Colossians 4

4 ¹Una wey be masters, give una slaves wetin correct and fair—una too get one Master for heaven.

²Give unaself well-well to prayer, dey alert inside am wit thanksgiving. ³Pray for us too, make our Papa open door for us to share di message, to declare di mystery of Christ, wey I dey for chain because of am, ⁴make I fit make am clear, as e suppose make I talk am.

⁵Waka wit wisdom towards di people wey dey outside, dey use every opportunity well-well. ⁶Make una talk wit grace all di time, wit salt inside, so una go sabi how to answer each person. ^a a v6 Wit salt inside: thoughtful and sweet to hear — word wey worth to listen to.

Co-Workers wey We Love

⁷Tychicus, our dear brother, faithful servant, and fellow slave for di Oga, go tell una everytin about me. ⁸Na for dis reason I send am come una: so make una fit know how we dey, and make e fit encourage una heart, ⁹wit Onesimus, di faithful, dear brother, wey be one of una. Dem go tell una everytin wey dey happen here.

¹⁰Aristarchus, my fellow prisoner, and Mark, Barnabas im cousin, greet una—una don receive instruction about am: welcome am if e come meet una, ¹¹and Jesus, wey dem dey call Justus—na only dem be Jews among my co-workers for di kingdom of our Papa; dem don comfort me.

¹²Epaphras, wey be one of una, servant of Christ Jesus, greet una, e dey struggle for una all di time inside prayer, so make una fit stand mature and fully sure for everytin wey our Papa want. ¹³I fit talk say e don work hard for una, and for dem wey dey Laodicea, and Hierapolis. ¹⁴Luke, di doctor wey we love, greet una, and Demas too.

¹⁵Greet di brothers and sisters wey dey Laodicea, and Nympha and di church wey dey her house. ¹⁶Wen dem read dis letter among una, make dem read am for di Laodicea church too, and make una read di one wey come from Laodicea as well. ¹⁷And tell Archippus say, “Make sure say you finish di ministry wey you receive for di Oga.”

¹⁸Me, Paul, na my own hand I take write dis greeting. No forget my chain. Make grace dey wit una.