Jiri Amamihe Na-eje Ije, Jiri Ikwesi Ntụkwasị Obi Na-ekpe Ekpere

Pọl rịọrọ ka ha kpee ekpere ka Nna anyị meghee ọnụ ụzọ maka ozi ahụ ọbụna mgbe ọ nọ nʼagbụ, gbaa ha ume ka okwu ha na-adị mma, nke e tinyere nnu, nʼebe ndị nọ nʼèzí nọ, wee kpọọ aha ndị enyi ya otu otu — Taịkikọs, Onisimọs, Epafras onye na-agbasi mbọ ike nʼekpere maka ha, Luk, Mak.

Isi 4.

Ndị nwe ohu, nyenụ ndị ohu unu ihe ziri ezi na ihe kwụ ọtọ, nʼihi na unu onwe unu nwekwara Onyenwe unu nʼeluigwe.

Werenụ onwe unu nye ekpere, na-amụ anya nʼime ya site nʼekele. Kpeekwaranụ anyị ekpere, ka Nna anyị meghere anyị ọnụ ụzọ ka anyị kwusaa ozi ahụ, ka anyị kwupụta ihe nzuzo nke Kraịst, nke m ji nọrọ nʼagbụ, ka m mee ka o doo anya, dịka m kwesịrị isi kwuo ya.

Jirinụ amamihe na-eje ije nʼebe ndị nọ nʼèzí nọ, na-eji ohere ọbụla mee ihe bara uru. Ka okwu unu na-adị mma mgbe niile, nke e tinyere nnu, ka unu wee mara otu unu ga-esi zaa onye ọbụla. ^a

Ndị Enyi M M Na-eso Arụ Ọrụ, Ndị M Hụrụ Nʼanya

Taịkikọs, nwanne anyị m hụrụ nʼanya, onye ohu kwesịrị ntụkwasị obi, na onye mụ na ya bụ ndị ohu nʼime Onyenwe anyị, ga-agwa unu ihe niile banyere m. Nke a bụ ihe mere m ji zigara ya nʼebe unu nọ: ka unu wee mara otu anyị mere, ka ọ gbaakwa obi unu ume, ya na Onisimọs, nwanne anyị kwesịrị ntụkwasị obi, onye a hụrụ nʼanya, onye so nʼetiti unu. Ha ga-agwa unu ihe niile na-eme nʼebe a.

Aristakọs, onye mụ na ya nọ nʼụlọ mkpọrọ, na Mak, nwa nwanne nne Banabas, na-ekele unu—unu anatala ntụziaka banyere ya: nabatanụ ya ma ọ bịakwute unu, na Jisọs, onye a na-akpọ Jọstọs—naanị ndị Juu nʼetiti ndị mụ na ha na-arụkọ ọrụ maka alaeze Nna anyị; ha akasiela m obi.

Epafras, onye so nʼetiti unu, onye ohu nke Kraịst Jisọs, na-ekele unu, na-adọgide onwe ya nʼekpere maka unu mgbe niile, ka unu wee guzosie ike dịka ndị tozuru etozu na ndị obi ha siri ike nʼihe niile Nna anyị chọrọ. Enwere m ike ịgba ama na ọ rụsiela ọrụ ike maka unu, na maka ndị nọ na Laodisia, na ndị nọ na Hiraapọlis. Luk, dọkịta ahụ a hụrụ nʼanya, na-ekele unu, Dimas na-ekelekwa unu.

Keleerenụ m ụmụnna nọ na Laodisia, na Nimfa, na nzukọ ahụ nọ nʼụlọ ya. Mgbe a gụchara akwụkwọ ozi a nʼetiti unu, mekwanụ ka a gụọ ya na nzukọ ndị Laodisia, ka unu gụọkwa nke si na Laodisia bịa. Gwakwanụ Akipọs sị, “Lezie anya ka i rụchaa ozi ahụ i natara nʼime Onyenwe anyị.”

Mụ onwe m, bụ Pọl, ji aka m dee ekele a. Chetanụ agbụ m. Ka amara dịnyere unu.