Kolose 4

4 ¹Ẹ̀yin ọ̀gá, ẹ fún àwọn ẹrú yín ní ohun tí ó tọ́ àti ohun tí ó yẹ—ẹ̀yin pẹ̀lú ní Ọ̀gá kan ní ọ̀run.

²Ẹ fi ara yín jìn sí àdúrà, kí ẹ sì máa wà lójúfò nínú rẹ̀ pẹ̀lú ọpẹ́. ³Ẹ gbàdúrà fún wa pẹ̀lú, kí Baba wa lè ṣí ìlẹ̀kùn kan sílẹ̀ fún wa láti sọ ọ̀rọ̀ náà, láti kéde àṣírí Kristi, èyí tí mo fi wà nínú ẹ̀wọ̀n pẹ̀lú, ⁴kí èmi lè sọ ọ́ di yékéyéké, bí ó ti yẹ kí n sọ.

⁵Ẹ máa fi ọgbọ́n rìn sí àwọn tí ó wà lóde, kí ẹ sì máa lo gbogbo àǹfààní dáradára. ⁶Ẹ jẹ́ kí ọ̀rọ̀ yín máa kún fún oore-ọ̀fẹ́ nígbà gbogbo, tí a fi iyọ̀ dùn, kí ẹ lè mọ bí ẹ ti ń dá ẹnìkọ̀ọ̀kan lóhùn. ^a a v6 Tí a fi iyọ̀ dùn: tí ó ní ìrònú tí ó sì fani mọ́ra — ọ̀rọ̀ tí ó yẹ láti gbọ́.

Àwọn Alábàáṣiṣẹ́pọ̀ Olùfẹ́

⁷Tikiku, arákùnrin wa olùfẹ́, ìránṣẹ́ olóòótọ́, àti ẹrú ẹlẹgbẹ́ nínú Olúwa, yóò sọ ohun gbogbo nípa mi fún yín. ⁸Mo rán an sí yín fún èrèdí yìí: kí ẹ lè mọ ipò wa, kí ó sì lè gba ọkàn yín níyànjú, ⁹pẹ̀lú Onesimu, arákùnrin olóòótọ́ àti olùfẹ́, ọ̀kan nínú yín. Wọn yóò sọ ohun gbogbo tí ó ń ṣẹlẹ̀ níhìn-ín fún yín.

¹⁰Aristarku, ẹlẹ́wọ̀n ẹlẹgbẹ́ mi, àti Marku, ọmọ-ìbátan Barnaba, kí yín—ẹ ti gba ìtọ́ni nípa rẹ̀: kí ẹ gbà á láyọ̀ bí ó bá wá sọ́dọ̀ yín, ¹¹àti Jesu, tí a ń pè ní Justu—àwọn wọ̀nyí nìkan ṣoṣo ni àwọn Júù láàrin àwọn alábàáṣiṣẹ́pọ̀ mi fún ìjọba Baba wa; wọ́n ti tù mí nínú.

¹²Epafira, ọ̀kan nínú yín, ìránṣẹ́ Kristi Jesu, kí yín, ó ń làkàkà fún yín nínú àdúrà nígbà gbogbo, kí ẹ lè dúró ní pípé àti ní ìdánilójú kíkún nínú gbogbo ohun tí Baba wa fẹ́. ¹³Mo lè jẹ́rìí pé ó ti ṣiṣẹ́ kára fún yín, àti fún àwọn tí ó wà ní Laodikea, àti ní Hierapoli. ¹⁴Luku, oníṣègùn olùfẹ́ náà, kí yín, bẹ́ẹ̀ sì ni Dema pẹ̀lú.

¹⁵Ẹ kí àwọn arákùnrin àti arábìnrin tí ó wà ní Laodikea, àti Nimfa àti ìjọ tí ó wà nílé rẹ̀. ¹⁶Nígbà tí a bá ka lẹ́tà yìí láàrin yín, ẹ jẹ́ kí a kà á nínú ìjọ Laodikea pẹ̀lú, kí ẹ sì ka èyí tí ó ti Laodikea wá pẹ̀lú. ¹⁷Ẹ sì sọ fún Arkippu pé, “Rí i dájú pé o parí iṣẹ́ ìránṣẹ́ tí o ti gbà nínú Olúwa.”

¹⁸Èmi, Paulu, fi ọwọ́ ara mi kọ ìkíni yìí. Ẹ rántí ẹ̀wọ̀n mi. Kí oore-ọ̀fẹ́ wà pẹ̀lú yín.