Ezekieli 43

43 ¹Kisha akaniongoza mpaka langoni, lango lile lielekealo upande wa mashariki. ²Utukufu wa Baba wa Israeli ukaja kutoka mashariki. Sauti yake ilikuwa kama sauti ya maji mengi, nayo nchi ikang'aa kwa utukufu wake. ³Maono niliyoyaona yalikuwa kama yale niliyoyaona alipokuja kuuangamiza mji, na kama maono yale niliyoyaona kando ya Mto Kebari; nami nikaanguka kifudifudi. ⁴Nao utukufu wa Baba yetu ukaingia hekaluni kupitia lango la mashariki. ⁵Kisha Roho wa Baba yetu akaniinua, akanileta katika ua wa ndani, nao utukufu wa Baba yetu ukalijaza hekalu.

⁶Nikasikia mtu akisema nami kutoka hekaluni, na mtu mmoja alikuwa amesimama kando yangu.

⁷Akaniambia: "Mwana wa Adamu, hapa ni mahali pa kiti changu cha enzi, mahali pa nyayo za miguu yangu, ambapo nitakaa kati ya wana wa Israeli milele. Nyumba ya Israeli hawatalinajisi tena jina langu takatifu—wao na wafalme wao—kwa ukafiri wao na kwa maiti za wafalme wao mahali pao pa juu. ^a a v7 "Maiti za wafalme wao mahali pao pa juu" yaelekea humaanisha makaburi ya kifalme yaliyowekwa ndani ya au karibu na eneo la hekalu. ⁸Waliweka kizingiti chao karibu na kizingiti changu, na miimo yao ya milango kando ya miimo yangu, na ukuta tu ndio uliokuwa kati yangu nao. Wakalinajisi jina langu takatifu kwa matendo yao ya machukizo, kwa hiyo niliwaangamiza katika hasira yangu. ⁹Sasa na wauondoe mbali nami ukafiri wao na maiti za wafalme wao, nami nitakaa kati yao milele.

¹⁰Mwana wa Adamu, ieleze nyumba ya Israeli habari za hekalu, ili waione aibu kwa dhambi zao; nao na waupime muundo wake. ¹¹Kama wakiona aibu kwa yote waliyoyatenda, waeleze muundo wa hekalu—mpangilio wake, njia zake za kutokea na za kuingia, umbo lake lote, amri zake zote, michoro yake yote na sheria zake zote. Yaandike mbele yao, ili wauhifadhi muundo wake wote na amri zake zote na kuzitekeleza.

¹²Hii ndiyo sheria ya hekalu: eneo lote juu ya mlima pande zote ni takatifu sana. Hii ndiyo sheria ya hekalu.

Madhabahu ya Dhabihu

¹³"Hivi ndivyo vipimo vya madhabahu: kitako chake kama inchi ishirini na moja kwenda chini na inchi ishirini na moja upana, na ukingo kama inchi tisa kuzunguka pembezoni pake. Huu ndio urefu wa madhabahu: ¹⁴Kutoka kitakoni juu ya ardhi hata kizingiti cha chini: kama futi tatu na nusu, upana kama inchi ishirini na moja. Kutoka kizingiti kidogo hata kizingiti kikubwa: kama futi saba, upana kama inchi ishirini na moja. ¹⁵Na meko la madhabahu lilikuwa na urefu wa futi saba, na kutoka meko la madhabahu pembe nne zilichomoza kuelekea juu. ¹⁶Meko la madhabahu lilikuwa na urefu wa futi ishirini na moja kwa upana wa futi ishirini na moja, mraba pande zake nne. ¹⁷Kizingiti kilikuwa na urefu wa futi ishirini na nne na nusu na upana ule ule pande zake nne, na ukingo kuzunguka kama inchi kumi na nusu na kitako kama inchi ishirini na moja pande zote; ngazi zake zilielekea mashariki."

¹⁸Akaniambia, "Mwana wa Adamu, Baba Mwenye Enzi asema hivi: Hizi ndizo kanuni za madhabahu siku itakapojengwa—kwa ajili ya kutoa sadaka za kuteketezwa juu yake na kunyunyiza damu juu yake. ¹⁹Wape makuhani Walawi walio wa uzao wa Sadoki, wanaonikaribia kunitumikia, asema Baba Mwenye Enzi, fahali mchanga kuwa sadaka ya dhambi. ²⁰Twaa sehemu ya damu yake na uitie juu ya pembe nne za madhabahu, na juu ya pembe nne za kizingiti, na juu ya ukingo pande zote; hivyo utaisafisha na kuifanyia upatanisho. ²¹Kisha uchukue yule fahali wa sadaka ya dhambi; naye atateketezwa mahali palipoamriwa pa hekalu, nje ya patakatifu.

²²Siku ya pili, utatoa mbuzi dume asiye na kilema kuwa sadaka ya dhambi; nao wataisafisha madhabahu kama walivyoisafisha kwa yule fahali. ²³Utakapomaliza kuisafisha, utatoa fahali mchanga asiye na kilema na kondoo dume kutoka kundini asiye na kilema. ²⁴Uwalete mbele ya Baba yetu; nao makuhani watawanyunyizia chumvi na kuwatoa kuwa sadaka ya kuteketezwa kwa Baba yetu.

²⁵Kwa muda wa siku saba utamtoa mbuzi kila siku kuwa sadaka ya dhambi, na fahali mchanga na kondoo dume kutoka kundini, wote wawili wasio na kilema. ²⁶Kwa muda wa siku saba watafanya upatanisho kwa ajili ya madhabahu, wataitakasa, na hivyo kuiweka wakfu. ²⁷Siku hizo zitakapotimia, tangu siku ya nane na kuendelea makuhani watatoa sadaka zenu za kuteketezwa na sadaka zenu za amani juu ya madhabahu; nami nitawakubali, asema Baba Mwenye Enzi."