Pwo eng' Che Sastaei Piik
Toi eng' piik che chomsanei itogusyekwak kochobchi sogornateet si konam mbareenik ak kooriik, yeityo koyai eng' mornet amu tinyei kimnateet. Komwachi Mika komanda amdaat. Mwaei Kwandanyo kole achopchi kora icheek yaityet, yeityo kole karun kochuril ariibwegap piik ko uu rewoot.
Ng'alaali Kwandanyo eng' mustarisyek 3–5, 12
2 1Pwo eng' che chopchi sogornateet ak che chobchi yaityet parak itogusyekwak! Eng' mornet, koyaei icheek; amu tinyei kimnateet si koyai. 2Yomegei mbareenik ak konam icheek, ak kooriik, ak koip. Kosastae chiito ak koonnyi, chiito ak porotennyi.
3Eng' nooto, mwaei anyun Kwandanyo kole: Ogeero, achopchi ooreetap chii ni yaityet, ne momuuchi ocherun kaatwegwong'; ak momuuchi oeeti metowegwong' parak, amu sait ne ya. 4Eng' peetuunooto, konam taunet agobo okweek ak koriirei eng' riirek ne po ng'wanindo, koleenji, “Kagome echeek koigeny! Kawale kebebertap piikyuk; ole koreegune eng' anee! Kochei mbareenikyo chiito ne lelachgei.” 5Eng' nooto, momi chii ne wiirtoe porowet eng' tuiyetap Kwandanyo. a a v5 Wiiretap porowet eng' kura ko ki oret ne kipchei piigap Israel emet eng' kooriik; ye kalet chii imanda ni, ko komongunjin chii koigeny eng' porotetap tuiyet.
Silemei Kwanda Maotik che po Lembech
6“Omemda!” koamdoi icheek. “Mamuuchi chii koamda tuguuk che uu chooto; ma ng'ang'dechi teweernateet echeek.”
7Tos nyolu kemwa ni, ooreetap Jakobo? Tos kichootyo Kabuusetap Kwandanyo? Tos poisyonikyik chu? Tos ma koonu ng'aleekyuk che myee kong' chii ne pendi eng' imanda?
8Ago koristo, kagong'eet lagoguk ko uu puunyoot. Ireegune ngoryeet ne korooron eng' che pendi eng' nyiganateet, ko uu murenik che weeksei kobun lugeet che ma machei lugeet. 9Otyachei kwonyiigap piikyuk eng' kooriikwak che karaaran; eng' lagokwak che mengech oistoi toroornatennyu koigeny. 10Ong'eetyee ak oba, amu ma ni olo kimuung'e; amu kagong'em, koonu maranoset— maranoset ne nyalili. 11Ngot komi chii ne sabei eng' lembech ne puch koamwachgei lembech, “Amdachinwok agobo koldeet ak komeek,” koek ineendet maotindet ne po pichu!
Yumei Kwanda Piikyik che Ng'et
12Ayum anyun okweek tugul iman, Jakobo; Ayumtai iman che ki ng'et che po Israel. Ainde icheek ko agenge, ko uu keechiirek eng' kaa, ko uu akwotisyek eng' kwenutap ole kiyage— olo ne oo kutit ne po piik.
13Chii ne yaatei ooreet koba parak eng' taitap icheek; koyaat ak kosiir kurgeet, kobunu oriit. Kobendi laitoryannywa andounennywa, ak komi Kwandanyo tai eng' icheek. b b v13 Chii ne tolei ooreet ko Jeso, ne andoi eng' taitap piikyik si kotol ooreet ne kebendi kaa ak kondoi icheek kobunu mang'atet age tugul—laitoryannywa, ak komi Kwandanyo metinywa.