Nam loi kene Mata Kaam-Kora Manuh khan
Bezalel ke nam loi kene mate aru Atma pora bhori dii — buddhi, bujha-bujhi aru hunar — tai logot Oholiab ase, aru ichcha thaka sob kaam-kora manuh laga dil te hunar dii. Tar pichete Sabbath ke etu kosom laga chihna hisab te dii. Amar Pitri nijor anguli pora likhi diya pathor laga pat khan Moses ke dii.
31 1Amar Pitri pora Moses ke koise,
2“Sabi, Moi Yehuda jati laga, Hur laga nati, Uri laga chokra Bezalel ke nam loi kene matise, 3aru Moi tar ke Moi laga Atma pora, buddhi pora, bujha-bujhi pora, gyaan pora, aru sob kisim kaam kora hunar pora bhorta kori dise, 4sundur design khan bonabole, suna te, chandi te, aru pitol te kaam koribole, 5lagai dibole pathor kata te aru khosta khundi kaam kora te, sob kisim laga kaam koribole. 6Moi nijor pora tar logote kaam koribole, Dan jati laga, Ahisamach laga chokra Oholiab ke basi loise. Aru Moi sob hunar thaka kaam-kora manuh laga mon te buddhi dise, titia tarkhan Moi tumi ke hukum diya sob bonabo pare. 7Mili-thaka tombu, gawahi laga sinduk, tar uporte thaka maph kora dhakna, aru tombu laga sob saman khan, 8mez aru tar saman khan, sapha deepdani tar sob saman logote, aru dhup laga bedi; 9jola-boli laga bedi tar sob saman logote, aru basin tar theng logote; 10buna kapra khan, purohit Aaron laga pobitro kapra khan, aru purohit kaam karne tar chokra khan laga kapra khan, 11aru abhishek laga tel, aru pobitro jaga karne sugandhi dhup—Moi tumi ke hukum diya nisina he tarkhan eitu khan bonabo lage.”
Chihna Nisina Diya Bisram Din
12Titia amar Pitri pora Moses ke koise,
13“Tumi nijor pora Israel manuh khan ke kobi: Sob pora age, Moi laga Bisram din khan mani rakhibi—eitu Moi aru tumikhan majot te, jug-jug tak, ekta chihna ase, titia tumikhan janibo je Moi, tumar Pitri pora, tumikhan ke pobitro kore. a a v13 Amar Pitri pora Bisram din tu eitu chihna nisina diye je Tai, tarkhan nijor kaam nohoi, Tar manuh khan ke pobitro kori kene alag rakhe. 14Bisram din mani rakhibi—eitu tumikhan karne pobitro ase. Kun manuh eitu ke apobitro kore, tar ke nishchoi morai dibo lage; kun manuh hei din te kaam kore, tar ke tar manuh khan majot pora kati phelabo. 15Choi din kaam koribo pare, kintu sat number din tu pura bisram laga Bisram din ase, Moi karne pobitro ase. Kun manuh Bisram din te kaam kore, tar ke nishchoi morai dibo lage. 16Israel manuh khan Bisram din mani rakhibo lage, hodai jug te Bisram din tu hodai thaka vachan hisaab te mani kene. 17Eitu Moi aru Israel manuh khan majot te hodai karne ekta chihna ase: choi din te Moi sorgo aru prithibi bonaise; sat number din te Moi bisram korise aru notun takot paise.”
18Jitia Tai Sinai Pohar te Moses logote kotha kora khotom korise, Tai tar ke duita gawahi laga takti, pathor laga takti, amar Pitri laga anguli pora likha, dise.