Chia 59
Chia leiyeibou shanga. “Temauti” dogo chia yemei. Dawideibü honei chia che, Saulei Dawid haitila shanga Dawideibü chem komla müt shuong hautibü chaloua.
Sauleibü müt shuongei Dawidbü chem lapheida. Haoei haoen chasem kaonyek kaijembo loubü kei tan tegü dakda, shaula apyojinei ngüh longbü. Haoeibü jongai kho ngeyanga chia atlabü, jembü Bou to lapheishon dogo nyenko.
59 1Ngeibü dangbou shuong ka ngo khümenashi, Abou; ngo khulimbo loenbü shuong tokei thükkabou ngo satenko phoashi. 2Amaibü kümbü shuong ka ngo khümenashi, hoba müt haitibü shuong ka ngo senetashi. 3Aishanga chühashi—haoenei ngeibü langkei lela haiyeida; kaangbü müt shuongei ngo khulimbo thungeiko lanthükda, ngei ngühmaang alanko hoba ai shed ashon yingasikei, Abou. 4Ngeibü ai shedbü akilonga, haoenei laangan lamlean lin küman loda. Loenashi hoba ngo thuikaima—chühashi!
5No, Abou, Lakjaibü dan Bou, Israel Bou—Loenashi hoba phang shuong pendou to kayang kushi; huonei amaibü lansanbü aoyou to onou alejan. 6Chasem haoenei sepeijung louda, kei tegü ngüh longko hoba sangnyu kaijembo shoongaida. 7Chühashi—haoeneibü sembungei kom thonda; haoeneibü sembunga in shuong kia, aishanga haoenei, “Aoei kün to ditda?” dogo damda. 8Lausikei no, Abou, haoen to nyia; no phang shuong pendou to amangsühda. 9Kü hau, ngei ka to chüheida; aishanga kü Bou ngeibü lapheishon ki. 10Kü Bouei haoeibü üeisanou yoa ngo haüyola louda; kü Bouei ngo to pintiaatibü shuong thüka thüksimin ngo chühtikula. 11Haoen tehaiti, kü mütliei maalabü lele; kaibü hauei haoen shoongaitishi, hoba haoen huongenshi, O Thükenbou Bou, seneibü aih. 12Haoeneibü sembungbü shedbü shanga, haoeneibü sembung ngüh shuong shanga, haoeneibü lilibü ka haoen minan apshi— aishanga haoenei khükbü hoba amlangbü ngüh lauda.
13Maangshat ka haoen shemtiashi, haoen akila shongko haoen shemtiashi, khei kaonyudak pendoueibü mütshuongei seneibü Bouei Jakob thüka yaangenda dogo ngeashi. 14Chasem haoenei sepeijung louda, kei tegü ngüh longko hoba sangnyu kaijembo shoongaida. 15Haoenei shausiyung shanga shoongaida, hoba senyüh asembo kialonga lu jungeida. 16Lausikei ngei kaibü hau shanga chia laulabü; ngeyang ngei kaibü üeisanou shanga chia alou laulabü. Aishanga no ngeibü lapheishon kikei, ngeibü khonkubü chaloua satenshang kikei. 17Kü hau, ngei ka la nyensang kulabü; aishanga kü Bou ngeibü lapheishon ki, kü to üeisanou lenbü seneibü Bou ki.
