کولوسيان 4 FHB Father's Heart Bible™

4 ¹اے مالِکانو، خپلو غلامانو ته هغه څۀ ورکوئ چې صحيح او انصاف وى، ځکه چې تاسو هم په آسمان کښې يو مالِک لرئ.

²په دُعا کښې لګيا اوسئ، او په هغې کښې د شکرګذارۍ سره بيدار اوسئ. ³زمونږ دپاره هم دُعا وکړئ، چې زمونږ پلار دې زمونږ دپاره د کلام رسولو دروازه خلاصه کړى، چې مونږ د مسيح راز بيان کړو، چې د هغې په وجه زۀ هم په زنځيرونو کښې يم، ⁴چې زۀ هغه څرګند کړم، لکه چې ماته ويل په کار دى.

⁵د باندنيو خلقو سره په حکمت سره وګرځئ، او د هر موقع نه ښه فائده واخلئ. ⁶ستاسو خبرې دې هر وخت په فضل سره وى، او په مالګه خوندورې وى، چې تاسو پوهه شئ چې هر چا ته څنګه جواب ورکوئ. ^a a v6 په مالګه خوندورې: سوچمنې او زړۀ راښکونکې — داسې خبرې چې د اورېدو وړ وى.

ګران ملګرى کارکوونکى

⁷تِخِکُس، چې زمونږ ګران ورور، وفادار خادِم او په مالِک کښې زمونږ د غلامۍ ملګرے دے، تاسو ته به زما ټول حال وائى. ⁸ما هغه د دې دپاره تاسو ته ولېږلو چې تاسو زمونږ د حال نه خبر شئ، او هغه ستاسو زړونه حوصله مند کړى، ⁹د اُنيسِمُس سره، چې وفادار او ګران ورور دے او ستاسو نه يو دے. هغوئ به تاسو ته دلته د هر څۀ حال وائى.

¹⁰اَرِسترخُس، چې زما د قيد ملګرے دے، او مرقُس چې د برنباس د تره زوئ دے، تاسو ته سلام وائى — د هغۀ په حقله تاسو ته هدايتونه درکړے شوى دى: کۀ هغه تاسو ته راشى، نو هغۀ ته ښۀ راغلاست ووايئ، ¹¹او عيسىٰ چې هغۀ ته يُوستُس وائى — دا زما د کارکوونکو ملګرو نه يوازينى يهوديان دى چې د زمونږ پلار د بادشاهۍ دپاره کار کوى؛ دوئ ماته تسلى راکړې ده.

¹²اِپَفراس چې ستاسو نه يو دے او د مسيح عيسىٰ خادِم دے، تاسو ته سلام وائى، هغه هر وخت ستاسو دپاره په دُعا کښې جدوجهد کوى، چې تاسو په هر هغه څۀ کښې چې زمونږ پلار يې غواړى، پوخ او پوره يقين سره ودرېږئ. ¹³زۀ ويلے شم چې هغۀ ستاسو دپاره، او د هغو خلقو دپاره چې په لودِکيه او هيراپُلِس کښې دى، ډېر زيار اېستلے دے. ¹⁴لُوقا، چې ګران طبيب دے، تاسو ته سلام وائى، او دِماس هم.

¹⁵په لودِکيه کښې وروڼو او خويندو ته سلام ووايئ، او نِمفا ته او هغې کليسا ته چې د هغې په کور کښې ده. ¹⁶کله چې دا خط ستاسو په مينځ کښې ولوستے شى، نو داسې وکړئ چې د لودِکيه په کليسا کښې هم ولوستے شى، او هغه خط چې د لودِکيه نه راځى، هغه هم ولولئ. ¹⁷او اَرخِپُس ته ووايئ چې، ”خيال ساته چې هغه خدمت پوره کړې چې تا په مالِک کښې موندلے دے.“

¹⁸زۀ پولوس دا سلام په خپل لاس ليکم. زما زنځيرونه ياد ساتئ. فضل دې درسره وى.