Pha̱kaphayā Katonga kala Ning Ngarum
Thikashi sangaithei zawui kazatli mi kani eina kathum kachithei kathaya, kala kahai kazat kaji hi kakashung vaphungli ngaphangluiya. Chithuili kachangmakhai yuikhai kakhane: Israelna ngala kakhane kalumma, a chiwui achi awungara kathumli kakhane sazatluiya, sakor, shanao eina ngasen kachiva manungara ngasuiyang mashaluiya, kala hi yan hi a ngarongli kakhavai khuishiluiya kala a hingkhangachan pareiluiya.
17 1Nathumwui Avāli achuk khalei lah khangakhai-khangarai khalei mukvā nilala yao nilala machigatpaimara; chi nathumwui Avāli ningkakachai otna.
2Nathumwui Avāna nathumli mihai keinung akhanida, nathumwui ngachaili mayarnao nilala sha̱nao nilala akha, awui tuingashit kaida nathumwui Avāwui mikyanli makaphā ot kasā chi theihaiakha, 3kala khangatei varebingli otram ngatha̱da zimik, kachāng, lah kazingramwui ashangva̱ akhali khorumakha, chi ina makhami kahaina, 4kala chi nathumli hāngmi kala nathumna shaakha, ning ngasharlak ngathingkhuilu. Chi mashung, tui chi kachangkhata, Israelli hikathā ningkakachai ot sāhaiakha, 5chithākha hikathā makaphā ot kasā mayarnao nilala sha̱nao nilala chi nathumwui ngaveili khuirālaga lunggui eina horthat shaothatlu. 6Shākhi khani lah kathumwui tui eina shaothatki kajina; shākhi akha manghaiwui tui einava masāthatpaimara. 7Ali shaothatki khare eina shākhibingwui pāng ali leira, chiwui thili mi saikorawui pāng leira. Chithāda nathumwui alungli makaphā ot chi tharngasakra.
Avāwui Bichar Sāpam
8Tuingaphun akha ashee eina ashee, mashun eina mashun, khangashao eina khangashao, nathumwui keinungbingli mamayā khangarok, nathumna bichar sākhavai sakkhanā leiakha, nathumwui Avāna kapangkhuiki kaji apam chili kālu. 9Levi pāngmonbing kala atam chili otram ngatha̱ki kaji bicharwo chili vālu; ngahānlu, chithākha athumna nathumli hukhum chi hāngmira. 10Ithumwui Avāna kapangkhuiki kaji apam chiwui eina athumna nathumli hāng kaji chi thāda sālu; athumna nathumli tamchithei kahai saikora sākhavai ning ngasharlu. 11Athumna tamchithei kaji ain chi kala athumna nathumli mihai hukhum chi mayonlu; athumna hāng kaji tui chiwui eina, yāpang lah veipangshong mangareithuihaialu. 12Khipākha langsoda otsak sāda, nathumwui Avāwui mangāli otram ngatha̱mida khanganing pāngmon chili, lah bicharwo chili manganāsang mi chi thiki kajina. Nathumna Israelwui eina makaphā ot chi tharngasakra. 13Kala mi saikorana shālaga ngacheera, kala langsoda otsak masāluimara.
Awunga akhawui vang Avāwui Shiyanbing
14Nathumwui Avāna nathumli mihai ngalei chili nathum zangkhaleoda, chi shimlui khuida, apam chili sompamda, kala, "Iwui kuikhamareili khalei yur saikorawui thāda, iwui azingli awunga akha leingasakra," da hāngakha, 15nathumwui Avāna kapangkhuiki kaji awunga chi nathumwui azingli leingasakpaisera; nathumwui achinābingli ngachaiwui eina awunga akha nathumwui azingli leingasaklu. Nathumwui achinā maningla ramkazat mi chi nathumwui azingli maleingasakpaimara. 16Ana khalattawui vang sigui kachungkha makhuipaimara, lah sigui kachungkha samphang khavai mibingli Egyptli hanungserpaimara, kaja ithumwui Avāna nathumli, "Chi apong chili katang mavaila malatluishitpaimara," da hānghaira. 17Awui ning mangareithui khavai ana preiva̱ kachungkha makhuipaimara; lah khalattawui vang lupā kala sinā kachungkha maamasapaimara.
18Awui wungpamkhongli kapam tharan, ana Levi pāngmonbingwui mangāli, ain hiwui kapihaikasā akha lairik akhaluili khalattawui vang kapiphalungra. 19Chi awuili leiphalungra, kala ana awui mirin peida chi eina pāphalungra, chithāda ana awui Avāli khangachee tamkhuira, ain hiwui tui saikora kala shiyan-chikan hibing saikora mayonda, chi sāda, 20chithāda awui ning achinā ngarāwuitungli mayetlakmara, kala ningkhami eina uishong lah yāshong mangareithuimara, chithāda ana kala awui naongarābingna Israelli awui wungramtungli mirin kasangda mungra.
