Ku Zo Wurin Ruwa
Gayyatar ta tafi ga mutanen da ba su da kuɗi: ku zo ku ci ku sha kyauta, ku daina biyan abin da ba ya ƙosarwa. Tunanin Ubanmu ya fi nasu tsayi, saboda haka gafararsa ta fi yadda suke tsammani sauƙi. Maganarsa, kamar ruwan sama, ba ta komawa wofi.
55 1“Ku saurara! Dukanku masu jin ƙishirwa, ku zo wurin ruwa; ku da ba ku da kuɗi, ku zo, ku sayi abinci ku ci! Ku zo, ku sayi ruwan inabi da madara ba tare da kuɗi ba—kyauta. 2Don me kuke kashe kuɗi a kan abin da ba gurasa ba, da aikinku a kan abin da ba ya ƙosarwa? Ku saurare ni da kyau, ku ci abin da yake da kyau, ranku kuma zai ji daɗi da mafi kyawun abinci. 3Ku kasa kunne ku zo wurina; ku saurara, domin ranku yă rayu. Zan yi madawwamin alkawari da ku, ƙaunata ta aminci da na yi wa Dawuda alkawari. a a v3 Bulus ya ambaci wannan ayar a Ayyukan Manzanni 13:34 game da tashin Yesu daga matattu — madawwamin alkawarin Ubanmu da Dawuda ya sami cikarsa cikin Almasihu wanda ya tashi daga matattu. 4Ga shi, na naɗa shi shaida ga mutane, shugaba kuma mai mulki a kan mutane. 5Lalle za ka kira wata al'umma da ba ka sani ba, wata al'umma kuma da ba ta san ka ba za ta ruga zuwa gare ka, saboda Ubanka, Mai Tsarki na Isra'ila, gama ya ɗaukaka ka.”
6Ku nemi Ubanmu tun ana iya samunsa; ku kira shi tun yana kusa. 7Bari mugu yă bar hanyarsa, mutum marar adalci kuma yă bar tunaninsa. Bari yă koma ga Ubanmu, zuciyar Ubanmu kuma za ta cika da jinƙai dominsa; ku koma ga Ubanmu, gama zai gafarta a yalwace.
8“Gama tunanina ba tunaninku ba ne, haka ma hanyoyinku ba hanyoyina ba ne,’ in ji Ubanmu. 9‘Gama kamar yadda sammai suke can sama fiye da ƙasa, haka hanyoyina suke can sama fiye da hanyoyinku, tunanina kuma fiye da tunaninku.
10“Gama kamar yadda ruwan sama da ƙanƙara suke saukowa daga sama ba sa kuma komawa can, sai dai su shayar da ƙasa, su sa ta tsiro ta kuma haifar, su ba mai shuka iri da masu ci gurasa, 11haka maganata take wadda take fitowa daga bakina: ba za ta komo mini a banza ba, sai dai ta cika abin da nake so ta kuma kai ga manufar da na aiko ta. 12Za ku fita da farin ciki a kuma bi da ku da salama; duwatsu da tuddai za su ɓarke da waƙa a gabanku, dukan itatuwan jeji kuma za su tafa hannuwa. 13A maimakon itacen ƙaya itacen fir zai yi girma, a maimakon sarƙaƙƙiya kuma itacen mersin zai yi girma. Wannan zai zama abin ɗaukakar Ubanmu, madawwamiyar alama wadda ba za a yanke ba.’”