Ming Eina Hokakhui Them Kathembing
Bezalelli awui aming hokhuida Manglā chipemmihaira — ning, aworkathemla kala ot sākathei — Oholiab ali ngasoda, kala mikhangai sākashapa mi kachiva̱wui wuklungli sākathei mihaira. Chiwui thili Sabbath chi tuingashit hiwui khudam sāda mi. Ithumwui Avāna awui pāngmareng eina kapisang kahai lungphek chi Mosesli mihaowa.
31 1Ithumwui Avāna Mosesli hānga,
2"Yanglu, ina Judah shangwui Hurwui ara̱, Uriwui naomayara aming Bezalel ho hokhuihaira, 3kala ali iwui Manglā chipemmihaida, thangkhameila, sākashapla, awor kathemla, ot sākathei saikorala, 4sinā, lupāsā, kala pithrai pāngthemwui otsak sākhavai, 5ruksang khavai ngalung kashanla, kala thingli chankasang, them otsak saikora sākhavaina. 6Ina khalattana Dan shangwui Ahisamachwui naomayara Oholiabli awui ngasoda ot sākhavai chipamhaira. Ina nali kaso kahai saikora chi athumna sākhavai, sākathei mi kachiva̱wui ningli ina thangkhamei sangmihaira. 7kazip khavai kachonshim, ningkhami oko, chiwuitungli khalei lukhamashan pamkhong, kala kachonshimwui thongthāng saikora, 8table eina chiwui khorkhongbing, sinā eina kasā thaomeishong eina chiwui khorkhongbing saikora, kala nganamkaphā thaowui hanphut; 9rikkatā kachigatwui hanphut kala chiwui khorkhongbing saikora, kala khongsai eina chiwui rungkhavai apheila; 10themlāk eina sākakhui sāribing, pāngmon Aaronwui kathara sāribing, kala awui anaomayarabingwui pāngmon otram ngatha̱ khavai sāribing, 11kala neokhavai thao, kala katharapamwui vang nganamkaphā thao, ina nali kaso kahai tākam eina athumna sāra."
Machut Kahai Sāda Mikahai Sabbath
12Kala ithumwui Avāna Mosesli hānga,
13"Na khalattana Israelnaobingli hānglu: Ot saikorawui tungli, iwui sabbathbing mayonchingra. I nathumwui Avāna nathumli tharchigatmi kahaina da nathumna thei khavai, hi thot-thot vāshungda i eina nathumwui ngachaili machut akhana. a a v13 Ithumwui Avāna Sabbath chi machut akha sāda khami: awui mibingli kathara sāda ngayarme chi awuina, athum khalattawui otsak eina maningmana. 14Sabbath mayonlu, kaja hi nathumwui vang katharana. Chi makhao khangasaka a chi kachangkhata shaothatra; chithang ot kasā a chi awui miyurwui eina katathaora. 15Tharukthang ot sāra, kha kashinethang chi chingri kahai ngasāmkakhui sabbathna, kala iwui vang katharana. Sabbaththang ot kasā a chi kachangkhata shaothatra. 16Israelnaobingna Sabbath mayonra, thot-thot vāshungda Sabbath chi katang makhavai tuingashit akha sāda mayonchingra. 17Hi i eina Israelnaobingwui ngachaili katang makhavai machut akhana: tharukthangwui alungli ina kazingram kala okathui sai; kashinethang ina ngasāmkhuida ining ringphā ngasaka."
18Ana Sinai Kaphungli Mosesli ngazekkhui kahaiwui thili, ithumwui Avāwui pāng mareng eina kapi kahai ningkhamiwui lungphek khani chi ali mihaowa.
