Khalatlui 16

16 ¹Abib kachāng chi mayonlu, kala nathumwui Avāli Makānkhami phanit mayonlu, kaja Abib kachāngli nathumwui Avāna ngayā nathumli Egyptwui eina thānshokmi. ²Awui ming leikhavai nathumwui Avāna kapangkhuiki kaji apam chili, yaoshang eina seiwui eina Makānkhami pha̱phayā nathumwui Avāli chigatra. ^a a v2 Avāna awui ming leikhavai kapangkhui kahai apam chi, awui naobingna Jishuwui eina, manglā eina khamashung eina, khaleipam kachida ali khorumra jiwui zimiksho chi rida chitheimi. ³Chi ngasoda khawok kazang khamui mashaipaimana. Shinithang chi ngasoda khawok makazang khamui, kachotkachāngwui khamui chi shaira; kaja nathumna katotlak eina Egypt ngaleiwui eina shoka; chithāda sāda nathumna Egypt ngaleiwui eina shokthang zimiksho chi nathumwui mirin peida phaningungra. ⁴Shinithang nathumwui leiret saikorali khawok kazang matheipaimara; kharethangwui ngazin nathumna pha̱ sā chi akhamawui vang mataipaimana. ⁵Nathumwui Avāna nathumli khami kaji nathumwui keinung akhanidala Makānkhami pha̱phayā machigatpaimana, ⁶kha nathumwui Avāna awui ming pamkhavai kapangkhuiki kaji apam chili, nathumna Egyptwui eina shokthang atam, ngazin zimik katun tharan, Makānkhami pha̱phayā chigatra. ⁷Nathumwui Avāna kapangkhuiki kaji apam chili chi hanglaga shaira, chieina ngathorli ngaranda nathumwui kachonshimli unglu. ⁸Tharukthang latluida khawok makazang khamui shaira; kashinethang nathumwui Avāli chingri kahai kakazip khangarumna; chithang ot masāpaimana.

Haptābingwui Phanit

⁹Nakhalattawui vang haptā shini shānkhuilu; chāngkui khanganing māli khare kazang tharan eina shānkhuilu. ¹⁰Nathumwui Avāli Haptābingwui phanit mayonlu; nathumwui Avāna nathumli sokhami athishurda nawui pāng eina lemmet chigatlu. ¹¹Awui ming leikhavai nathumwui Avāna kapangkhuiki kaji apam chili, na, nanaomayara, nanaongalāva̱, nawui rao mayarnao eina sha̱naobing, nathumwui keinungli khalei Levinao, kha̱minao, marānao, kala nathumwui ngachaili ra̱meinaobing, nathum saikora nathumwui Avāwui mangāli ringphāra. ¹²Nathum Egyptli raonao sāsai kaji phaningunglu, kala ainbing hi ning ngasharda mayonra.

Rāmrah Phanit

¹³Nawui lanpum eina drakhāthei surkhavaipamwui eina kazipkhuiserhailaga, shinithang Rāmrah Phanit mayonra. ^b b v13 Rāmrah: thing eina sākahai atam kachāma sāwui pamkhavai, Israelna lamhāngli kuiungvai kumbing chi phaningmi kahaina. ¹⁴Nawui phanitli na, nanaomayara, nanaongalāva̱, nawui rao mayarnao, nawui rao sha̱nao, kala nathumwui keinungli khalei Levinao, kha̱minao, marānao, kala ra̱meinao, nathum saikora ringphāra. ¹⁵Ana kapangkhuiki kaji apam chili, shinithang nathumwui Avāli phanit mayonra, kaja nawui theishirai saikora eina nawui pāngthem saikorali ana nathumli somira; chithāda sāda nathum katonga ringphāra. ¹⁶Kumkhali kathum shida, Khawok Makazang Khamuiwui Phanit, Haptābingwui Phanit, kala Rāmrah Phanit tharan, nathumwui mayarnao kachiva̱na ana kapangkhuiki kaji apam chili nathumwui Avāwui mangāli rānganingra. Kala athumna awui mangāli pāng khamasai eina marāpaimara. ¹⁷Mi kachiva̱na kachichāwui pāngwui kachigat athishurda, nathumwui Avāna nathumli khami sokhami athishurda mira.

Bicharsamebing kala Khamashung Bichar

¹⁸Nathumwui Avāna khami keinung kachiva̱li, nathumwui shang kachiva̱wui vang, mibingli khamashung bichar eina bichar sāmi khavai bicharsamebing kala otva̱bing phākhuilu. ¹⁹Nathumna mashun mayonpaimara, mijang masāpaimara, pheizā makhuipaimara; kaja pheizāna thangkhameibingli mik ngapeo ngasaka, kala khangarongawui tui yonngasaka. ²⁰Mashun, mashun chimāngli shurlu, chieina nathumna ringda nathumwui Avāna khami ngalei chi samphangra.

Nathumwui Avā Maningla Khorumlu

²¹Nathumna sākā nathumwui Avāwui hanphut ngalemli, nathum khalattawui vang Asherah sāda thingrong akhala malingsangpaimara. ²²Kala nathumwui Avāna ningkakachai pākra̱ nathum khalattawui vang mashunpaimara.