Yak shuong hoba nyusema shuong cheei che soumo hatyo
Yak hoba nyusema shuong to lamthen cheei che soneikangbü kula hoba seneibü Bou thedanga namsek kibü thuibü eaaoabü soushou thüka pikei, hoba mangsenbüei welaubü shingektida dogo kaangkei. Kheijinei chemdang pendou shanga: amaibü shanga amaibü teangaingouti, aeiko haübü kuashi, kaneibü ngabü ngüh onouko jongaila shanga lamleko kishi, hoba Khristaei asaopobü shanga phea joukei dogo ngeashi.
3 1Kho tegü, yak shuong, kaneibü nyusema phanga natenko kishi, khei atei shuongei ngüh aleko yingalonga kei, yak shuongeibü kümsileiei ngüh akuko haoen thükenlabü, 2kaneibü hinseibü hoba souhatbü kümsilei hapbo. 3Kaneibü hemaibü kho maangae sühbü—khu wouan, hon chinem, hoba maibü neisimei—teyingjan. 4Lausikei kho maanga hubü müt, thuibü hoba eaaoabü soushoueibü ahaibü hemaibü, Bou thedanga namsek kibü kho kishi. 5Aishanga shangied saopobü yaksa shuong, aoyouei Bou to maanglembei, haoen jembü nyusema phanga natenko haoen lolo kho tegütham neitikei, 6Saraei Abraham ngüha leko hao to bunyubou dogo ngekbü tegü. Hoba kanei maibü kümalonga hoba ai maangmau to ahatko kialonga, kan saoeibü shousi shuong yeia.
7Nyusema shuong, kho tegü, kaneibü yak yoa ditenan kiashi, yak kho hau akibü chaksiam tegü hoba langkei onou jongsak shuong tegü soumo hatko, khei kaneibü welaubü ashingektilabü.
Haü Kubü Chempen Che
8Toukei, kan pendou, maangpon che kishi, cheei che onouko, cheei che jen tegü sanouko, maang thuibü hoba eaaoabü kishi. 9Amaibü shanga amaibü ayingsi nyikubü shanga nyikubü teangaingouti, aeiko haübü kuashi—kho shanga kan ngabou kikei, khei kanei haübü phetphanlabü. 10Aishanga, “Aoei langkei sanoula hoba maibü chalou shuong hapla mangsühda, haoei jembü lishang amaibü ka hoba jembü sembung lanbü ngüh lenbü ka hatlepashi. 11Haoei amaibü ka phai seman maibü kümashi; haoei sangmai lamko kho shijung hauashi. 12Aishanga seneibü Bunyuboueibü nyek saopobü shuong thükto kia, hoba haoeibü nou haoeneibü welaubü to ipan kia, lausikei amaibü kümbü shuong to seneibü Bunyuboueibü thenyek dangda.”
13Hobaje, kanei maibü kümla aeibou haiyeialonga, aoei kan to amaibü sungbalabü?
14Lausikei saopobü shanga kan khonkualonga, kan haübou. Haoeneibü hatbü to tehatjan, hoba temokjan. 15Kaneibü maanga Khrista kho Bunyubou tegü bangan phoashi. Kaneibü maanglem jih phebü pendou to jongaila ponpendou lamlean kishi, lausikei thuibü hoba souhatbüei jongaiashi. 16Hinseibü jembü maangpon jungeiashi, khei kan to nyikutilaje, Khrista ka kaneibü maibü kümsilei to nyikubü shuong kho himouko kilabü. 17Kho Bou maangangbü yingalonga, amaibü kümbüa shanga khonkubü toje, maibü kümbüa shanga khonkubü kho maibou ki. 18Aishanga Khristakei shabü shanga chenei khonkukei, saopobü müt kho asaopobü shuong shanga, sen Bou jungto leiyeila shanga—hao mang danko haitiko, soushou danko langkei kutikei, a a v18 Khristaei sen lounyua apyola shanga aying, lausikei sen Bou chem sühko leiyeila shanga khonkukei—ho Ngühlang Maibüeibü nangbü kaonyek ki. 19khünei hao kei haukei, hoba thüngdang ka kibü soushou shuong to songlenkei, b b v19 ‘thüngdang ka kibü soushou shuong’ aoen ki dogo ngüh juong kia; aingenyu Noa chalou kabü üatbü soushou shuong yinglabü. 20aoyou shangied ngüh aleko kikei, Noa chaloua longchem thenyoko kitoua Bouei natenko chüheibü ka; khünei lalok—müt set—kho dei danjung sangmaia khümenkei. 21Ho tegü kibü baptikubüei tat kankei khümenda—mangeibü tham sunglabü aying, lausikei maibü jembü maangpon shanga Bou to subüjabü ki—Jisu Khrista langngaibü danko, 22Hao khuthük to haukei hoba Bou maenei kia, khuthük hangangbü shuong, songdakbü shuong hoba seisihuon kibü shuong kho hao phanga natenko kia.
