Malbata Miletan

Her sê kurên Nûh dibin heftê milet, li gorî binemal, ziman û welat belav dibin. Padîşahiyên Nemrûd û sînorên Kenan tên navkirin, bi bêdengî nexşeya her tiştê ku tê datînin. Belavbûn li vir wekî berfirehbûnê tê vegotin, berî ku Babîl sedemê rave bike.

Beş 10.

Ev qeyda kurên Nûh e: Sam, Ham û Yefet. Piştî tofanê ji wan re kur çêbûn.

Kurên Yefet: Gomer, Magog, Maday, Yewan, Tûval, Meşek û Tîras.

Kurên Gomer: Aşkenaz, Rîfat û Togarma. Kurên Yewan: Êlîşa, Tarşîş, Kîttîm û Rodanîm. Gelên keviyên deryayê ji van belav bûn û li welatên xwe, her yek li gorî ziman, binemal û miletê xwe, ji hev cuda bûn.

Kurên Ham: Kûş, Misrayîm, Pût û Kenan. Kurên Kûş: Seva, Hawîla, Savta, Raema û Savteka. Kurên Raema: Şeva û Dedan. Kûş bû bavê Nemrûd; ew li ser erdê mêrxasê pêşî bû. Ew li ber Xwedê nêçîrvanekî hêzdar bû. Loma mirov dibêjin: “Mîna Nemrûd, nêçîrvanekî hêzdar li ber Xwedê.” Destpêka padîşahiya wî li welatê Şînarê Babîl, Erek, Akkad û Kalnê bûn. ^a Ew ji wî welatî derket û çû Aşûrê. Wî Nînewa, Rehovot-Îr, Kalah û Resena di navbera Nînewa û Kalahê de ava kirin; ev bajarê mezin e. Misrayîm bû bavê Lûdî, Enamî, Lehavî, Naftûhî, Patrûsî, Kaslûhî (Filîstî ji wan derketin) û Kaftoriyan.

Kenan bû bavê Saydayê nixuriyê xwe û Hêt, û Yevûsî, Amorî, Gîrgaşî, Hîwî, Arkî, Sînî, Arwadî, Semarî û Hamayiyan. Paşê binemalên Kenaniyan belav bûn. Sînorê Kenan ji Saydayê ber bi Gerarê ve heta Xezayê, ber bi Sodom, Gomora, Adma û Sevoyîmê ve heta Leşayê dirêj dibû. Ev kurên Ham in, li gorî binemal, ziman, welat û miletên wan.

Ji Samê birayê mezin ê Yefet re jî, ku bavê hemû dûndana Êver bû, zarok çêbûn. Kurên Sam ev bûn: Elam, Aşûr, Arpexşad, Lûd û Aram. Kurên Aram: Ûs, Hûl, Geter û Maş. Arpexşad bû bavê Şelah, Şelah jî bû bavê Êver. Du kurên Êver hebûn: navê yekî Pêlêg bû, çimkî di rojên wî de erd hat parvekirin; navê birayê wî jî Yoqtan bû. ^b Yoqtan bû bavê Almodad, Şelef, Hasarmawet, Yerah, Hadoram, Ûzal, Dîkla, Oval, Avîmaêl, Şeva, Ofîr, Hawîla û Yovav. Ev hemû kurên Yoqtan bûn. Herêma wan ji Mêşayê ber bi Sefarê ve heta çiyayên rojhilat dirêj dibû. Ev kurên Sam in, li gorî binemal, ziman, welat û miletên wan.

Ev binemalên kurên Nûh in, li gorî nifşên wan, di miletên wan de. Piştî tofanê milet ji van li ser rûyê erdê belav bûn.