Shongzā 30

30 ¹"Nathumna nganamkaphā riktā khavai hanphut akha sākhuira; chi acaciathing eina sākhuira. ²Chi asān-aret ngaraichāda asān khuiningkha, aret khuiningkha, kala kajui khuining khani ngasāra; kala chiwui angajibing akha sāda sāshānra. ³Nana chiwui atung, arāpbing kuimareida, kala angajibingla sinā kachanga eina heirorlaga kuimareida sinā eina heiungra. ⁴Thingphān ruisangda chi ngava̱ khavai, nana chiwui akom azingli arāp khaniwui lakharipli sinākhui khani sākhuira. ⁵Nana thingphān acaciathing eina sākhuida sinā eina heirorra. ⁶Nana chi ningkhami oko changli khalei chonrān chiwui mangāli, ningkhamiwui atungli khalei lukhamashan pamkhong chiwui mangāli hailu; chili ina nali samphangra. ⁷Ngathor kachida, Aaronna thaomei shar tharan, chiwuitungli nganamkaphā thao riktāra. ⁸Aaronna ngazinshong thaomei shārkā tharan, chi riktāra. Hi nathumwui thot kachida iwui mangāli machatlakla nganamkaphā thaona. ⁹Chiwuitungli makathar nganamkaphā thao, rikkatā kachigat, lah tharāzāt kachigat machigatpaimana; chiwuitungli ra̱shak kachigat maheirorpaimana. ¹⁰Kumkhali khareshida Aaronna chiwui angajibing chili pheomira; kumkhali khareshida, pheokhami suihamchigatwui ashee eina, ana nathumwui thot kachida chiwui vang pheomira. Hi ili tharmathengmeikap kajena."

Mi Mashing Shānkhuiwui Ngatangman

¹¹Ithumwui Avāna Mosesli hānga,

¹²"Nana athumli shānkhui khavai Israelnaobingwui mashing shānkhui tharan, chi shānkhuiwui atamli mi kachiva̱na khalattawui mirinwui vang ili ngatangman mira, chithāda athumli shānkhui tharan athumwuitungli kazātkashi marātāmara. ¹³Shānkhui kahai mi kachiva̱na, kathara shimwui shekel aman athishurda, lupā shekel tangkhai ili khayang sāda mira. ¹⁴Zingkum maga̱ eina thuilaga shānkhui kahai mi saikorana, hi khayang chi ili mira. ¹⁵Nathumwui mirinwui vang pheomi khavai ili hi khayang chi mira tharan, kashānga chiya shekel tangkhai hiwui eina shimlui mamipaimana, kala kachāma chiya teomeida mamipaimana. ¹⁶Israelnaobingwui eina pheokhami lupā chi khuida, kazip khavai kachonshimwui otram khangatha̱li mihaolu. Hi Israelnaobingli iwui mangāli phaningung khavaina, nathumwui mirinwui vang pheomi khavaina."

Pithrai Khongsai

¹⁷Ithumwui Avāna Mosesli hānga,

¹⁸"Pheokhavai vang, pithraiwui khongsai kala chiwui pithraiwui rungkhavai aphei sālu. Chi kazip khavai kachonshim eina hanphut ngachaili haida tara̱ runghailu, ¹⁹chithāda sāda Aaron eina anaomayarabingna chi eina athumwui pāng eina phei pheora. ²⁰Kazip khavai kachonshimli kazang tharan, lah ili mei eina rikkatā kachigat sāda otram ngatha̱ khavai hanphutli rānganai tharan, athumna tara̱ eina pheora, thipaishina. ²¹Athumna athumwui pāng eina phei pheora, thipaishina. Hi Aaron eina awui naothot naothot eina tangda katang makhavai shiyanna."

Kathara Neokhavai Thao

²²ithumwui Avāna Mosesli hānga,

²³"Nganamkaphā ayur khamatataiya khuilu: myrrh ara̱ pound tharāda khani tangkhai, chiwui tangkhai, pound tharuk kala akhum matiwui akha, nganamkaphā sākom, kala nganamkaphā kashima ja̱hei pound tharuk kala akhum matiwui akha, ²⁴kala cassia pound tharāda khani tangkhai, kathara shimwui shekel aman athishurda, kala olive thao gallim akha khuilu. ²⁵Khangachā kasema mina kasā thāda manātlaga, chi kathara neokhavai thao sākhuilu; chi kathara neokhavai thao ngasāra. ²⁶Chi eina nana kazip khavai kachonshim eina ningkhami oko chi neomilu, ²⁷table eina chiwui khorkhongbing saikora, thaomeishong eina chiwui khorkhongbing, nganamkaphā thaowui hanphut, ²⁸rikkatā kachigatwui hanphut eina chiwui khorkhongbing saikora, kala khongsai eina chiwui rungkhavai aphei chila neomilu. ²⁹Athumli tharchigatlu, chithāda athum tharmathengmeikaphaora; chili sākaza̱ saikora kathara ngasāra. ³⁰Aaron eina anaomayarabingli thao neomilu; pāngmon sāda ili otram ngatha̱mi khavai athumli tharchigatlu. ³¹Israelnaobingli hānglu, 'Hi nathumwui naothot naothot eina tangda iwui kathara neokhavai thao ngasāra. ³²Hi mi khipākhawui phasāli maheirorpaimana, kala chiwui khangachā athishurda chi kathā akhala masākhuipaimana. Hi katharana; hi nathumwui vang katharana. ³³Chi kathā khamanāta mi, lah ayarwui mili kasanga mi chi awui mibingwui eina katathaora.'"

Kathara Nganamkaphā Thao

³⁴ithumwui Avāna Mosesli hānga, "Nganamkaphā ayur khuilu—stacte, onycha, kala galbanum—hi nganamkaphā ayur eina kashenga frankincense chi ngaraichāda, ^a a v34 Stacte, onycha, kala galbanum chi thuikahai atam Near Eastwui nganamkaphā thao khamanātabingli singkahai nganamkaphā thingwui ara̱bingna. ³⁵Kala chi nganamkaphā thao, thao kashungawui ot, machi kazanga, kachanga kala kathara eina sākhuira. ³⁶Chiwui teomeikha manaktak kahai runglaga, kazip khavai kachonshimli, chili ina nali samphangra, ningkhami oko mangāli teomeikha haira. Hi nathumwui vang tharmathengmeikap kaji ngasāchingra. ³⁷Hikathā nganamkaphā thao nathum khalattawui vang masākhuipaimana; hi nathumwui vang katharana, kaja hi iwuina. ³⁸Kachikathāna chiwui anganam ringphākhui khavai hikathā sāakha chi awui mibingwui eina katathaora."