Pura Bolidan aru Bhag Nakora Mon khan
Mora sajah laga mamla te dui na tin gawah lage, aru tan mamla khan majot laga adalat te jabo. Tetiya ekta asorit niyom: jodi Israel ekta raja bisare, tai tarkhan laga bhai khan majot pora he hobo lage, ghora, maiki aru chandi jama nakoribo, aru eitu niyom tu tai likhi kene pura jivon porhi thakibo lage.
17 1Tumar Pitri ke kiba dox thaka nahole dangor kharab thaka goru nahole mer bolidan nadibi; eitu tumar Pitri nimite ghin laga jinis ase.
2Jodi tumikhan majot te, tumar Pitri pora tumike diya kun bhi sohor te, ekjon mota nahole ekjon maiki Tar vachan bhangai kene tumar Pitri laga suku te biya kaam kora pai le, 3aru dusra devta khan ke sewa kori kene, suryo, chand, nahole sorgo laga sena khan kunbi ke mathatuki, juntu Moi hukum diya nai, 4aru eitu tumike koi dise aru tumi hunise koile, bhal pora bisari sabi. Jodi eitu hosa ase, kotha tu thik ase, eneka ghin laga kaam Israel te hoise koile, 5titia eneka biya kaam kora hei mota nahole hei maiki ke—hei mota nahole hei maiki ke—tumar duar khan te ulai ani kene, pathor pora mari dibi. 6Duijon nahole tinjon gawahi diya manuh laga kotha pora, moribole saja pua manuh tu moribo lage; ekjon gawahi laga kotha pora tar moribo nalage. 7Tar ke morai dibole gawahi khan laga hath poila tar uporte thakibo lage, titia sob manuh khan laga hath. Eneka pora tumi tumar majot pora biya tu hatai dibi.
Pitri laga Niyai Kora Jagah khan
8Jodi ekta kotha tumi nimite niyai koribole bisi digdar ase—khoon aru khoon majot te, dabi aru dabi, marpit aru marpit, tumar sohor khan te thaka jhagara khan—titia tumar Pitri pora basi lua jagah te uthi jabi. 9Levi jati laga purohit khan aru hei somoite sewa kori thaka niyai kora manuh logot te jabi; hudibi, aru taikhan pora tumike niyai laga kotha kobo. 10Amar Pitri pora basi lua jagah pora taikhan tumike ki kobo, eitu hisab te kaam koribi; taikhan tumike ki sikhai dibo sob koribole hoshiar thakibi. 11Taikhan ki sikhai diya niyom aru tumike diya niyai laga kotha tu mani lobi; taikhan ki koi diya kotha pora, dyna nahole baya, naghuribi. 12Kun manuh phutani kori kene, tumar Pitri usorte sewa koribole khara thaka purohit laga nahole niyai kora manuh laga kotha huni bole mana korise, tai moribo lage. Tumi Israel pora biya tu hatai dibo lage. 13Aru sob manuh khan hunibo aru bhoi lagibo, aru kitia bhi phutani nakoribo.
Ekjon Raja nimite Pitri laga Niyom khan
14Jitia tumi tumar Pitri pora tumike diya desh te ghusi jabo, eitu dhori lobi, ta te thaki jabi, aru kobi, “Moi laga chari phale thaka sob desh khan nisena, moi uporte ekjon raja rakhibo dibi,” 15tumar Pitri pora basi lua raja ke tumi hosa pora tumar uporte rakhibo pare; tumar bhai khan majot pora ekjon raja tumar uporte rakhibi. Tumar bhai nahua ekjon bidexi manuh ke tumar uporte rakhibo naparibi. 16Tai nijor nimite bisi ghora joma koribo nalage, nahole aru bisi pabole manuh khan ke Egypt te wapas pathabo nalage, kilemane amar Pitri pora tumike koise, “Hei rasta te kitia bhi wapas najabi.” 17Tai bisi maiki nabiyah koribo lage, nahole tar mon ghuri jabo; tai nijor nimite bisi chandi aru suna bhi joma koribo nalage.
18Jitia tai tar raja laga singhason te bohibo, tai Levi jati laga purohit khan usorte, eitu niyom laga ekta copy nijor nimite ekta kitab te likhibo lage. 19Eitu tar logot te thakibo lage, aru tai tar pura jibon eitu pora porhibo lage, eneka pora tai tar Pitri ke bhoi koribole sikhibo, eitu niyom laga aru eitu hukum khan laga sob kotha mani kene, eitu khan kori kene, 20eneka pora tar mon tar bhai khan uporte uthi najabo, aru tai hukum pora dyna nahole baya naghuribo, eneka pora tai aru tar bacha khan Israel te tar rajyo uporte deri tak raj koribo.