ቈላስይስ 4 FHB Father's Heart Bible™

4 ¹ኣቱም ጐይቶት፥ ንስኻትኩምውን ኣብ ሰማይ ጐይታ ኣለኩም እዩ እሞ፥ ንባሮትኩም እቲ ቅኑዕን ፍትሓውን ሃብዎም።

²ፀሎት ኣዘውትሩ፤ ብምስጋና ኸዓ ኣብኡ እናተጋህኹም ፅንሑ። ³ምእንታና ድማ ፀልዩ፤ ኣቦና ነቲ መልእኽቲ ኸነካፍል ማዕፆ ክኸፍተልና፥ ነቲ ምስጢር ክርስቶስ ድማ ክንነግር፤ ብዛዕባ እዙይ ከዓ ተኣሲረ ኣለኹ፤ ⁴ከምቲ ኽዛረቦ ዝግብአኒ ድማ ግሉፅ ክገብሮ።

⁵ናብቶም ኣብ ወፃኢ ዘለዉ ብጥበብ ተመላለሱ፤ ነቲ ጊዜ ኣፅኒዕኹም ተጠቐሙሉ። ⁶ዘረባኹም ኵልሻዕ ብፀጋ፥ ጨው ዝኣተዎ ይኹን፤ ንነፍሲ ወከፍ ከመይ ጌርኩም ከም እትምልሱሉ ፍለጡ። ^a a v6 ጨው ዝኣተዎ፦ ሓሳበኛን ሰሓብን ዝኾነ፥ ክስማዕ ዝግብኦ ቃል።

ፍቑራት ብፆት ኣገልገልቲ

⁷ቲኪቆስ፥ እቲ ፍቑር ሓውናን እሙን ኣገልጋልን ኣብ ጐይታ ድማ ብፃይ ባርያን፥ ብዛዕባይ ዅሉ ኽነግረኩም እዩ። ⁸ነዙይ ናባኻትኩም ዝለኣኽክዎ ድማ፥ ናይና ኵነታት ምእንቲ ኽትፈልጡ፥ ንሱ ኸዓ ንልብኹም ምእንቲ ኸፀናንዕ እዩ፤ ⁹ምስ ኦኔሲሞስ ድማ፥ እቲ እሙንን ፍቑርን ሓውና፥ ካባኻትኩም ዝኾነ፤ ንሳቶም ነቲ ኣብዙይ ዘሎ ዅሉ ኽነግሩኹም እዮም።

¹⁰ኣሪስጥርኮስ ምሳይ እሱር ዝኾነ፥ ማርቆስ ድማ ወዲ ሓወቦኡ በርናባስ፥ ሰላም ይብሉኹም፤ ብዛዕባኡ ትእዛዝ ተቐቢልኩም ኢኹም፦ እንተ መፀኩም ተቐበልዎ፤ ¹¹ኢዮስጦስ ተባሂሉ ዝፅዋዕ ኢየሱስ ድማ ሰላም ይብለኩም ኣሎ፤ እዚኣቶም ምእንቲ መንግስቲ ኣቦና ካብ መዓይይተይ ኣይሁድ ዝኾኑ በይኖም እዮም፤ ንዓይ ድማ ኣፅናንዑኒ።

¹²ኤጳፍራስ፥ ካባኻትኩም ዝኾነ ኣገልጋሊ ክርስቶስ ኢየሱስ፥ ሰላም ይብለኩም ኣሎ፤ ፍፁማንን ኣብ ኵሉ ፍቓድ ኣቦና ርጉፃትን ኴንኩም ምእንቲ ኽትቀውሙ፥ ኵልሻዕ ብፀሎት ምእንታኻትኩም ይጋደል ኣሎ። ¹³ንሱ ምእንታኻትኩም፥ ከምኡውን ምእንቲ እቶም ኣብ ሎዶቅያን ኣብ ሄራቡሊስን ዘለዉ፥ ብርቱዕ ከም ዝሰርሐ ክምስክረሉ እኽእል እየ። ¹⁴ሉቃስ እቲ ፍቑር ሓኪም ድማ ሰላም ይብለኩም ኣሎ፤ ዴማስውን ከምኡ።

¹⁵ነቶም ኣብ ሎዶቅያ ዘለዉ ኣሕዋት፥ ንኒምፋ፥ ከምኡውን ነታ ኣብ ቤታ ዘላ ቤተ ክርስቲያን ሰላም በልዎም። ¹⁶እዛ መልእኽቲ እዚኣ ኣብ ማእኸልኩም ምስ ተነበበት፥ ኣብታ ቤተ ክርስቲያን ሎዶቅያውን ክትንበብ ግበሩ፤ ነታ ኻብ ሎዶቅያ እትመፅእ ድማ ንስኻትኩም ኣንብብዋ። ¹⁷ንኣርኪጶስ ድማ “ነቲ ኣብ ጐይታ ዝተቐበልካዮ ኣገልግሎት ክትፍፅሞ ተጠንቀቕ” በልዎ።

¹⁸ኣነ ጳውሎስ፥ እዝ ሰላምታ እዚ ብኢደይ ፅሒፈዮ ኣለኹ። ንመቝሐይ ዘክሩ። ፀጋ ምሳኻትኩም ይኹን።