Ɗaukakar Ubanmu Ta Koma Haikali

Ɗaukakar da Ezekiyel ya ga ta tafi ta komo daga gabas ta cika haikalin. Ubanmu ya kira shi wurin kursiyinsa, ya gaya wa Ezekiyel ya kwatanta fasalin don mutane su ji kunya, sa'an nan ya ba da ma'aunan bagaden da keɓewa ta kwana bakwai.

Babi na 43.

Sai ya kai ni ƙofar, ƙofar da take fuskantar gabas. Ɗaukakar Uban Isra'ila ta zo daga gabas. Muryarsa ta yi kamar ƙarar manyan ruwaye, ƙasa kuma ta haskaka da ɗaukakarsa. Wahayin da na gani ya yi kamar wanda na gani sa'ad da ya zo domin yă hallaka birnin, kuma kamar wahayin da na gani a bakin Kogin Kebar; sai na fāɗi rubda ciki. Ɗaukakar Ubanmu kuwa ta shiga haikali ta ƙofar gabas. Sai Ruhun Ubanmu ya ɗaga ni ya kawo ni cikin filin ciki, ɗaukakar Ubanmu kuma ta cika haikali.

Na ji wani yana magana da ni daga cikin haikali, wani mutum kuma yana tsaye kusa da ni.

Ya ce mini, “Ɗan Mutum, wannan ne wurin kursiyina, wurin tafin ƙafafuna, inda zan zauna a cikin Isra'ilawa har abada. Gidan Isra'ila ba za su ƙara ƙazantar da sunana mai tsarki ba—su da sarakunansu—ta wurin rashin amincinsu da kuma gawawwakin sarakunansu da suke a tudun tsafinsu. ^a Sun kafa bakin ƙofarsu kusa da nawa, madogarar ƙofarsu kusa da tawa, bango kaɗai ne yake tsakaninmu. Sun ƙazantar da sunana mai tsarki ta wurin ayyukansu na ƙyama, saboda haka na hallaka su cikin fushina. Yanzu bari su kawar da rashin amincinsu da gawawwakin sarakunansu nesa da ni, ni kuwa zan zauna a cikinsu har abada.

Ɗan Mutum, ka faɗa wa Isra'ila kamannin haikalin, domin su ji kunyar zunubansu; bari kuma su auna fasalinsa. Idan suka ji kunyar duk abin da suka yi, ka faɗa musu fasalin haikalin—shiryawarsa, mafitansa da mashigansa, dukan kamanninsa, dukan ƙa'idodinsa, dukan fasalolinsa da dukan dokokinsa. Ka rubuta shi a gabansu, domin su kiyaye dukan fasalinsa da dukan ƙa'idodinsa su kuma aikata su.

Wannan ita ce dokar haikali: dukan yankin da yake kan dutsen kewaye da shi mai tsarki ne ƙwarai. Wannan ita ce dokar haikali.

Bagaden Hadaya

“Ga ma'aunin bagaden: tushensa kamar inci ashirin da ɗaya zurfinsa, inci ashirin da ɗaya fāɗinsa, da baki kamar inci tara kewaye da gefensa. Ga tsayin bagaden: Daga tushe da yake ƙasa zuwa gaɓar ƙasa: kamar ƙafa uku da rabi, fāɗinsa kamar inci ashirin da ɗaya. Daga ƙaramar gaɓa zuwa babbar gaɓa: kamar ƙafa bakwai, fāɗinsa kamar inci ashirin da ɗaya. Tsayin murhun bagaden ƙafa bakwai ne, daga murhun bagaden kuma ƙahoni huɗu suka miƙe sama. Murhun bagaden ƙafa ashirin da ɗaya ne tsawonsa, ƙafa ashirin da ɗaya fāɗinsa, murabba'i a kusurwoyinsa huɗu. Gaɓar kuwa ƙafa ashirin da huɗu da rabi ce tsawonta da fāɗinta a kusurwoyinta huɗu, da baki kewaye da ita kamar inci goma da rabi, da tushe kamar inci ashirin da ɗaya kewaye; matakalanta kuwa sun fuskanci gabas.”

Ya ce mini, “Ɗan Mutum, ga abin da Ubanmu Mai Iko Dukka ya ce: Ga ƙa'idodin bagaden a ranar da aka gina shi—domin miƙa hadayun ƙonawa a kansa da kuma yayyafa jini a kansa. Ka ba wa firistoci Lawiyawa zuriyar Zadok, waɗanda suke zuwa gare ni domin su yi mini hidima, in ji Ubanmu Mai Iko Dukka, ɗan bijimi don hadaya ta zunubi. Ka ɗiba jininsa ka sa a ƙahoni huɗu na bagaden, da kusurwoyi huɗu na gaɓar, da bakin kewaye; ta haka za ka tsarkake shi ka kuma yi kafara dominsa. Sai ka ɗauki bijimin hadaya ta zunubi; ka ƙone shi a wurin da aka keɓe na haikali, a bayan wuri mai tsarki.

A rana ta biyu, ka miƙa bunsuru maras lahani don hadaya ta zunubi; za su tsarkake bagaden kamar yadda suka tsarkake shi da bijimin. Sa'ad da ka gama tsarkake shi, ka miƙa ɗan bijimi maras lahani da rago daga garke maras lahani. Ka kawo su a gaban Ubanmu; firistoci za su yayyafa gishiri a kansu su kuma miƙa su hadaya ta ƙonawa ga Ubanmu.

Har kwana bakwai za ka tanada bunsuru kowace rana don hadaya ta zunubi, da ɗan bijimi da rago daga garke, dukansu marasa lahani. Har kwana bakwai za su yi kafara domin bagaden, su tsarkake shi, ta haka kuma su keɓe shi. Sa'ad da waɗannan kwanaki suka cika, daga rana ta takwas zuwa gaba firistoci za su miƙa hadayunku na ƙonawa da hadayunku na salama a kan bagaden; ni kuwa zan karɓe ku, in ji Ubanmu Mai Iko Dukka.”