ዘፀአት 31

31 ¹አባታችን ሙሴን እንዲህ አለው፦

²“እነሆ፣ ከይሁዳ ነገድ የሆነውን፣ የሑር ልጅ የዑሪን ልጅ ባስልኤልን በስም ጠርቼዋለሁ፤ ³በመንፈሴ፣ በጥበብ፣ በማስተዋል፣ በዕውቀትና በማናቸውም ዐይነት ጥበባዊ ሥራ ሞልቼዋለሁ፤ ⁴የተዋቡ ንድፎችን ይነድፍ ዘንድ፣ በወርቅ፣ በብርና በናስ ይሠራ ዘንድ፣ ⁵ለማስቀመጥ የሚሆኑ ድንጋዮችን ይፈልፍል ዘንድ፣ እንጨትም ይቀርጽ ዘንድ፣ በማናቸውም ዐይነት ሙያ ይሠራ ዘንድ ነው። ⁶ከእርሱም ጋራ ይሠራ ዘንድ ከዳን ነገድ የሆነውን የአሂሳማክን ልጅ ኤልያብን እኔ ራሴ ሾሜዋለሁ። ያዘዝሁህን ሁሉ ይሠሩ ዘንድ፣ በሙያ ለተካኑ ባለሙያዎች ሁሉ ልብ ጥበብን አኑሬአለሁ። ⁷የመገናኛውን ድንኳን፣ የምስክሩን ታቦት፣ በላዩ ያለውን የማስተስረያ መክደኛ፣ የድንኳኑንም ዕቃዎች ሁሉ፣ ⁸ማዕዱንና ዕቃዎቹን፣ ንጹሑን መቅረዝ ከነዕቃዎቹ ሁሉ፣ የዕጣኑንም መሠውያ፤ ⁹የሚቃጠለውን መሥዋዕት መሠውያ ከነዕቃዎቹ ሁሉ፣ የመታጠቢያውንም ሰን ከነማስቀመጫው፤ ¹⁰የተጠለፉትን ልብሶች፣ ለካህኑ ለአሮን የሚሆኑ የተቀደሱ ልብሶችን፣ ለክህነት አገልግሎትም የልጆቹን ልብሶች፣ ¹¹የቅብዐ ዘይቱንም፣ ለቅድስቲቱ ስፍራ የሚሆነውን ጥሩ መዐዛ ያለውን ዕጣን ጭምር ያዘዝሁህን በትክክል አድርገው ይሥሩ።”

ሰንበት እንደ ምልክት ተሰጠ

¹²ከዚያም አባታችን ሙሴን እንዲህ አለው፦

¹³“አንተ ራስህ ለእስራኤላውያን እንዲህ ብለህ ተናገር፦ ከሁሉ በፊት ሰንበቶቼን ጠብቁ፤ ይህም እኔ አባታችሁ እንደምቀድሳችሁ ታውቁ ዘንድ፣ በእኔና በእናንተ መካከል ከትውልድ እስከ ትውልድ ምልክት ነውና። ^a a v13 አባታችን ሕዝቡን ለቅድስና የሚለየው በራሳቸው ጥረት ሳይሆን በእርሱ እንደ ሆነ ለማሳየት ሰንበትን እንደ ምልክት ይሰጣል። ¹⁴ሰንበትን ጠብቁ፤ ለእናንተ የተቀደሰ ነውና። የሚያረክሰው ሁሉ ፈጽሞ ይገደል፤ በዚያ ቀን ሥራ የሚሠራ ሁሉ ከወገኖቹ መካከል ይጥፋ። ¹⁵ለስድስት ቀን ሥራ ይሠራል፤ ሰባተኛው ቀን ግን ፍጹም ዕረፍት የሆነ፣ ለእኔ የተቀደሰ ሰንበት ነው። በሰንበት ቀን ሥራ የሚሠራ ሁሉ ፈጽሞ ይገደል። ¹⁶እስራኤላውያን ሰንበትን ይጠብቁ፤ ሰንበትንም በየትውልዱ የዘላለም ኪዳን አድርገው ያክብሩ። ¹⁷ይህም በእኔና በእስራኤላውያን መካከል ለዘላለም ምልክት ነው፤ በስድስት ቀን ሰማይንና ምድርን ሠራሁ፤ በሰባተኛው ቀን ግን ዐረፍሁ፤ ታደስሁም።”

¹⁸በሲና ተራራ ላይ ከሙሴ ጋራ መነጋገሩን በፈጸመ ጊዜ፣ ሁለቱን የምስክር ጽላቶች፣ በአባታችን ጣት የተጻፉትን የድንጋይ ጽላቶች ሰጠው።