Tara̱li Rālu
Lupā makhalei mibingli ringkashi chi rāshunga: rāda aman maleila zālu kala manglu, ung makashungpā otli lupā mimilu. Ithumwui Avāwui kaphaning athumwui kaphaningli lāngda lāng, chiwui vang awui ngakaishitmi chi athumna kaphaning kahai lāngda khamasai. Awui tui, ra̱ thāda, khamasai eina mangareiungmana.
55 1"Nganālu! Nathum ra̱changbing saikora, tara̱li rālu; lupā makhalei nathum, rālu, kashakazā lolaga zalu! Rālu, aman makhalei, khamasai eina drakhāra̱ kala seina̱ lolu. 2Kashakazā maningla otli khisāda lupā mikhala, kala ung makashungpā otli nathumwui yāng khisāda mikhala? Ili ningsanglak eina nganālu, kala kaphā chi zalu, kala nathumwui manglāna angating kashaili ringphāra. 3Nathumwui khanā sholaga ili rālu; nganālu, chithāda nathumwui manglā ringra. Ina nathumli katang makhavai tuingashit akha sāra; chi David li ngashit kahai iwui makhangachei leikashina. a a v3 Paulna hi tui chi Acts 13:34li Jishu ringluishit kaji vang eina hāngkahai — ithumwui Avā David li katang makhavai kadhara chiya ringluishit kahai Khristali kupchanghaira. 4Yanglu, ina ali miyurbingwui vang shākhi, miyurbingwui kathāna kala raithāna sāda phāsanghaira. 5Nawui Avā, Israelwui Kathara chiwui vang eina, kachangkhat eina nana na matheila yur akha hokhuira, kala nali matheila yur akhana nawui pāngli ngakhuizatta rāra; kaja ana nali tekmatei ngasakhaira."
6Ithumwui Avāli ana samphangki atamli phālu; ana nganai atamli ali ngakaolu. 7Makhayā mina awui apong horhairanu, kala makhamashunga mina awui kaphaning horhairanu; Ithumwui Avāli latungranu, kala ithumwui Avāna ali lukhamashana pemtinghaira; Ithumwui Avāli ngareiunglu, kaja ana sāngairereo eina pheomira.
8"Kaja iwui kaphaning nathumwui kaphaning maningmana, nathumwui apong iwui apong maningmana,' da ithumwui Avāna hānga. 9'Kaja kazingram okathuili juimei thāda, chithāda iwui apong nathumwui apongli juimei, kala iwui kaphaning nathumwui kaphaningli juimei.
10"Kaja zingrot kala horam kazingramwui eina tunglaga chili mangareiungmana, kha ngaleili tara̱ chaimida, chi heiun mikhavai kala phorkhavai ngasakda, khayaoali athā kala kashazābingli kashakazā khamila, 11chithāda ikhamorwui eina shokki iwui tui chila leira: chi ili khamasai eina mangareiungmana, kha ina kachāng chi ungshungmira, kala ina chi chihovā kahaiwui sākhangai chi ungshungmira. 12Nathum khamathān eina shokra, kala chingri kahai eina thānshokra; kaphung kala phungrā china nathumwui mangāli laa sāphokra, kala luiwui thingrong saikorana pāng kaphera. 13Ka̱shāt mahutle cypressthing phorra, kala phanāng mahutle myrtlething phorra. Hi ithumwui Avāwui ming vang, katang makhavai makaimara machut akha sāra.'"
