እቲ ካብ ቤተ መቕደስ ዝውሕዝ ሩባ

ካብ ትሕቲ ድርኵዂት እቲ ቤተ መቕደስ ማይ ይውሕዝ፤ በብእዋኑ እናተዓቀነ ኸዓ ክሳዕ ኩዕታ፥ ብርኪ፥ ሕቘ፥ ደሓር ድማ ክሳዕ ዘይሕምብስ ይበፅሕ። ነቲ ምዉት ባሕሪ የፅርዮ፥ ዓሳ ይመልኦ፥ ኣብ ክልቲኡ ገምገም ድማ ኣብ ነፍሲ ወከፍ ወርሒ ዝፈሪ ኣእዋም የቕውም። ጓኖት ድማ ብትእዛዝ ኣቦና ምድሪ ይወርሱ።

ምዕራፍ 47።

ሽዑ ናብ መእተዊ እታ ቤተ መቕደስ መለሰኒ፤ እንሆ ድማ ካብ ትሕቲ ድርኵዂት እታ ቤተ መቕደስ ናብ ምብራቕ ማይ ይውሕዝ ነበረ፤ ገፅ እታ ቤተ መቕደስ ናብ ምብራቕ ነበረ እሞ። እቲ ማይ ከዓ ካብ ታሕቲ ወገን ደቡብ እታ ቤተ መቕደስ፥ ብወገን ደቡብ መሰውኢ ይወርድ ነበረ። ብደገ ሰሜን ኣውፅአኒ፥ ብደገ ወፃኢ ኣቢሉ ናብቲ ገፁ ናብ ምብራቕ ዘሎ ደገ ወፃኢ ኣዞረኒ፤ እንሆ ድማ ካብ ወገን ደቡብ ማይ ይፍሰስ ነበረ።

እቲ ሰብኣይ መዐቀኒ ገመድ ኣብ ኢዱ ሒዙ ናብ ምብራቕ ክወፅእ እንተሎ፥ ኣስታት ኣርባዕተ ሚእትን ሓምሳን ሜትር ዓቀነ፤ ብማይ ክሳዕ ኩዕታ ድማ ኣሕለፈኒ። ከም ብሓድሽ ኣስታት ኣርባዕተ ሚእትን ሓምሳን ሜትር ዓቀነ፥ ብማይ ክሳዕ ብርኪ ድማ ኣሕለፈኒ። ከም ብሓድሽ ኣስታት ኣርባዕተ ሚእትን ሓምሳን ሜትር ዓቀነ፥ ብማይ ክሳዕ ሕቘ ድማ ኣሕለፈኒ። ከም ብሓድሽ ኣስታት ኣርባዕተ ሚእትን ሓምሳን ሜትር ዓቀነ፤ እቲ ማይ በሪኽ ስለ ዝነበረ፥ ክሰግሮ ዘይኽእል ሩባ ኾነ፤ ሰብ ዝሕምብሰሉ ማይ፥ ዘይስገር ሩባ ኾነ።

ንሱ ድማ “ኣታ ወዲ ሰብ፥ እዙይ ርኢኻዶ?” በለኒ። ሽዑ ናብ ገምገም እቲ ሩባ መለሰኒ።

ምስ ተመለስኩ ድማ፥ ኣብ ክልቲኡ ገምገም እቲ ሩባ የመና ብዙሕ ኣእዋም ረአኹ። ንሱ ኸዓ ከምዙይ በለኒ፦ “እዝ ማይ እዙይ ናብ ምብራቓዊ ኸባቢ ይውሕዝ፥ ናብ ዓረባ ይወርድ፥ ናብ ባሕሪ ድማ ይኣቱ፤ ናብቲ ዝደስከለ ማይ ባሕሪ ምስ ኣተወ ኸዓ፥ እቲ ማይ ፅሩይ ይኸውን። እቲ ሩባ ናብ ዝኸዶ ዅሉ፥ ኵሉ ለመም ዝብል ህያው ፍጡር ክነብር እዩ፤ ዓሳ ድማ የመና ብዙሕ ክኸውን እዩ፤ እዝ ማይ እዙይ ናብኡ ይበፅሕ እሞ፥ ማይ ባሕሪ ፅሩይ ይኸውን፤ እቲ ሩባ ናብ ዝኸዶ ዅሉ ኸዓ ኵሉ ነገር ህያው ይኸውን። ኣስገርቲ ዓሳ ኣብ ጥቓኡ ደው ክብሉ እዮም፤ ካብ ዓይንጋዲ ክሳዕ ዓይንዔግላይም መዝርግሒ መርበብ ክኸውን እዩ። እቲ ዓሳ ኸዓ፥ ከም ዓሳ እቲ ዓብዪ ባሕሪ፥ ብዙሕ ዓይነት ክኸውን እዩ። የመና ብዙሕ ክኸውን እዩ። እቲ ረግረጉን ዓዘቕቱን ግና ፅሩይ ኣይኸውንን፤ ንጨው ይግደፉ እዮም። ኣብ ክልቲኡ ገምገም ድማ ኵሉ ዓይነት ኣእዋም ፍረ ክበቍል እዩ። ቆፅሉ ኣይነቅፅን፥ ፍሪኣ ድማ ኣይውዳእን፤ ማዩ ኻብ መቕደስ ይውሕዝ ስለ ዝኾነ፥ ኣብ ነፍሲ ወከፍ ወርሒ ሓድሽ ፍረ ክፈሪ እዩ። ፍሪኣ ንምግቢ፥ ቆፅሉ ድማ ንፈውሲ ይኸውን።” ^a

