Ezekiel 43

43 ¹Chieina ana ili zingshoshong ngareishoka ngavei chili khuivai. ²Israelwui Avāwui tekhamatei china zingshoshongwui eina rāhaira. Awui akhon chi tara̱ kachungkhawui akhon thai, kala okathui chi awui tekhamatei eina hora. ³Ina kathei khamahā chi, ana keinung sāshimān khavai rā tharan kathei chi thāda kala Chebar kongpheili kathei khamahā thāda thai; kala ina mai mashunzanga. ⁴Kala ithumwui Avāwui tekhamatei china zingshoshong ngareishoka ngavei eina khorumshimli zanga. ⁵Chiwui thili ithumwui Avāwui Manglāna ili khāngmathotlaga alungkayāngli ili khuivai, kala ithumwui Avāwui tekhamateina khorumshim chi pemtinghaowa.

⁶Ina khorumshimwui eina mi akhana ili ngazekta chi shāhaowa, kala mikumo akhana iwui ngalemli nganinga.

⁷Ana ili hānga: "Miwui naomayara, hi iwui wungpamkhongwui apamna, iwui pheimayāwui apamna, chili ina Israelnaobingwui alungli mashimānla leira. Israel shimkhurna kala athumwui awungabingna athumwui mashitkasang kala athumwui kajuipamli khalei athumwui awungabingwui kathingun chiwui vang iwui kathara ming chi makhao ngasakluimara. ^a a v7 "Athumwui awungabingwui kathingun athumwui kajuipamli" da kahāng hi khorumshim apamwui ngalemli lah chiwui ngalemchangli sākahai awungabingwui chikhur kaphenbingli hāngmi jira. ⁸Athumna athumwui khāmongphei iwui khāmongpheiwui ngalemli, athumwui pākra̱ iwui pākra̱wui ngalemli ngasunkhui, ithum ngachaili phākho akhamāngna. Athumwui ningkakachai ot chiwui vang athumna iwui kathara ming chi makhao ngasaka, chiwui vang ina iwui malungkhavātli athumli sāshimānmi. ⁹Chithākha athumna athumwui mashitkasang kala athumwui awungabingwui kathingun chi iwui eina katāli haiserhaoranu, kala ina athumwui alungli mashimānla leira.

¹⁰Miwui naomayara, khorumshim chi Israelli hāngchitheilu, chithāda athumna athumwui moreiwui vang khayakra; kala athumna chiwui sākakhui tamyangranu. ¹¹Athumna sākahai ot saikorawui vang khayakakha, khorumshimwui sākakhui, chiwui ayat, chiwui shokkhavai kala kazangkhavai apongbing, chiwui khangachā katonga, chiwui ain saikora, chiwui pāngthem saikora kala chiwui shiyan-chikan saikora chi athumli hānglu. Chi athumwui mangāli kapiserulu, chithāda athumna chiwui sākakhui katonga kala chiwui ain saikora mayonlaga sāphalungra.

¹²Hi khorumshimwui ainna: kaphungton kuimareida khalei apam saikora hi tharmathengmeikap kajena. Hi khorumshimwui ainna.

Pha̱kaphayā Hanphut

¹³"Hi hanphutwui asān-aret hina: chiwui aphei chi inch maga̱da akha thuka, kala aret inch maga̱da akha, kala chiwui ayarli kuimareida akom inch chiko shāphangā lei. Hi hanphutwui kajui hina: ¹⁴Ngaleili khalei aphei eina thuilaga azing kom vāpeida: khuining kathum shāphangā, aret inch maga̱da akha. Kateo kom eina khareiya kom vāpeida: khuining shini shāphangā, aret inch maga̱da akha. ¹⁵Kala hanphutwui meipam chi khuining shini juiya, kala hanphutwui meipam eina angaji mati atungshong shoka. ¹⁶Hanphutwui meipam chi asān khuining maga̱da akha, aret khuining maga̱da akha, achikun matili ngaphora. ¹⁷Akom chi achikun matili asān-aret khuining maga̱da mati tangkhai shāphangā ngaraichāra; chiwui kuimareida inch tharā tangkhai shāphangā akhamong kala inch maga̱da akha aphei lei; kala chiwui kachā chi zingshoshong ngareishoka."

¹⁸Ana ili hānga, "Miwui naomayara, Proho Avāna hithāda hānga: Hanphut sākahai zimiksholi chiwuitungli rikkatā kachigat chigat khavai kala ashee ikror khavai shiyanbing hina. ¹⁹Iwui ngalemli zangda ili otram ngatha̱ Zadokshi shimkhur Levi pāngmonbingli suihamchigatwui vang mukvānao akha khamilu, da Proho Avāna hānga. ²⁰Chiwui ashee khuilaga hanphutwui angaji mati chili, azingwui achikun mati chili, kala kuimareida khalei leiret chili neora; chithāda sāda nathumna chi sāmathāda pheomira. ²¹Chiwui thili suihamchigatwui mukvā chi khuilaga kathara shimwui ayarli khalei khorumshimwui langchin sākahai apamli riktāra.

²²Kakhanethang, suihamchigatwui vang achuk kapei mevā akha chigatra; athumna mukvā eina sāmathā thāda hanphut chi sāmathāra. ²³Nathumna chi sāmathā kuphaotharan, achuk kapei mukvānao akha kala yaoshangwui eina achuk kapei yaovā akha chigatra. ²⁴Chi ithumwui Avāwui mangāli chigatra; pāngmonbingna chiwuitungli machi kasirrorra kala ithumwui Avāli rikkatā kachigat sāda chigatra.

²⁵Shinithang thangkachida nathumna suihamchigatwui vang mevā akha ngarānmira, kala achuk kapei mukvānao akha kala yaoshangwui eina achuk kapei yaovā akha ngarānmira. ²⁶Shinithang athumna hanphutwui vang pheomira, chi tharngasakra, chithāda sāda chi tharchigatra. ²⁷Zimikshobing hi kuphaotharan, kachishatathang eina thuilaga pāngmonbingna hanphuttungli nathumwui rikkatā kachigat kala ningyatchigat chigatra; kala ina nathumli khuisangmira, da Proho Avāna hānga."