Mukinzi wa Phaki wa Tata
Phaki, Milungu yi Masaka bisi songila mvula, kosu mukinzi kusadilwa ku homa kuna Tata wetu kasola, amana mu kosu mukinzi basadi, balefi, baphakanu, bana ba batsona yi bafwidi bakotila mu kyesi. Buna bazusi básolwa mu kosu mbanza: ka pfundusu za mbi ku, ka makabu ma bukhita ku. Sanda masonga, masonga kaka.
16 1Keba ngonda ya Abibi amana teka mukinzi wa Phaki kwena Tata waku, mukuma muna ngonda ya Abibi Tata waku wákukatula ku Ngiphiti mu phipha. 2Tambika kimenga kya Phaki kwena Tata waku, tuka mu mikoku yi mu bangombi, ku homa kuna Tata waku kasola mu kusya khumbu yandi kwakuna. a a v2 Homa hana Tata kásola mu kusya khumbu yandi hásongila ku thwala kilumbu bana bandi bakwisa kumusambila homa hosu, mu kitembu yi mu kyedika, mu nzila ya Yesu. 3Kudyaku mapha ma muvimbu ha kimosi yi dyawu. Mu bilumbu tsambwadi, dya mapha makonda muvimbu ha kimosi yi dyawu, mapha ma kiwayi, mukuma wákatuka mu tsi ya Ngiphiti yi tswatsu, hanga wabánza kilumbu kina wákatuka mu tsi ya Ngiphiti mu bilumbu byosu bya luzingu lwaku. 4Muvimbu wulendaku monika mu kinzunga kyaku kyosu mu bilumbu tsambwadi; mbisi yina wátambika mu masika ma kilumbu kya theti yilendaku syala tii yi suka. 5Wulendaku tambika kimenga kya Phaki mu kosu mbanza yina Tata waku kakúheka, 6kaasi ku homa kuna Tata waku kasola mu kuzingisa khumbu yandi, tambika kimenga kya Phaki kwakuna, mu masika, tangwa dyisi kota, tangwa wákatuka ku Ngiphiti. 7Lamba dyawu amana dya dyawu ku homa kuna Tata waku kasola, buna vutuka mu suka amana kwenda ku masombolu maku. 8Dya mapha makonda muvimbu bilumbu bisambanu; mu kilumbu kya tsambwadi, vukana mu kimvuka kwena Tata waku, kusalaku kisalu.
Mukinzi wa Milungu
9Tanga milungu tsambwadi kwa ngeyi-ngeyi; yandika kutanga milungu tsambwadi tuka tangwa mbedi yíkota theti mu bule bwenina mu tseki. 10Teka Mukinzi wa Milungu kwena Tata waku: kabu dya mbundu ya bukheti dya tuka mu koku dyaku, bwosu buna lusakumunu lwa Tata waku. 11Wafwana kusangwala ku thwala Tata waku—ngeyi, mwana waku wa yakala, mwana waku wa mukhetu, musadi waku wa yakala yi musadi waku wa mukhetu, mulefi wenina mu mavula maku, munzenza, mwana konda tata, yi mufwidi wenina mu kati dya benu—ku homa kuna Tata waku kasola mu kusya khumbu yandi kwakuna. 12Banza ni ngeyi wákala muhika ku Ngiphiti, amana keba bukheti-bukheti mitsiku myayi.
Mukinzi wa Masaka
13Teka Mukinzi wa Masaka bilumbu tsambwadi, tangwa wawóngika bima tuka ha homa haku hambula bule yi ha kinyongi kyaku kya vinu. b b v13 Masaka: bisasa bya tangwa kyakhufi bina bitungulu mu mandala ma miti, bisi tebukila mvula za bisi Kiseledi za kudyengila-dyengila mu tseki ya khulu. 14Sangwala mu mukinzi waku—ngeyi, mwana waku wa yakala, mwana waku wa mukhetu, musadi waku wa yakala, musadi waku wa mukhetu, mulefi, munzenza, mwana konda tata, yi mufwidi wenina mu mavula maku. 15Teka mukinzi kwena Tata waku bilumbu tsambwadi, ku homa kuna kasola, mukuma kakusakumuna mu bibundu byaku byosu yi mu kisalu kyosu kya moku maku—hanga wásangwala yi mbundu yaku yosu. 16Mu mbala tatu mu mvula, bayala baku boosu bafwana kumonika ku thwala Tata waku ku homa kuna kasola: Mukinzi wa Mapha Makonda Muvimbu, Mukinzi wa Milungu, yi Mukinzi wa Masaka. Amana bafwaniku kumonika ku thwala yandi yi moku ma khatu. 17Kosu mutu kaheka bwosu buna kabu dya koku dyandi, bwosu buna lusakumunu lwa Tata waku wákuheka.
Bazusi yi Mukanu wa Masonga
18Sikununa bazusi yi batsinzidi muna kosu mbanza yina Tata waku kakúheka, kanda yi kanda, mu kuzengila batu mukanu wa masonga. 19Kusobisaku mukanu, kusongilaku kayengu, kubongaku kabu dya mvunu—mukuma kabu dya mvunu kisi fwasa mesu ma batu badimuka amana kisi sobisa mihowu mya batu ba masonga. 20Sanda masonga, masonga kaka, hanga wazínga amana wavwa tsi yina Tata waku kakúheka.
Sambila Tata waku Yandi Mosi
21Kukunaku kwa ngeyi-ngeyi miti wosu hanga Ashela bela-bela yi mesa ma kimenga ma Tata waku mana watunga. 22Amana kutelamisaku kwa ngeyi-ngeyi kunzi kya kinzambi, kina Tata waku kisi kimenga.