ኣቦ ነታ ምድሪ ይመቕላ

እቲ ልዑል ኣቦ ከምዙይ ይብል፦ “ነዛ ምድሪ ንዓሰርተ ክልተ ነገድ እስራኤል ርስቲ ጌርኩም ክትመቕልዋ ከለኹም፥ እዚኣቶም ወሰናት እዮም፦ ዮሴፍ ክልተ ግደ ይረክብ። ማዕረ ጌርኩም ተማቐልዋ፤ ንኣቦታትኩም ክህቦም ምሒለ ነይረ እሞ፥ እዛ ምድሪ ኸዓ ርስትኹም ኮይና ትወድቐልኩም።

ወሰን እታ ምድሪ ኸዓ እዙይ እዩ፦ ብወገን ሰሜን፥ ካብ ዓብዪ ባሕሪ ብሔትሎን ኣቢሉ ናብ መእተዊ ሓማት፥ ፅዳድ፥

ቤሮታ፥ ሲብራይም (ኣብ መንጎ ወሰን ደማስቆ ምስ ወሰን ሓማት ዘላ)፥ ሓፄር ሓቲኮን ድማ ኣብ ወሰን ሓውራን ኣለዋ። እቲ ወሰን ከዓ ካብ ባሕሪ ክሳዕ ሓፃርዔናን ኣብ ወሰን ደማስቆ ይኸይድ፤ ወሰን ሓማት ድማ ብወገን ሰሜን እዩ። እዝ ናይ ሰሜን ወገን እዩ።

ናይ ምብራቕ ወገን ከዓ፥ ኣብ መንጎ ሓውራን ምስ ደማስቆ፥ ኣብ መንጎ ጊልዓድን ምድሪ እስራኤልን በቲ ፈለግ ዮርዳኖስ ኣቢሉ፥ ክሳዕ ምብራቓዊ ባሕሪ፥ ክሳዕ ታማር ይኸይድ። እዝ ናይ ምብራቕ ወገን እዩ።

ናይ ደቡብ ወገን ከዓ፥ ካብ ታማር ክሳዕ ማያት መሪባ ቃዴስ፥ ካብኡ ድማ በቲ ሩባ ግብፂ ኣቢሉ ክሳዕ ዓብዪ ባሕሪ ይኸይድ። እዝ ናይ ደቡብ ወገን፥ ናብ ኔጌብ ዝቐንዐ እዩ።

ናይ ምዕራብ ወገን ከዓ፥ እቲ ዓብዪ ባሕሪ ኽሳዕ መንፅር መእተዊ ሓማት ወሰን ይኸውን። እዝ ናይ ምዕራብ ወገን እዩ።

እምበኣር ነዛ ምድሪ እዚኣ ኸም ነገዳት እስራኤል ንነፍስኹም ተማቐልዋ። ንነፍስኹምን ነቶም ኣብ ማእኸልኩም ዝነብሩ፥ ኣብ ማእኸልኩም ውሉድ ዘለውዎም ጓኖትን ርስቲ ጌርኩም ኣካፍልዎ፤ ከም ወዲ ዓዲ እስራኤላውያን ጌርኩም ቍፀርዎም፤ ምሳኻትኩም ኣብ ማእኸል ነገዳት እስራኤል ርስቲ ይረኽቡ። እቲ ጓና ኣብ ዝኾነ ነገድ ኣብ ዝተቐመጠሉ፥ ኣብኡ ርስቱ ሃብዎ፥ ይብል እቲ ልዑል ኣቦ።”