Isaiah 54

54 ¹Nao mapharālakha nao kashumva̱, laa sālu; O naokhara̱ masamphangakha, laa sāphoklu, khamathānna vaolu! Kaja ngachakyang preiva̱wui naomayarabing chi agahara khalei preiva̱wui naomayarabingli lāngda kachungkha ngasāra, da ithumwui Avāna hānga.

²Nawui kachonshim haksangmilu, kala nawui pamkhavaiwui chonrānbing farora pākmiranu; kha mathāhaila. Nawui khara̱bing sānglak ngasakmilu kala nawui karhuibing pangshapta rungshingmilu, ³Kaja na khazaishongla khavuishongla farorra; nawui naomayarabingna miyurbingli shimlui khuira kala ngachakyang keinungbingli mi okthuiluishitser ngasakra. ⁴Mangacheealu, kaja na mamaishimara; ningla masuitāhaialu, kaja na pa̱ngapā ngasakmara. Nawui nganuilakhawui maikashi na malaihaora kala nawui ra̱mei kapamwui maikashi ara maphaningungmara. ⁵Kaja nawui Kasaana nawui gaharana; saikorawui Avā chi awui mingna; Israelwui Katharana nawui Ngatangkhamena, okathui huptawui ithumwui Avā da hohaira. ^a a v5 Ithumwui Avāna awui mibingli kadhara leikashi eina akhalatta khanghuiya — hi ngakum apong Paulna kaphungthili Khrista kala awui Preiva̱li ngasokapam sai (Ephesians 5:25-27). ⁶Kaja horhai kala ning katheng preiva̱ chithāda, a horhaida atamli nganuilakhawui preiva̱ chithāda, ithumwui Avāna nali hokhuiluihaira, da nathumwui Avāna hānga.

⁷Kasha̱nakhawui vang ina nali horhaira, kha lukhamashan pemting kayākha eina ina nali kazipkhuira. ⁸Malungvāt kaphong tharan hunkhawui vang ina imai nawui eina thumhaira, kha katang makhavai lukhamashan eina ina nali lumashanmira, da ithumwui Avā, nawui Ngatangkhamena hānga. ⁹Ili hi Noahwui atam kathāna; chithang ina Noahwui tara̱ okathuili ara maphongluimara da ngashit sai; chithākha ara ina nali malungvāta khavai lah nali kaharmi khavai maleila da ngashithaira. ¹⁰Phungreibing tāthuihailala kala kaphungbing nganuklala, iwui lukhamashan nawui eina mapākthuimara, kala iwui chingri kahaiwui tuingashit manganukmara, da nali lukhamashan pemtinghai ithumwui Avāna hānga. ¹¹"O kachota, surna phanung-phanvāda kala ringpha makhaleia, yanglu: ina nawui lungguibing antimony eina rungshing kala nawui shimphungabing sapphire eina sakāra. ^b b v11 Antimony chiya achālakhawui sākāsakli aman kasaka ngalungbing tingda phongchithei khavai ngasokapam tangkhamang machu akhana, chibingli malingting ngasakna. ¹²Ina nawui dolanbing khamanaka aman kasak lung eina sāra, nawui ngaveibing malingting chāra̱-chāsān eina sāra, kala nawui phākho saikora aman kasak ngalung eina sāra. ¹³Nawui naomayarabing saikorali ithumwui Avāna tamchitheira, kala nawui naomayarabingwui chingri kahai hakmahāra. ^c c v13 Jishuna Avāna awuishong hokkhuiha mi saikorali phongchithei khavai hi tui chi ngahānkai (John 6:45). ¹⁴Na khamashung khangarong eina rungshinghairara; na rekakharek eina katāva̱li leira, kaja na ngachee khavai ot maleimara, kala khangachee eina katāva̱li leira, kaja china nali manganaimana. ¹⁵Kachikathāna nali nganang shokngasakakha, chi iwui eina rai maningmana; nali ngarar khipānakha nawui mangāli pitāra. ¹⁶Yanglu, meithā mahaila meiwon sākai mari kasā mili ina sākhuida kala awui ot khavai phāmei zeighai akha shungkhui; kala shimān ngasak khavai sākakathān ina sākhui." ¹⁷Nali khangahanda shungkhui zeighai akhala maungshungmara, kala bicharli nali khangahanda ngakarthuida tong kachiva̱li na khayon chitheishapra. Hi ithumwui Avāwui raobingwui shimlui china, kala athumwui athut hāngsangkhami iwui eina raina, da ithumwui Avāna hānga.