Abanyabukorikori Bahamagawe mu Izina

Besalēli ahamagawe mu izina, akuzuzwamo Mwuka—ubwenge, ubushishozi n'ubukorikori—Oholiyabu ari iruhande rwe, kandi ubuhanga bushyizwe mu mutima wa buri munyabukorikori witeguye. Hanyuma isabato itangwa nk'ikimenyetso cy'iri sezerano. Data wa twese aha Musa ibisate byanditswe n'urutoki rwe.

Igice cya 31.

Data wa twese abwira Musa ati:

“Dore nahamagaye mu izina Besalēli mwene Uri, wo mu muryango wa Yuda, akaba umwuzukuru wa Huri, kandi namwujujemo Mwuka wanjye, ubwenge n'ubushishozi n'ubumenyi n'ubukorikori bwose, kugira ngo akore ibishushanyombonera byiza, no gucura izahabu n'ifeza n'umuringa, no kubāza amabuye yo gutāka, no kubāza ibiti, kugira ngo akore ubwoko bwose bw'imyuga y'ubukorikori. Nanjye ubwanjye nahaye Oholiyabu wo mu muryango wa Dani, mwene Ahisamaki, umurimo wo gukorana na we. Kandi nashyize ubwenge mu mutima wa buri munyabukorikori w'umuhanga, kugira ngo bakore ibyo nagutegetse byose. Ihema ry'ibonaniro, n'Isanduku y'Ubuhamya, n'igipfundikizo cyo guhongerera kiri hejuru yayo, n'ibikoresho byose by'Ihema, n'ameza n'ibikoresho byayo, n'igitereko cy'izahabu inoze n'ibikoresho byacyo byose, n'igicaniro cy'imibavu; n'urutambiro rw'ibitambo byoswa n'ibikoresho byarwo byose, n'igikarabiro n'igitereko cyacyo; n'imyambaro iboshywe, n'imyambaro yera ya Aroni umutambyi, n'imyambaro y'abahungu be yo gukora umurimo w'ubutambyi, n'amavuta yo gusīga, n'imibavu ihumura neza yo mu Ahera—bazabikore byose nk'uko nagutegetse.”

Isabato Itanzwe nk'Ikimenyetso

Nuko Data wa twese abwira Musa ati:

“Wowe ubwawe bwira Abisiraheli uti: Mbere ya byose, mujye mwubahiriza isabato zanjye, kuko ari ikimenyetso hagati yanjye namwe uko ibihe biha ibindi, kugira ngo mumenye ko ndi jye So ubagira abera. ^a Mujye mwubahiriza isabato, kuko ari iyera kuri mwe. Uwayihumanya azicwe rwose; kandi umuntu wese uzakora umurimo kuri yo azacibwe mu bwoko bwe. Iminsi itandatu hakorwa imirimo, ariko umunsi wa karindwi ni isabato yo kuruhuka burundu, iyera kuri jye. Umuntu wese ukora umurimo ku munsi w'isabato azicwe rwose. Abisiraheli bajye bubahiriza isabato, bazubahirize mu bisekuruza byabo byose nk'Isezerano ridakuka. Ni ikimenyetso iteka ryose hagati yanjye na bo Abisiraheli, kuko naremye ijuru n'isi mu minsi itandatu, naho ku wa karindwi naruhutse ndahumeka.”

Amaze kuvugana na Musa ku musozi wa Sinayi, amuha ibisate bibiri by'Ubuhamya, ibisate by'amabuye, byanditsweho n'urutoki rwa Data wa twese.