Rũũĩ Rũrĩa Rũathereraga Ruumĩte Hekarũinĩ

Maaĩ maikũrũkaga marĩ manini kuuma rungu rwa hingĩro ya hekarũ, nao mathimwo o kahinda makinyaga magũrũinĩ, maruinĩ, njoheroinĩ, makaingĩha nginya mũndũ akaaga kũringa. Nĩmatheragia Iria rĩa Cumbĩ, makarĩiyũria thamaki, na hũgũrũrũinĩ gũkagĩa mĩtĩ ĩciaraga o mweri. Ageni nĩmagaya igai nĩ ũndũ wa watho wa Ithe witũ.

Gĩcunjĩ 47.

Nake agĩcooka akĩndwara rĩngĩ itoonyeroinĩ rĩa hekarũ, na rĩrĩ, maaĩ nĩmathereraga makiuma rungu rwa hingĩro mathiĩte mwena wa irathĩro, nĩgũkorwo hekarũ nĩyeerorete mwena wa irathĩro. Namo maaĩ macio maikũrũkaga moimĩte rungu rwa mwena wa gũthini wa hekarũ, mwena wa gũthini wa kĩgongona. Akĩnumia na kĩhingo kĩa mwena wa gathigathini, akĩndithiũrũrũkia na nja nginya kĩhingo kĩa nja kĩrĩa kĩeerorete irathĩro; namo maaĩ nĩmatatĩkaga moimĩte mwena wa gũthini.

Rĩrĩa mũndũ ũcio aathiiaga mwena wa irathĩro arĩ na rũrigi rwa gũthima, agĩthima ta buti ngiri ĩmwe na magana matano, akĩndwarũkia maaĩinĩ maakinyaga magũrũinĩ. Agĩthima buti ingĩ ngiri ĩmwe na magana matano, akĩndwarũkia—maaĩ maakinyaga maruinĩ. Agĩthima buti ingĩ ngiri ĩmwe na magana matano, akĩndwarũkia—maaĩ maakinyaga njoheroinĩ. Agĩthima buti ingĩ ngiri ĩmwe na magana matano—rĩu rĩarĩ rũũĩ itangĩahotire kũringa, nĩgũkorwo maaĩ nĩmaiyũrĩte, maaĩ maarĩ maingĩ ma kũũgania, rũũĩ rũtangĩaringĩkire.

Nake akĩnjĩĩra atĩrĩ, “Mũrũ wa Mũndũ, nĩwonete maũndũ maya?” Agĩcooka akĩndwara rĩngĩ hũgũrũrũinĩ cia rũũĩ.

Na rĩrĩa ndaacookaga, ngĩona mĩtĩ mĩingĩ mũno mĩena yeerĩ ya rũũĩ. Nake akĩnjĩĩra atĩrĩ, “Maaĩ maya mathereraga marorete rũgongo rwa irathĩro, maikũrũkĩte nginya Araba, magĩtoonya iria-inĩ, iria rĩa maaĩ matarĩ matherũ, namo maaĩ macio magĩtuĩka matherũ. Kũrĩa guothe rũũĩ rũrũ rũgaathererera, ciũmbe ciothe irĩ muoyo iria ciĩthiũrũrũkaga nĩigaatũũra muoyo, nacio thamaki igaatuĩka nyingĩ mũno; nĩgũkorwo maaĩ maya nĩmakinyaga kũu, namo maaĩ ma iria magĩtuĩka matherũ, nakĩo kĩndũ gĩothe gĩgaatũũra muoyo kũrĩa guothe rũũĩ rũrũ rũgaathiĩ. Ategi a thamaki nĩmakarũgama hakuhĩ naruo; kuuma Eni-gedi nginya Eni-egilaimu nĩhakaagĩa handũ ha gũtambũrũkia neti. Thamaki ciaruo igaakorwo irĩ cia mĩthemba mĩingĩ, ta thamaki cia Iria Rĩrĩa Inene. Nĩigakorwo irĩ nyingĩ mũno. No itomboya ciaruo na mathanjĩ maruo matigaatuĩka matherũ; icio igaatigĩrwo cumbĩ. Nayo mĩtĩ ya matunda ya mĩthemba yothe nĩĩgakũra mĩena yeerĩ ya rũũĩ. Mathangũ mayo matigaahooha kana matunda mayo mathire; o mweri magaaciara matunda merũ, nĩgũkorwo maaĩ maruo moimaga handũ-harĩa-haamũre. Namo matunda mayo magaatuĩka irio, namo mathangũ mayo matuĩke ma kũhonia.” ^a

Ithe Witũ Agayania Bũrũri

Ithe witũ Mwene-Hinya ekuuga atĩrĩ: “Mĩhaka ĩno nĩyo ya kũgayania bũrũri ũtuĩke igai gatagatĩ-inĩ ka mĩhĩrĩga ĩrĩa ĩkũmi na ĩĩrĩ ya Isiraeli: Jusufu akaagĩa na igai inene maita meerĩ. Ũgaayane o ũndũ ũmwe; nĩndehĩtire atĩ nĩngaũheana kũrĩ maithe manyu, naguo bũrũri ũyũ nĩũkũgwĩra inyuĩ ũtuĩke igai rĩanyu.

Ũyũ nĩguo mũhaka wa bũrũri: mwena wa gathigathini, kuuma Iria Rĩrĩa Inene ũgereire Hethiloni nginya Lebo-hamathu, na Zedadi,

na Berotha, na Siburaimu (gatagatĩ ka mĩhaka ya Dameski na Hamathu), na Hazeri-hatikoni, mũhaka-inĩ wa Haurani. Nĩ ũndũ ũcio mũhaka ũgereire kuuma iria nginya Hazari-enani, mũhaka-inĩ wa Dameski, naguo mũhaka wa Hamathu ũrĩ mwena wa gathigathini. Ũyũ nĩguo mwena wa gathigathini.

Mwena wa irathĩro ũgereire gatagatĩ ka Haurani na Dameski, ũkagerera Jorodani gatagatĩ ka Gileadi na bũrũri wa Isiraeli, nginya iria rĩa mwena wa irathĩro o nginya Tamara. Ũyũ nĩguo mwena wa irathĩro.

Mwena wa gũthini ũgereire kuuma Tamara nginya maaĩinĩ ma Meriba-kadeshi, ũgĩcooka ũkagerera Karũũĩ ka Misiri nginya Iria Rĩrĩa Inene. Ũyũ nĩguo mwena wa gũthini, mũrorete Negevu.

Naguo mwena wa ithũĩro, Iria Rĩrĩa Inene nĩrĩo rĩgaatuĩka mũhaka nginya hau hangʼethanĩire na Lebo-hamathu. Ũyũ nĩguo mwena wa ithũĩro.

Nĩ ũndũ ũcio ũgaayane bũrũri ũyũ gatagatĩ-inĩ kanyu kũringana na mĩhĩrĩga ya Isiraeli. Mũũgaayane ũtuĩke igai rĩanyu inyuĩ ene o na ageni arĩa matũũranagia na inyuĩ arĩa magĩĩte na ciana gatagatĩ-inĩ kanyu. Mũmekagĩre ta andũ a Isiraeli arĩa maaciarĩirwo bũrũri-inĩ ũcio; hamwe na inyuĩ nĩmakaagĩa na igai gatagatĩ-inĩ ka mĩhĩrĩga ya Isiraeli.” Mũhĩrĩga-inĩ ũrĩa wothe mũgeni agaatũũra, mũheei igai rĩake kũu, ũguo nĩguo Ithe witũ Mwene-Hinya ekuuga.