲ ሓጢኣት እቶም ህዝቢ እትቐርብ ጤል ይሓርዳ፤ ደማ ናብ ውሽጢ እቲ መጋረጃ የእትዎ፤ ነቲ ደም ድማ ከምቲ ናይ ዝራብዕ ደም ዝገበሮ ይገብሮ፤ ኣብ ልዕሊ እቲ መኽደን ስርየትን ኣብ ቅድሚኡን ይንፅጎ። ¹⁶በዙይ ከዓ ምእንቲ ርኽሰት ደቂ እስራኤልን ምትሕልላፎምን ኵሉ ሓጢኣቶምን፥ ነታ ቅድስቲ ቦታ ስርየት ይገብረላ። ነቲ ኣብ ማእኸሎም፥ ኣብ ማእኸል ርኽሰቶም ዝነብር መራኸቢ ድንኳን ድማ ከምኡ ይገብረሉ። ¹⁷ኣብ ቅድስቲ ቦታ ስርየት ክገብር ምስ ኣተወ፥ ክሳዕ ዝወፅእ፥ ሓደ ሰብ እኳ ኣብ መራኸቢ ድንኳን ኣይሃሉ፤ ንርእሱን ንስድራ ቤቱን ንብዘሎ ማሕበር እስራኤልን ስርየት ገይሩ ይወፅእ።

¹⁸ናብቲ ኣብ ቅድመይ ዘሎ መሰውኢ ድማ ይውፃእ፤ ስርየት ይገብረሉ፤ ካብ ደም እቲ ዝራብዕን ካብ ደም እታ ጤልን ወሲዱ፥ ኣብ ኣቕርንቲ እቲ መሰውኢ ኣብ ዙርያ ይገብሮ። ¹⁹ኣብ ልዕሊኡ ድማ በፃብዕቱ ሸውዓተ ሻዕ ካብቲ ደም ይንፀግ፤ የንፅሆን ካብ ርኽሰት ህዝቢ እስራኤል ድማ ይቕድሶን።

²⁰ነታ ቅድስቲ ቦታን መራኸቢ ድንኳንን መሰውእን ስርየት ገይሩ ምስ ወድአ፥ ነታ ህያው ጤል የቕርባ። ²¹ኣሮን ድማ ክልቲኡ ኣእዳዉ ኣብ ርእሲ እታ ህያው ጤል የንብር፤ ኵሉ በደል ደቂ እስራኤልን ኵሉ ምትሕልላፎምን ኵሉ ሓጢኣቶምን ኣብ ልዕሊኣ ይናዘዝ፤ ኣብ ርእሲ እታ ጤል ድማ የንብሮም፤ ደሓር ከዓ ነቲ ስራሕ ብዝተመደበ ሰብ ኣቢሉ ናብ ምድረ በዳ ይሰዳ። ²²እታ ጤል ድማ ኵሉ ሓጢኣቶም ኣብ ልዕሊኣ ፂራ ናብ ፍልይቲ ምድሪ ትኸይድ፤ እቲ ሰብ ከዓ ኣብ ምድረ በዳ ይፈትሓ።

²³ኣሮን ድማ ናብ መራኸቢ ድንኳን ይኣቱ፤ ነቲ ናብ ቅድስቲ ቦታ ኽኣቱ እንተሎ ዝተኸደኖ ናይ ሃሪ ኣልባሳት የውፅእ፤ ኣብኡ ድማ ይገድፎም። ²⁴ኣብ ቅድስቲ ቦታ ድማ ሰብነቱ ብማይ ይተሓፀብ፤ ክዳውንቱውን ይልበስ። ደሓር ከዓ ወፂኡ፥ ነቲ ዝቃፀል መስዋእቱን ነቲ ዝቃፀል መስዋእቲ እቶም ህዝብን የቕርብ፤ ንርእሱን ነቶም ህዝብን ድማ ስርየት ይገብር። ²⁵ነቲ ስብሒ እቲ ምእንቲ ሓጢኣት ዝቐረበ መስዋእቲ ድማ ኣብ መሰውኢ የቃፅሎ።

²⁶እቲ ነታ ጤል ናብ ኣዛዝኤል ዝሰደዳ ሰብ ድማ ክዳውንቱ ይሕፀብ፤ ሰብነቱ ድማ ብማይ ይተሓፀብ፤ ደሓር ከዓ ናብ ሰፈር ይእቶ። ²⁷እቲ ደሙ ኣብ ቅድስቲ ቦታ ስርየት ክግበር ዝኣተወ፥ ምእንቲ ሓጢኣት ዝቐረበ ዝራብዕን ጤልን፥ ናብ ወፃኢ ሰፈር ይውፃእ፤ ቈርበቶምን ስጋኦምን ፈርሶምን ድማ ብሓዊ ይቃፀል። ²⁸እቲ ዘቃፅሎም ሰብ ድማ ክዳውንቱ ይሕፀብ፤ ሰብነቱ ድማ ብማይ ይተሓፀብ፤ ደሓር ከዓ ናብ ሰፈር ይእቶ።

²⁹እዙይ ንኣኻትኩም ናይ ዘለኣለም ሕጊ እዩ፦ ብሻብዓይ ወርሒ ብዓስራይ መዓልቲ ነፍስኹም ኣትሕቱ፤ ዝኾነ ስራሕ ኣይትስርሑ፤ ወዲ ዓዲ ኾነ እቲ ኣብ ማእኸልኩም ዝነብር ጓና። ³⁰በዛ መዓልቲ እዚኣ፥ ካብ ኵሉ ሓጢኣትኩም ምእንቲ ኽትነፅሁ፥ ስርየት ይግበረልኩም እዩ እሞ፤ ኣብ ቅድመይ ድማ ንፁሃት ክትኾኑ ኢኹም። ³¹ንኣኻትኩም ናይ ፍፁም ዕረፍቲ ሰንበት እዩ፤ ነፍስኹም ኣትሕቱ፤ ናይ ዘለኣለም ስርዓት እዩ። ³²እቲ ኣብ ክንዲ ኣቦኡ ኽህንነት ምእንቲ ኸገልግል ዝተቐብአን ዝተቐደሰን ካህን፥ ስርየት ይገብር፤ ነቲ ናይ ሃሪ ኣልባሳት፥ ነቲ ቅዱስ ኣልባሳት ድማ ይልበስ፤ ³³ነታ ቅድስተ ቅዱሳንን መራኸቢ ድንኳንን መሰውእን፥ ነቶም ካህናትን ንብዘሎ ህዝቢ እቲ ማሕበርን ድማ ስርየት ይገብረሎም። ³⁴እዙይ ንኣኻትኩም ናይ ዘለኣለም ስርዓት እዩ፦ ንኵሉ ሓጢኣት ደቂ እስራኤል ኣብ ዓመት ሓደ ሻዕ ስርየት ግበሩ።” ከምቲ ኣቦና ንሙሴ ዝኣዘዞ ድማ ተገብረ።