ቈላስይስ 4

4 ¹ጌቶች ሆይ፤ በሰማይ ጌታ ያላችሁ መሆኑን እያወቃችሁ ለባሮቻችሁ የሚገባቸውንና ትክክለኛውን ስጡ።

²በምስጋና በጸሎት ላይ እየነቃችሁ ለጸሎት ራሳችሁን ስጡ። ³ስለ ክርስቶስ ምስጢር እናገር ዘንድ አባታችን የመልእክቱን በር እንዲከፍትልን ስለ እኛም ጸልዩ፤ ስለዚህም ምስጢር በሰንሰለት ታስሬአለሁ፤ ⁴ልናገር እንደሚገባኝ ግልጽ አደርገው ዘንድ ጸልዩ።

⁵አጋጣሚውን ሁሉ እየተጠቀማችሁ ለውጭ ያሉትን በጥበብ ተመላለሱ። ⁶እያንዳንዱን እንዴት መመለስ እንደሚገባ እያወቃችሁ፣ ንግግራችሁ ሁልጊዜ በጨው እንደ ተቀመመ በጸጋ የተሞላ ይሁን። ^a a v6 በጨው የተቀመመ፦ አሳቢና ማራኪ፣ ለመስማት የሚገባ ቃል ማለት ነው።

የተወደዱ የሥራ ባልደረቦች

⁷የተወደደ ወንድማችን፣ ታማኝ አገልጋይና በጌታ አብሮ ባሪያ የሆነው ቲኪቆስ ስለ እኔ ሁሉን ይነግራችኋል። ⁸ስለ እኛ ኹኔታ ታውቁ ዘንድና ልባችሁን ያጽናና ዘንድ ለዚሁ ዓላማ ወደ እናንተ ላክሁት፤ ⁹ከእናንተ የሆነውን ታማኝና የተወደደ ወንድም ከሆነው ከአናሲሞስ ጋር ላክሁት። እዚህ ያለውን ሁሉ ይነግሩአችኋል።

¹⁰አብሮኝ የታሰረው አርስጥሮኮስ፣ የበርናባስ ዘመድ የሆነው ማርቆስም ሰላምታ ያቀርቡላችኋል፤ ስለ እርሱ ትእዛዝ ተቀብላችኋል፤ ወደ እናንተ ቢመጣ ተቀበሉት፤ ¹¹ኢዮስጦስ የተባለው ኢየሱስም ሰላምታ ያቀርብላችኋል፤ ለአባታችን መንግሥት አብረውኝ ከሚሠሩት መካከል አይሁዳውያን እነዚህ ብቻ ናቸው፤ እነርሱም አጽናንተውኛል።

¹²ከእናንተ የሆነው የክርስቶስ ኢየሱስ አገልጋይ ኤጳፍራስ ሰላምታ ያቀርብላችኋል፤ አባታችን በሚወደው ነገር ሁሉ ፍጹማንና በሙሉ እምነት የጸናችሁ ኾናችሁ ትቆሙ ዘንድ ሁልጊዜ ስለ እናንተ በጸሎት ይተጋል። ¹³ስለ እናንተ፣ በሎዶቅያና በሄራቦሊስ ስላሉትም እጅግ እንደ ደከመ እመሰክርለታለሁ። ¹⁴የተወደደው ባለ መድኀኒት ሉቃስ ሰላምታ ያቀርብላችኋል፤ ዴማስም እንዲሁ።

¹⁵በሎዶቅያ ላሉት ወንድሞችና እኅቶች፣ ለንምፉንም በቤቷ ላለችው ቤተ ክርስቲያንም ሰላምታ አቅርቡ። ¹⁶ይህ መልእክት በመካከላችሁ ከተነበበ በኋላ፣ በሎዶቅያ ቤተ ክርስቲያንም እንዲነበብ አድርጉ፤ ከሎዶቅያ የመጣውንም እናንተ ደግሞ አንብቡ። ¹⁷አርክጶስንም፣ “በጌታ የተቀበልኸውን አገልግሎት እንድትፈጽም ተጠንቀቅ” በሉት።

¹⁸እኔ ጳውሎስ ይህን ሰላምታ በገዛ እጄ እጽፋለሁ። እስራቴን አስቡ። ጸጋ ከእናንተ ጋር ይሁን።