Ezekiel 43

43 ¹Unya gidala niya ako ngadto sa ganghaan, ang ganghaan nga nag-atubang sa sidlakan. ²Ang himaya sa Amahan sa Israel miabot gikan sa sidlakan. Ang iyang tingog sama sa dahunog sa daghang katubigan, ug ang yuta misidlak sa iyang himaya. ³Ang panan-awon nga akong nakita sama sa usa niadtong miabot siya aron sa paglaglag sa siyudad, ug sama sa panan-awon daplin sa Suba sa Kebar; ug mihapa ako. ⁴Ug ang himaya sa atong Amahan misulod sa templo pinaagi sa ganghaan sa sidlakan. ⁵Unya ang Espiritu sa atong Amahan mibayaw kanako ug midala kanako ngadto sa kinasuloran nga hawanan, ug ang himaya sa atong Amahan mipuno sa templo.

⁶Nadungog ko ang usa nga nakigsulti kanako gikan sa templo, ug dihay usa ka tawo nga mibarog tupad kanako.

⁷Miingon siya kanako: “Anak sa tawo, kini mao ang dapit sa akong trono, ang dapit alang sa mga lapalapa sa akong mga tiil, diin ako magpuyo taliwala sa mga Israelita hangtod sa kahangtoran. Ang panimalay sa Israel dili na maghugaw sa akong balaang ngalan—sila ug ang ilang mga hari—pinaagi sa ilang pagkadili-matinud-anon ug pinaagi sa mga patayng lawas sa ilang mga hari diha sa ilang hatag-as nga mga dapit. ^a a v7 Ang “mga patayng lawas sa ilang mga hari diha sa ilang hatag-as nga mga dapit” lagmit nagtumong sa harianong mga handumanang lubnganan nga gipahimutang sulod sa o tupad sa hawanan sa templo. ⁸Gibutang nila ang ilang bakanan tupad sa akoa, ang ilang haligi sa pultahan tupad sa akoa, nga pader lamang ang nagbulag kanamo. Gihugawan nila ang akong balaang ngalan pinaagi sa ilang mangilngig nga mga buhat, busa gilaglag ko sila sa akong kasuko. ⁹Karon ipahilayo nila gikan kanako ang ilang pagkadili-matinud-anon ug ang mga patayng lawas sa ilang mga hari, ug magpuyo ako taliwala kanila hangtod sa kahangtoran.

¹⁰Anak sa tawo, ihulagway ang templo ngadto sa Israel, aron maulaw sila sa ilang mga sala; ug pasukda kanila ang laraw niini. ¹¹Kon maulaw sila sa tanan nilang nabuhat, isulti kanila ang laraw sa templo—ang pagkahimutang niini, ang mga agianan paggawas ug pagsulod niini, ang tibuok nga porma niini, ang tanang kasugoan niini, ang tanang laraw niini ug ang tanang balaod niini. Isulat kini sa ilang atubangan, aron matuman nila ang tibuok nga laraw niini ug ang tanang kasugoan niini ug mabuhat kini.

¹²Mao kini ang balaod sa templo: ang tibuok nga dapit sa tumoy sa bukid sa tanang palibot labing balaan. Mao kini ang balaod sa templo.

Ang Halaran sa Halad

¹³“Mao kini ang mga sukod sa halaran: ang patukoranan niini mga kawhaan ug usa ka pulgada ang giladmon ug kawhaan ug usa ka pulgada ang gilapdon, nga may ngilit nga mga siyam ka pulgada palibot sa daplin niini. Mao kini ang gihabogon sa halaran: ¹⁴Gikan sa patukoranan diha sa yuta hangtod sa ubos nga patongan: mga tulo ka tiil ug tunga, ang gilapdon mga kawhaan ug usa ka pulgada. Gikan sa gamay nga patongan hangtod sa dako nga patongan: mga pito ka tiil, ang gilapdon mga kawhaan ug usa ka pulgada. ¹⁵Ug ang abohan sa halaran pito ka tiil ang gihabogon, ug gikan sa abohan sa halaran upat ka sungay ang mituybo paibabaw. ¹⁶Ang abohan sa halaran kawhaan ug usa ka tiil ang gitas-on ug kawhaan ug usa ka tiil ang gilapdon, kuwadrado sa upat niini ka kilid. ¹⁷Ang patongan kawhaan ug upat ka tiil ug tunga ang gitas-on ug gilapdon sa upat niini ka kilid, nga may utlanan palibot niini nga mga napulo ug tunga ka pulgada ug patukoranan nga mga kawhaan ug usa ka pulgada sa tanang palibot; ang mga ang-ang niini nag-atubang sa sidlakan.”

¹⁸Miingon siya kanako, “Anak sa tawo, mao kini ang giingon sa Soberanong Amahan: Mao kini ang mga lagda alang sa halaran sa adlaw nga kini matukod—alang sa paghalad sa mga halad-sinunog niini ug sa pagwisik sa dugo niini. ¹⁹Hatagi ang mga pari nga Levita nga kaliwat ni Zadok, nga moduol kanako sa pag-alagad kanako, nag-ingon ang Soberanong Amahan, ug usa ka nating torong baka ingon nga halad-sa-sala. ²⁰Pagkuha ug diyutay sa dugo niini ug ibutang kini sa upat ka sungay sa halaran, sa upat ka eskina sa patongan, ug sa utlanan sa tanang palibot; aron mahinloan mo kini ug mahimo ang pagtabon-sa-sala alang niini. ²¹Unya kuhaa ang torong baka alang sa halad-sa-sala; sunoga kini sa gitagana nga dapit sa templo, sa gawas sa balaang dapit.

²²Sa ikaduhang adlaw, paghalad ug laking kanding nga walay ikasaway ingon nga halad-sa-sala; hinloan nila ang halaran sama sa paghinlo nila niini pinaagi sa torong baka. ²³Kon mahuman mo na kini sa paghinlo, paghalad ug nating torong baka nga walay ikasaway ug usa ka laking karnero gikan sa panon nga walay ikasaway. ²⁴Idalit sila atubangan sa atong Amahan; wisikan sila sa mga pari ug asin ug ihalad sila ingon nga halad-sinunog ngadto sa atong Amahan.

²⁵Sulod sa pito ka adlaw mohatag ka ug usa ka kanding matag adlaw ingon nga halad-sa-sala, ug usa ka nating torong baka ug usa ka laking karnero gikan sa panon, nga duha walay ikasaway. ²⁶Sulod sa pito ka adlaw himoon nila ang pagtabon-sa-sala alang sa halaran, hinloan kini, ug sa ingon igahin kini. ²⁷Kon matapos kining mga adlawa, sukad sa ikawalo nga adlaw ang mga pari magahalad sa inyong mga halad-sinunog ug mga halad-sa-pakigdait diha sa halaran; ug dawaton ko kamo, nag-ingon ang Soberanong Amahan.”