Psalms 99

99 ¹ Our Papa dey reign; make all di people dey shake! E sidon for im throne on top di cherubim; make di earth shake! ² Our Papa great for Zion; dem lift am high pass all di people. ³ Make dem praise your name wey great and wey dey make person fear; E holy!

⁴ Di King wey get power well well love justice. You don establish fairness; You don bring justice and correct-and-holy way for Jacob. ⁵ Lift our Papa high; worship for where im leg dey rest! E holy!

⁶ Moses and Aaron dey among im priests, and Samuel dey among di people wey call im name. Dem call our Papa, and E answer dem. ⁷ For inside di pillar of cloud E talk to dem; dem keep im commands and di laws wey E give dem.

⁸ Our Papa, You answer dem; You be Papa wey dey forgive dem, but still You make dem answer for di bad wey dem do. ⁹ Lift our Papa high, and worship for im holy mountain; because our Papa holy!