Koweekyigei Liilindap Kwandanyo Hekaluut
Koweekta liilindo ne ki ger Hesekiel koristo, kobunu kong'asiis ak konyiitaat hekaluut. Koguure Kwandanyo komostap ng'echereetanyi, ak koleenji Hesekiel koboor teekseet si koriren piik, yeityo koigoochi koindoigap kaptisisyet ak ng'echereetap peetuusyek tisap.
Ng'alaali Kwandanyo eng' mustarisyek 7–27
43 1Yeityo koibun kurgeet, kurgeet ne tokyingei kong'asiis. 2Ki nyo liilindap Kwandap Israel koyob kong'asiis. Kutinnyi ko uu kutitap peek che chaang', ak ki iluu ng'wony eng' liilindanyi. 3Ng'ang'utyet ne kaager ko uu ne ki ager ye ki konyo kowong'u nganaseet, ak ko uu ng'ang'utyet ne po aineetap Kebar; ak ki abutyi ng'wony ating'e togeennyu ng'wony. 4Ak ki chut liilindap Kwandanyo Hekaluut koyob kurgeet ne tokyingei kong'asiis. 5Yeityo kotoor Kabuusetap Kwandanyo anee, ak koibun seremut ne po oriit, ak ki ituch liilindap Kwandanyo Hekaluut.
6Ki agas chii ne ng'alaalwo koyob Hekaluut, ak ki tonon chiito eng' ole neegitee anee.
7Ki leenjo, “Weeriitap chii, ni komostap ng'echereetanyu, komosta ne po keldebesaigap keelyekyuk, ole amenye kwenutap piigap Israel agoi koigeny. Ma koweeksei kootap Israel komurwoonee kainennyu ne tiliil—icheek ak laitorinikwak—eng' kachililutyennywa ak eng' muuswegap laitorinikwak che mi komoswekwak che torooreen. a a v7 “Muuswegap laitorinikwak che mi komoswekwak che torooreen” komuuchi koboor keterutigap koitoisyegap laitorinik che ki kiteech eng' seremutap Hekaluut anan eng' ole neegitee ineendet. 8Ki konde kurgeetnywa eng' ole neegitee ne nenyu, ak tugatukyennywa eng' ole neegitee ne nenyu, kobatee irimeet ne mi kwenyoon. Ki komurwoonee kainennyu ne tiliil eng' tuguukwak che samis, amu nooto ko ki awong'u icheek eng' angeennyu. 9Nguno, ingoiste kachililutyennywa ak muuswegap laitorinikwak koloo ak anee, ak amenye kwenikwak agoi koigeny.
10Weeriitap chii, boorchi Israel Hekaluut, si kobiit kolilaan agobo tengekwogikwak; ak ingobiman itoondanyi. 11Ngo kolilaan agobo tugul che ki koyai, imwachi icheek itoondap Hekaluut—kakwautyennyi, ole koleen ak ole chutei, itoondanyi komugul, kaneetisyosyekyik tugul, kakwautikyik tugul ak ng'atuutikyik tugul. Sir eng' taikwak, si koriip itoondanyi komugul ak kaneetisyosyekyik tugul ak koyai icheek.
12Ni ng'atuutyetap Hekaluut: komosta komugul ne mi paragutap tulweet eng' komoswek tugul ko tiliil miising'. Ni ng'atuutyetap Hekaluut.
Kaptisisyetap Kagoochinet
13“Chu biimanisyegap kaptisisyet: kelunnyi ko asurindanyi olo po inchisyek tiptem ak agenge ak tebeesindanyi olo po inchisyek tiptem ak agenge, kobooto tegeleiywot ne po inchisyek sogool eng' riiryennyi kotegel. Ni koindap kaptisisyet: 14Kong'etee kelunnyi ne mi ng'wony agoi mireiywot ne rektoot: olo po fiitisyek somok ak nusu, tebeesindo olo po inchisyek tiptem ak agenge. Kong'etee mireiywot ne ming'in agoi mireiywot ne oo: olo po fiitisyek tisap, tebeesindo olo po inchisyek tiptem ak agenge. 15Ak ki tinyei ole lalei maat ne po kaptisisyet koindonyi po fiitisyek tisap, ak king'eet kuinoik ang'wan koyob ole lalei maat koba parak. 16Ki aechin ole lalei maat koindonyi po fiitisyek tiptem ak agenge ak tebeesindanyi po fiitisyek tiptem ak agenge, ko kagiliich eng' luukwekyik ang'wan. 17Ki aechin mireiywot koindonyi ak tebeesindanyi po fiitisyek tiptem ak ang'wan ak nusu eng' luukwekyik ang'wan, kobooto tegeleiywot ne yiemei koyiem olo po inchisyek taman ak nusu ak kelunnyi ne po inchisyek tiptem ak agenge kotegel; ki tokyingei lang'eiywekyik kong'asiis.”
18Ki leenjo, “Weeriitap chii, ni ng'olyoot ne mwaei Kiptaiyat Kwanda: Chu ng'atuutik che po kaptisisyet eng' peetuut ne kiteech—si kigoito kagoochinet ne kibeelei eng' ineendet ak kois korotiik eng' ineendet. 19Igoochi tisiik che Lawiik che kisikyi eng' Zadok, che riiktoi anee si kopoiswa, mwaei Kiptaiyat Kwanda, kirgit ne weeriit koek kagoochinetap tengekto. 20Inam korotiik che po ineendet ak ile kuinoigap kaptisisyet ang'wan, ak luukwegap mireiywot ang'wan, ak tegeleiywot kotegel; si ianyiny ak iyachi kagaigaet agobo ineendet. 21Yeityo inam kirgitap kagoochinetap tengekto; ibeel eng' komosta ne ki kitep ne po Hekaluut, saang' eng' ole-tiliil.
22Eng' peetuut ne po aeng', igoito oriindet ne maa tinyei serut koek kagoochinetap tengekto; kianyiny kaptisisyet ko uu ye kianyiny eng' kirgit. 23Ye ikityenji kaanyinyet, igoito kirgit ne weeriit ne maa tinyei serut ak nering'et ne po keechiirek ne maa tinyei serut. 24Igoito icheek eng' taitap Kwandanyo; kowiir tisiik muunyuk eng' icheek ak kogoito icheek koek kagoochinet ne kibeelei eng' Kwandanyo.
25Eng' peetuusyek tisap igoito oriindet eng' peetuut age tugul koek kagoochinetap tengekto, ak kirgit ne weeriit ak nering'et ne po keechiirek, che maa tinyei serut tugul aeng'. 26Eng' peetuusyek tisap koyachi kagaigaet kaptisisyet, koanyiny, ak kotabaan. 27Ye kobata peetuusyechu, kong'etee peetuut ne po sisiit kogoito tisiik kagoochinwogukwok che kibeelei ak kagoochinwogukwok che po kaalyeet eng' kaptisisyet; ak ataach okweek, mwaei Kiptaiyat Kwanda.”