Yimbila, Ngeyi Wakala Kisita
Mukhetu wa kisita, wuna wayambulwa, yizimbulwa ni yayimbila amana yiyalumuna sombolu yandi ya mbuta. Tata wetu kahimbaku ni wásweka luse lwandi, kaka ni byalungila koma ka tangwa; myongu mikatuka, kaasi lungongu lwandi lwa kwikama lukatukaku. Bibaka byandi bitungululu ni matadi ma ntalu, amana bana bandi balongwa ni yandi.
Tata wetu kisi zonza mu mavese 7–17
54 1Yimbila, ngeyi mukhetu kisita, wakonda buta mwana; zatuka mu kuyimbila amana sika mu kyesi, ngeyi wuna wakonda yuka misongu mya kubuta! Mukuma bana ba mukhetu wuna bálosila bakahitakani kuluta bana ba mukhetu wuna wenina yi yakala, kazimbudini Tata wetu.
2Yalumuna sombolu yaku, amana miledi mya nzu yaku miyalumuka; kukengaku. Lengidika misinga myaku amana simba miti myaku mumbulu-mbulu, 3mukuma wayálumuka ku koku dya kitata yi ku koku dya lumonso; bana baku bakála yi nati amana bakazingisa mbanza zina zakituka zumbu. 4Kubangaku, mukuma kufwaku tsoni; kukondaku kikesa, mukuma kulewukaku. Wazímbakana tsoni ya kileki kyaku amana kutebukaku hika kulewuka kwa kifwilu kyaku. 5Mukuma Muhangi waku i yakala dyaku—Tata mukwa ngolu zoosu i zina dyandi; Watoma wa Kiseledi i Muhuludi waku, amana bisi mutela Tata wa tsi yosu. a a v5 Tata wetu kisi kudikanga kwena batu bandi mu lungongu lwa bulunda — mfwanusu wa longo wuna Pholu kalánda sadila kwena Kidisitu yi Mukwela wandi (Efeso 5:25-27). 6Mukuma Tata wetu wákutela ngeyi wavutuka, nana mukhetu wuna báyambula amana wuna wena yi mbundu yabúdika, nana mukhetu wa kileki tangwa báyambula, kazimbudini Tata waku.
7Mukuma mu koma ka tangwa yíkusisa, kaasi mu kyadi kineni yivútula ngeyi. 8Mu kithombu kya khabu yísweka luse lwama kwena ngeyi mu koma ka tangwa, kaasi mu lungongu lwa mvula yi mvula yikuyukila kyadi, kazimbudini Tata wetu, Muhuludi waku. 9Kwena meni, kyaki kifwanakani yi bilumbu bya Nowa, tangwa yidya ndefi ni mamba ma Nowa makazalukaku hika hana tsi; bwabuna buthwena yidya ndefi ni yikakálaku yi khabu kwena ngeyi, amana yikakulolulaku. 10Ho ni myongu mikatuka amana mina mya khunda miningana, lungongu lwama lwa kyedika lukakatukaku kwena ngeyi, amana bulunda bwama bwa ngemba bukaníngana ku, kazimbudini Tata wetu, wuna kisi kumonina kyadi. 11«Ngeyi wena mu munyanga, wuna pfunzi yisi hungudima amana wukondi wa kusyamisa, tala: yitula matadi maku mu antimoni amana yítunga mipfundila myaku mu matadi ma safili. b b v11 Antimoni: i mbombo ya ndombi yina yisi tukila mu mafu, yina batu ba thama basadila mu kutunga, mu kusimika yi kumonisa matadi ma thalu, hanga malezima. 12Yikítwala minolo myaku mu matadi ma lubi, mwelu myaku mu matadi malezima, amana bibaka byaku byosu mu matadi ma thalu. 13Bana baku boosu bakalongwa kwena Tata wetu, amana ngemba ya bana baku yikála yineni. c c v13 Yesu wátanga vese dyadi mu kusonga batu boosu bana Tata kisi nata kwena yandi (Yowani 6:45). 14Mu masonga wasikila; wakála thama yi kunyokuka, mukuma konda kima kya kubanga, amana thama yi bweya, mukuma bukakubwesukaku. 15Yuka ni mutu kaheka kiphala kwena ngeyi, kutukaku kwena meni; wuna wisi kunwanina yi ngeyi, kabwa ku thwala yaku. 16Tala, i meni yíhanga ntudi wuna kisi vemuna makala ma mbawu hanga malema muleku wa mbawu amana kisi yidika kinwaninu kina kifwanini mu kisalu kyandi; amana i meni yíhanga muzangi hanga kazanga.» 17Ka kinwaninu kimosi ku kina bayidika mu kukunwanina kikalaku yi ngolu, amana walúmuna ndinga zoosu zina zikufundila mu pfundusu. Kuku kwenina kuvwa kwa basadi ba Tata wetu, amana masonga ma bawu matukini kwena meni, kazimbudini Tata wetu.
