Bantu ya Ndwenga Yina Ba Bokilaka na Nkumbu
Tata ya beto ke bokila Besalele na nkumbu mpe ke fulusa yandi na Mpeve—ndwenga, mayela, mpe ngangu ya kusala bisalu—kintwadi na Owolyabe, mpe ndwenga yina yandi me tula na ntima ya konso muntu ya ngangu yina ke zola. Na manima, Kilumbu ya Kupema ke pesama bonso kidimbu ya ngwisani yayi. Tata ya beto ke pesa Moyize matadi yina yandi mosi sonikaka na diboko ya yandi.
Tata ya beto ke zonza na bavese 2–11, 13–17
31 1Tata ya beto tubaka na Moyize:
2«Tala! Mu me bokila na nkumbu Besalele, mwana ya Uli, mutekolo ya Wule, yina kele muntu ya kifumba ya Yuda, 3Mpe mu me fulusa yandi na Mpeve ya munu, samu ti yandi kuvwanda na ndwenga mpe mayela, na luzabu, mpe na ngangu ya kusala bisalu ya konso mutindu, 4samu na kuyidika bima ya kitoko, kusala na wolo, na palata, mpe na kisengo ya mbwaki, 5kupasula matadi samu na kutula yawu, mpe kufikula mabaya, samu na kusala bisalu ya mutindu na mutindu nyonso. 6Mu mosi me soola Owolyabe, mwana ya Ayisamake, yina kele muntu ya kifumba ya Dane, samu na kusala kintwadi na yandi. Mu me tula ndwenga na ntima ya bantu nyonso yina ke zaba kusala bisalu, samu ti bawu lenda sala bima nyonso yina mu me tumisa nge: 7Yinzo ya Mbwabanu, sanduku ya kimbangi, kitapu ya mulemvo yina kele na zulu ya yawu, mpe bima nyonso ya Yinzo, 8mesa na bisalulu ya yawu, kitentokolo ya minda ya wolo ya mbote na bima ya yawu nyonso, mpe kiyokolo samu na kuyoka maaka ya nsunga; 9kiyokolo ya minkayulu, kumosi na bisalulu ya yawu nyonso, mpe ndonga ya nene ya maza, kumosi na kivwandulu ya yawu; 10binkuti ya ba tungaka, binkuti ya longo ya Aloni nganga-Nzambi, mpe binkuti ya bana ya yandi samu na kisalu ya bunganga-Nzambi, 11mpe mafuta ya mbyekolo, mpe maaka ya nsunga ya mbote samu na kisika ya longo. Bawu fwana kusala yawu kaka mutindu mu me tumisa nge.»
Kilumbu ya Saba Mutindu Kidimbu
12Tata ya beto tubaka dyaka na Moyize:
13«Nge mosi tuba na bana ya Isayeli: Kuluta mambu nyonso, beno zitisa basaba ya munu. Yawu kele kidimbu na kati ya munu na beno, na bambandu nyonso ya beno, samu ti beno zaba ti mu, Tata ya beno, mu ke kumisa beno longo. a a v13 Tata ya beto ke pesa kilumbu ya Saba mutindu kidimbu ti yandi, kasi ngolo ya bawu mosi ve, ke tula bantu ya yandi na mpambu mutindu bantu ya longo. 14Beno zitisa kilumbu ya Saba, samu ti yawu kele ya longo samu na beno. Konso muntu yina ke safula yawu, ba fwana kufwa yandi kibeni; konso muntu yina ke sala kisalu na kilumbu yina, ba fwana kukatula yandi na lutangu ya bantu ya yandi. 15Na bilumbu sambanu, bawu lenda sala kisalu, kasi kilumbu ya nsambwadi kele kilumbu ya Saba ya kupema ya muvimba, ya longo samu na munu. Konso muntu yina ke sala kisalu na kilumbu ya Saba, ba fwana kufwa yandi kibeni. 16Bana ya Isayeli fwana kuzitisa kilumbu ya Saba, kuzitisa Saba na bambandu nyonso ya bawu mutindu ngwisani ya bantangu nyonso. 17Yawu kele kidimbu na kati ya munu na bana ya Isayeli bantangu nyonso: na bilumbu sambanu mu yidikaka zulu na ntoto; na kilumbu ya nsambwadi mu pemaka, mpe mu zwaka dyaka ngolo.»
18Ntangu yandi manisaka na kuzonza na Moyize na mongo ya Sinayi, yandi pesaka Moyize matadi zole ya kimbangi, matadi yina Tata ya beto sonikaka na musapi ya yandi.