1 Peter 3

3 ¹Chithada sāda, preiva̱ ngarā, gaharangarāli hamsanglu, chithākha kaikhana tuili manganāla khipānakha, athum chi tui maleila preiva̱ ngarāwui otsak eina samphangra, ²athumna nathumwui tharzā kala khayākashi eina kasā otsak chi theira. ³Nathumwui khamathā chi sam phorkasang, sinā sāri, kala aman kasaka kashankachon thada keinung eina theikhui khamathā maningalu. ⁴Kha nathumwui khamathā chi wuklung alungwui ngathum mi, malungkhanim kala va̱ri kahai manglāwui mathāhaila khamathā ngasāranu; hi ithumwui Avāwui mikyanli aman kasakna. ⁵Kaja achālakhawui kathara sha̱naobing, ithumwui Avāli chihānbing chi, athum khalattawui gaharangarāli hamsangda khalatta hithada mathā sākhui, ⁶Sarahna Abrahamli nganāda ali akhava da hoi kajithada; kala nathumna kaphā sāda khikha khangacheeli mangacheela leiakha, awui nao ngasāhaira.

⁷Gahara ngarā, chithada sāda, athumli ngazanmei ham thada kala kharing lukhamashanwui khangarum thada khayāshida, chithākha nathumwui seihā kasā mahapkhano khavai, preiva̱ ngarāli theishingkakhui eina ngasoda pamlu.

Somi Kasā Shimkhur

⁸Naomeikapta, nathum saikora, ning akha ngasaklu, akha eina akha malungnimhailu, chinaongarā thada leishi ngaroklu, malungkhanimhailu, kala ningngai kahui ngasaklu. ⁹Makaphāwui vang makaphā, kazeiwui vang kazei mahanmilu, kha chiwui mahutliva somilu. Nathumna sokhami mathunkhui khavai nathum hiwui vang hokakhuina. ¹⁰Kaja, "Khipānakha mirin leishikhavai ningchāng a, kala ningyāngkhaung zimik theikhavai a chi, awui male chi makaphāwui eina khāmranu, kala awui morchai chi mikhanam tui shok eina khāmranu. ¹¹Makaphāwui eina pākhaida kaphā sāranu; chingri kahai phāda, chi shurranu. ¹²Kaja ithumwui Prohowui mik chi khangarongbingli lei, kala awui khanā chi athumwui seihā kasākhon sho lei, kha ithumwui Prohowui mai chi makaphā kasābingwuitungli lei."

¹³Ara, nathum kaphā sākhavai lungchangtha̱akha, khipāna nathumli sākashi sāshapra?

¹⁴Kha khamashung khangarongwui vang nathumna kachot phungakha, nathum sokhamina. Athumwui khangachee chi mangacheealu, mangatha̱luialu. ¹⁵Khrista chi Proho da nathumwui wuklungli tharchigatlu. Nathumwui kachihānwui maram ngahān kachiva̱li malungkhanim kala khayākashi eina ngahānkā khavai atam kachida reisanglu. ¹⁶Tharzā mashun-makhui singtitlu, chithākha nathumli kazei sātharan, Khristawui lungli nathumwui kaphā otsakli chipat khangasakbing chi maikashi samphangra. ¹⁷Chi ithumwui Avāwui ningkachāng jiakha, makaphā sāwui vang kachot kaphungle kaphā sāwui vang kachot phungda phamei. ¹⁸Kaja ithumli ithumwui Avāli khuiung khavai, khamashunga chi makhamashungabingwui vang, Khristanala morei vang akhashida kachotkachāng phunga. Ana phasāli thikahaia, kha manglāli ringngasakhaira, ^a a v18 Khristana kachotkachāng phunga chi ithumli katāva̱li leisā ngasak khavai maningmana, kha ithumli ithumwui Avāwui shimli kupchaoda khuiung khavaina—hi paokaphāwui ningrinna. ¹⁹Chi manglā eina anala phātopli khalei manglābingli vāda pao hāshoka, ^b b v19 'Phātopli khalei manglābing' hi khipā chibing kajina da mamayā khangarok lei; matai eina chibing chi Noahwui atamli tākahai manglābing sāra. ²⁰Achālakha Noahwui atamli marikhong sākā leilakha ithumwui Avāna khāngkathei ngaraipama tharan, manglābing chi kahāng manganāsāmana. chi marikhong alungli kateokha, chiya mi chishat, tara̱ eina yāmshok kahaira. ²¹Chi tākam eina khalei ra̱kahik china Jishu Khristawui ringkhaluiwui mangā eina ara nathumlila huimira. Chi phasāwui ngalei pheomi maningmana, kha ithumwui Avāli tharzā kahai mashun-makhui khavai kapona. ²²Ana kazingramli vāzangda ithumwui Avāwui yāshong pamda lei, kazingraobing, khamungabing kala pangshapbing awuili kasingna.