Chia Lauashi, Shaangla Angkong Kibü
Shousi abukbü, apyoan kijinei yaksa to laukei: chia lauan yaangbü neichem yaakashi. Seneibü Bouei haoeibü thenyek huan phobü atehütko, lausikei longche ongkei dogo laukei; shongh shuong danbü shongko haoeibü üeisanou adanlabü. Saoeibü kümthang shuong shikmei maibüei jiktikulabü, hoba saoeibü shousi shuong haoei leilutikulabü.
54 1Chia lauashi, shousi abukbü angkong sao; chia atko olinko ngekashi, nabukshat ahaptibü no! Aishanga lao akibü sao shousi shuong kho lao kibü sao shousi shuong tokei juong kilabü, dogo seneibü Bouei lauda.
2Kaibü neichem yaangtiashi, hoba kaibü kishang thangtet nei seengan shailangkushi; tethakti. Kaibü lüh shuong lengashi hoba kaibü anjin shuong haua jinashi, 3Aishanga nyi maenei hoba lubüei to shailangkulabü; kaibü shousi shuongei phangshuong lelabü hoba sangliphang sangnyu shuong sangngaitilabü. 4Tehüt, aishanga nyi himouko akilabü; temok, aishanga nyi the alenenko akilabü. Nyi kaibü mütaodangbü himou maalabü hoba kaibü latnyu kijineibü himou ladangkei adamenlabü. 5Aishanga kaibü yaübou kho kaibü lao ki—lakjaibü dan Bou haoeibü nyen ki; Israelbü Saopobü kho kaibü Khümenbou ki, haoei kaodak pendoueibü Bou dogo nyenkuda. a a v5 Seneibü Bouei haoeibü mütli to üeisanouei hao lolo himlepkuda—habü leiyetbü meten kho Paulei toukei Khrista hoba haoeibü yak to loushedkei (Ephesians 5:25-27). 6Aishanga seneibü Bouei nyi apyoan hoba maang shatbü yak tegü, apyoan kijinei mütaodangbü yak tegü, nyi nyibou ngaankei, dogo kaibü Bouei lauda.
7Aishanga longche ongkei ngei nyi apyokei, lausikei yaang onouei ngei nyi nyibou yoshaitikulabü. 8Aeibou angea longche ong ngei kü the nyi ka hukei, lausikei ponpen thon akibü sanouei ngei nyi onoulabü, dogo kaibü Khümenbou seneibü Bouei lauda. 9Ho kü shanga Noa chalou tegü ki, ladang ngei Noa deiei nyibou kaodak to adanglepkulabü dogo theyolanyoa; kho tegü touje ngei nyi khulimbo akhauanglabü hoba nyi ahaklabü dogo theyolanyoa. 10Shongh shuong bangjung satasikei hoba shongh nyaksinam shaknyinasikei, ngeibü üeisanou kho nyi ka bangjung asatlabü, hoba ngeibü sangmai theyolanyobü ashaknyinlabü, dogo nyi onoubü seneibü Bouei lauda. 11“O khonkutibü, ngokan shouentibü hoba hakso akibü, chühashi: ngei nakthühbü laangei kaibü laang shuong sengan jinkulabü hoba kaibü denshang namsek laangei sengan phokulabü. b b v11 Nakthübü laang: shangiedbü dang kümsilea namsek laang shuong sengan jinla hoba louyentila shanga lamshaubü nakthübü laang che ki. 12Ngei kaibü thükenbü laangshong nakthüngbü namsek laangei kümlabü, kaibü bakou shuong louyenbü namsek laangei, hoba kaibü laangshong ba pendou namsek laangei kümlabü. 13Kaibü shousi shuong pendou seneibü Bouei lentilabü, hoba kaibü shousi shuongeibü sangmai yaang kilabü. c c v13 Bouei hao jungto thakbü müt pendou shangabü lenla shanga Jisuei ho ngüh louan lenkei (John 6:45). 14Saopobüa nyi yaangko yaülabü; nyi khonkutibü ka saabü kilabü, aishanga nyi hatla aikei akilabü, hoba hatbümok ka saabü kilabü, aishanga kho nyi jungto anyanglabü. 15Ao cheei nyi khulimbo oyophetyobü shouentialonga, kho kü ka longbü aying; aoei nyi to thüklaje, hao nyi thedanga tuonglabü. 16Chühashi, wankak kümbou, aoei julo souan wankak longtida hoba haoeibü kümsileia takbü wapyobü peisilei kümda, kho ngei yaükei; hoba mautila shemtibou kho ngei yaükei.” 17Ka thükto kümbü in che ongkei thük ühüplabü, hoba matjembou thedanga ka thükto longbü tongde pendou to no shedsikhau dogo ngetilabü. Ho kho seneibü Bou khangenbü shuongeibü phet ki, hoba haoeneibü saopobü kho kü ka longbü ki, dogo seneibü Bouei lauda.
