ቈላስይስ 3 FHB Father's Heart Bible™

3 ¹እምበኣር ምስ ክርስቶስ ተንሲእኩም ኢኹም እሞ፥ ነቲ ኣብ ላዕሊ ዘሎ፥ ክርስቶስ ኣብ የማን ኣቦና ተቐሚጡ ኣብ ዘለዎ፥ ድለዩ። ²ኣእምሮኹም ነቲ ኣብ ላዕሊ ዘሎ ነገር ኣቕንዑ እምበር፥ ነቲ ናይ ምድሪ ነገር ኣይኹን። ³ሞይትኩም ኢኹም እሞ፥ ህይወትኩም ድማ ምስ ክርስቶስ ኣብ ኣቦና ተሓቢኡ ኣሎ። ⁴ክርስቶስ፥ እቲ ህይወትኩም፥ ምስ ዝግለፅ፥ ሽዑ ንስኻትኩምውን ምስኡ ብኽብሪ ክትግለፁ ኢኹም።

⁵እምበኣር ነቲ ኣባኻትኩም ዘሎ ምድራዊ ነገር ቅተሉ፦ ዝሙት፥ ርኽሰት፥ ፍትወት፥ ክፉእ ትምኒት፥ ስስዐ፤ እዙይ ከዓ ምምላኽ ጣዖት እዩ። ⁶ብሰንኪ እዝ ነገር እዙይ፥ ቍጥዓ ኣቦና ኣብ ልዕሊ እቶም ዘይእዘዝዎ ክመፅእ እዩ። ⁷ንስኻትኩምውን ቀደም ከምዙይ ትነብሩ ኔርኩም፤ ህይወትኩም ድማ እዙይ ነበረ። ⁸ሕዚ ግና እዝ ኵሉ ኣርሕቑ፦ ኵራ፥ ቍጥዓ፥ እከይ፥ ሓሜት፥ ካብ ኣፍኩም ዝወፅእ ነውራም ዘረባ። ⁹ነቲ ኣረጊት ሰብነት ምስ ግብሩ ቀንጢጥኩም ኢኹም እሞ፥ ንሓድሕድኩም ኣይትሓሳሱ፤ ¹⁰ነቲ ሓድሽ ሰብነት ድማ ተኸዲንኩም ኢኹም፤ እዙይ ከዓ ከም መልክዕ እቲ ፈጣሪኡ ብፍልጠት እናተሓደሰ ይኸይድ። ¹¹ኣብኡ ግሪኻዊ ወይ ኣይሁዳዊ፥ ግሩዝ ወይ ዘይግሩዝ፥ ኣረሜናዊ፥ እስኩታዊ፥ ባርያ ወይ ናፃ የለን፤ ክርስቶስ ደኣ ኵሉ እዩ፥ ኣብ ኵሉ ድማ ኣሎ።

¹²እምበኣር፥ ከም ሕሩያት ኣቦና፥ ቅዱሳንን ፍቑራትን፥ ርህራሄ ልቢ፥ ሕያዋይነት፥ ትሕትና፥ ህድኣት፥ ትዕግስቲ ተኸደኑ። ¹³ንሓድሕድኩም ተፃወሩ፤ ሓደ ኣብ ልዕሊ እቲ ሓደ ዝኾነ ቅርታ እንተ ኣለኩም ድማ ይቕረ ተበሃሃሉ። ከምቲ ጐይታ ይቕረ ዝበለኩም፥ ንስኻትኩምውን ይቕረ በሉ። ¹⁴ኣብ ልዕሊ እዝ ኵሉ ድማ፥ ነቲ ንዅሉ ብፍፁም ሓድነት ዝኣስር ፍቕሪ ተኸደኑ። ¹⁵ሰላም ክርስቶስ ኣብ ልብኹም ይንገስ፤ ናብኡ ኸዓ ከም ሓደ ኣካል ኮይንኩም ተፀዊዕኹም ኢኹም። ኣመስገንቲ ኩኑ። ¹⁶ቃል ክርስቶስ ብብዝሒ ኣባኻትኩም ይንበር፤ ብዅሉ ጥበብ ንሓድሕድኩም እናመሃርኩምን እናተመዓዓድኩምን፥ ብልብኹም ብምስጋና ንኣቦና መዝሙርን ዝማረን መንፈሳዊ ደርፍታትን ዘምሩ። ¹⁷ብቓል ኮነ ብግብሪ እትገብርዎ ኵሉ፥ ንኣቦና ብእኡ እናኣመስገንኩም፥ ብስም ጐይታ ኢየሱስ ግበርዎ።

ብፍቕሪ ዝተቐረፀ ቤተ ሰብ

¹⁸ኣትን ኣንስቲ፥ ከምቲ ብጐይታ ዝግባእ፥ ንሰብኡትክን ተገዛእአን።

¹⁹ኣቱም ሰብኡት፥ ነንስትኹም ኣፍቅሩ፤ ኣይትጨክኑወንውን።

²⁰ኣቱም ውሉድ፥ እዙይ ንጐይታ ባህ ዘብል እዩ እሞ፥ ንወለድኹም ብዅሉ ተኣዘዙ።

²¹ኣቱም ኣቦታት፥ ደቅኹም ተስፋ ከይቖርፁ፥ ኣይተቘጥዕዎም።

²²ኣቱም ባሮት፥ ነቶም ብስጋ ጐይቶትኩም ብዅሉ ተኣዘዙ፤ ሞገስ ክትረኽቡ ኢልኩም ኣብ ቅድሚ ዓይኒ ጥራሕ ዘይኮነስ፥ ንጐይታ እናፈራህኩም ብቕኑዕ ልቢ ተኣዘዙ። ²³እትገብርዎ ኵሉ፥ ንሰብ ዘይኮነስ፥ ንጐይታ ከም እትገብርዎ ጌርኩም፥ ብምሉእ ልብኹም ስርሑ። ²⁴ካብ ጐይታ ርስቲ ኸም ዓስቢ ኽትቕበሉ ኢኹም ኢልኩም ትፈልጡ ኢኹም እሞ፤ ንጐይታ ክርስቶስ ተገልግሉ ኢኹም። ²⁵እቲ ዓመፅ ዝገብር ኵሉ፥ እቲ ዝገበሮ ዓመፅ ናብኡ ክምለሰሉ እዩ፤ ኣድልዎ ድማ የለን።