Isaiah 55

55 ¹“Ẹ gbọ́! Gbogbo ẹ̀yin tí òǹgbẹ ń gbẹ, ẹ wá sí omi; ẹ̀yin tí kò ní owó, ẹ wá, ẹ ra oúnjẹ kí ẹ sì jẹ! Ẹ wá, ẹ ra wáìnì àti wàrà láìsan owó kankan—ní ọ̀fẹ́. ²Èéṣe tí ẹ fi ń ná owó sí ohun tí kì í ṣe oúnjẹ, àti làálàá yín sí ohun tí kò lè tẹ́ ẹ lọ́rùn? Ẹ fi etí sílẹ̀ dáradára sí mi, kí ẹ sì jẹ ohun tí ó dára, ọkàn yín yóò sì yọ̀ nínú oúnjẹ tí ó dùn jùlọ. ³Ẹ fi etí yín sílẹ̀ kí ẹ sì wá sọ́dọ̀ mi; ẹ gbọ́, kí ọkàn yín lè yè. Èmi yóò dá májẹ̀mú ayérayé pẹ̀lú yín, ìfẹ́ mi olóòótọ́ tí mo ṣe ìlérí fún Dafidi. ^a a v3 Paulu fa ẹsẹ yìí yọ nínú Ìṣe 13:34 nípa àjíǹde Jesu—májẹ̀mú ayérayé Baba wa pẹ̀lú Dafidi rí ẹ̀kúnrẹ́rẹ́ ìmúṣẹ rẹ̀ nínú Kristi tí ó ti jíǹde. ⁴Ẹ wò ó, mo ti fi í ṣe ẹlẹ́rìí fún àwọn ènìyàn, olórí àti aláṣẹ fún àwọn ènìyàn. ⁵Nítòótọ́, ìwọ yóò pe orílẹ̀-èdè tí ìwọ kò mọ̀, orílẹ̀-èdè tí kò mọ̀ ọ́ yóò sì sáré wá sọ́dọ̀ rẹ, nítorí Baba rẹ, Ẹni Mímọ́ Israẹli, nítorí ó ti ṣe ọ́ lógo.”

⁶Ẹ wá Baba wa nígbà tí a lè rí i; ẹ ké pè é nígbà tí ó wà ní tòsí. ⁷Kí ẹni búburú kọ ọ̀nà rẹ̀ sílẹ̀, àti kí ènìyàn aláìṣòdodo kọ èrò rẹ̀ sílẹ̀. Kí ó padà sọ́dọ̀ Baba wa, ọkàn Baba wa yóò sì kún fún àánú fún un; ẹ padà sọ́dọ̀ Baba wa, nítorí yóò dárí jì í lọ́pọ̀lọ́pọ̀.

⁸“Nítorí èrò mi kì í ṣe èrò yín, bẹ́ẹ̀ ni ọ̀nà yín kì í ṣe ọ̀nà mi,’ ni Baba wa wí. ⁹‘Nítorí bí ọ̀run ti ga ju ayé lọ, bẹ́ẹ̀ ni ọ̀nà mi ga ju ọ̀nà yín lọ, àti èrò mi ju èrò yín lọ.

¹⁰“Nítorí bí òjò àti yìnyín ti ń sọ̀kalẹ̀ láti ọ̀run tí wọn kì í sì í padà síbẹ̀, ṣùgbọ́n tí wọ́n ń bomi rin ilẹ̀, tí wọ́n ń mú un so èso, kí ó sì rúwé, tí ń fún afúnrúgbìn ní irúgbìn àti oúnjẹ fún àwọn tí ń jẹun, ¹¹bẹ́ẹ̀ ni ọ̀rọ̀ mi tí ó ti ẹnu mi jáde yóò rí: kì yóò padà sọ́dọ̀ mi ní òfo, ṣùgbọ́n yóò ṣe ohun tí mo fẹ́, yóò sì ṣàṣeyọrí ìdí tí mo fi rán an. ¹²Ẹ̀yin yóò jáde lọ pẹ̀lú ayọ̀, a ó sì fi àlàáfíà darí yín jáde; àwọn òkè ńlá àti àwọn òkè kéékèèké yóò bú sí orin níwájú yín, gbogbo igi igbó yóò sì pàtẹ́wọ́. ¹³Dípò igi ẹ̀gún, igi sípírẹ́ṣì ni yóò hù, dípò igi ọ̀gàn, igi mírítì ni yóò hù. Èyí yóò wà fún òkìkí Baba wa, àmì ayérayé tí a kì yóò gé kúrò.’”