ብስም ዝተፀውዑ ጥበበኛታት
ባስልኤል ብስም ተፀዊዑ ብመንፈስ ተመልአ—ጥበብ፥ ምስትውዓል፥ ክእለትን—ኤልያብ ድማ ምስኡ ኾይኑ፥ ኣብ ልቢ ኵሎም ፍቓደኛታት ጥበበኛታት ክእለት ተውሃበ። ሽዑ ሰንበት ምልክት እዝ ኪዳን እዙይ ኮይና ተውሃበት። ኣቦና ኸዓ ብኣፃብዕቱ ዝተፅሓፈ ፅላት ንሙሴ ሃቦ።
31 1ኣቦና ንሙሴ ከምዙይ ኢሉ ተዛረቦ፦
2“እንሆ፥ ንባስልኤል ወዲ ኡሪ፥ ወዲ ሁር፥ ካብ ነገድ ይሁዳ ዝኾነ ብስም ፀዊዐዮ ኣለኹ፤ 3ብመንፈሰይ፥ ብጥበብ፥ ብምስትውዓል፥ ብፍልጠትን ብዅሉ ዓይነት ክእለትን ድማ መሊአዮ ኣለኹ፤ 4ብብልሓት ንምብልሓት፥ ብወርቅን ብብሩርን ብነሃስን ንምስራሕ፥ 5ዝዛነቕ ኣእማን ንምቕራፅን ዕንፀይቲ ንምፅራብን፥ ኵሉ ዓይነት ስራሕ ብልሓት ንምስራሕ እዩ። 6ኣነ ባዕለይ ድማ ንኤልያብ ወዲ ኣሂሳሚክ፥ ካብ ነገድ ዳን፥ ምስኡ ኽሰርሕ መደብክዎ። ከምቲ ዝኣዘዝኩኻ ዅሉ ምእንቲ ኽገብሩ ኸዓ፥ ኣብ ልቢ ኵሎም ጥበበኛታት ክኢላታት ጥበብ ሃብኩ፦ 7ነቲ መራኸቢ ድንኳን፥ ነቲ ታቦት ምስክር፥ ነቲ ኣብ ልዕሊኡ ዘሎ መኽደን መስተስረዪ፥ ኵሉ ኣቑሑ እቲ ድንኳንን፥ 8ነቲ ሰደቓን ኣቑሑኡን፥ ነቲ ፅሩይ ቐዋሚ ቐንዲል ምስ ኵሉ ኣቑሑኡ፥ ነቲ መሰውኢ ዕጣንን፥ 9ነቲ መሰውኢ ናይ ዝቃፀል መስዋእቲ ምስ ኵሉ ኣቑሑኡ፥ ነቲ ገበራን ኣጋሮኡን፥ 10ነቲ ዝተጠልፈ ኣልባሳት፥ ነቲ ናይ ካህን ኣሮን ቅዱሳት ኣልባሳት፥ ነቲ ደቁ ብኽህነት ዘገልግሉሉ ኣልባስን፥ 11ነቲ መቕብኢ ዘይትን ነቲ ንመቕደስ ዝኸውን ምዑዝ ዕጣንን ከዓ፥ ከምቲ ዝኣዘዝኩኻ ጌሮም ይስርሕዎ።”
ሰንበት ንምልክት ተውሃበት
12ኣቦና ድማ ንሙሴ ከምዙይ በሎ፦
13“ንስኻ ድማ ንደቂ እስራኤል ከምዙይ ኢልካ ተዛረቦም፦ ልዕሊ ዅሉ ሰናብተይ ሓልዉ፤ ኣነ ኣቦኻትኩም ከም ዘቕድሰኩም ምእንቲ ኽትፈልጡ፥ ኣብ መንጎይን መንጎኹምን ንውሉድ ወለዶኹም ምልክት እዩ። a a v13 ኣቦና ንሰንበት፥ ንሱ ደኣ እምበር ናይ ባዕሎም ፃዕሪ ዘይኮነ፥ ንህዝቡ ፈልዩ ከም ዘቕድሶ ዘርኢ ምልክት ገይሩ ይህብ። 14ንሰንበት ሓልውዋ፤ ንኣኻትኩም ቅድስቲ እያ እሞ። ንኣኣ ዘርከሰ ዅሉ ፈፂሙ ይቀተል፤ በታ መዓልቲ እቲኣ ዝሰርሕ ዅሉ ኸዓ ካብ ህዝቡ ይወገድ። 15ሽዱሽተ መዓልቲ ስራሕ ይስራሕ፤ እታ ሻውዐይቲ መዓልቲ ግና ንዓይ ቅድስቲ ዝኾነት ሰንበት ፍፁም ዕረፍቲ እያ። በታ መዓልቲ ሰንበት ዝሰርሕ ዅሉ ፈፂሙ ይቀተል። 16ደቂ እስራኤል ድማ ነታ ሰንበት ይሓልውዋ፤ ንውሉድ ወለዶኦም ናይ ዘለኣለም ኪዳን ገይሮም ይሓልውዋ። 17ኣብ መንጎይን ኣብ መንጎ ደቂ እስራኤልን ንዘለኣለም ምልክት እዩ፤ ኣነ ብሽዱሽተ መዓልቲ ሰማይን ምድርን ገበርኩ፤ በታ ሻውዐይቲ መዓልቲ ኸዓ ኣዕረፍኩ ተሓደስኩውን።”
18ኣብ ደብረ ሲና ምስ ሙሴ ተዛሪቡ ምስ ወድአ ኸዓ፥ እተን ብኣፃብዕ ኣቦና ዝተፅሓፋ ክልተ ፅላት ምስክር፥ ፅላት እምኒ ሃቦ።
