ኢሳይያስ 3

3 ¹እነሆ፤ የሰማይ ሠራዊት አባት ከኢየሩሳሌምና ከይሁዳ ድጋፍንና ስንቅን ሁሉ፣ የእንጀራን ስንቅ ሁሉ የውሃንም ስንቅ ሁሉ ሊያስወግድ ነው፤ ²ተዋጊውንና ወታደሩን፣ ዳኛውንና ነቢዩን፣ ሟርተኛውንና ሽማግሌውን፣ ³የኀምሳ አለቃውንና የተከበረውን ሰው፣ አማካሪውን፣ የተካነ ባለሙያውንና ብልኀተኛ አስማተኛውን።

⁴“ልጆችን አለቆቻቸው አደርጋለሁ፤ ልጅነታዊ ዝንባሌም ይገዛቸዋል።

⁵ሕዝቡ እርስ በርስ ይበዳደላል፤ ሰው በባልንጀራው ላይ፣ ጐበዙ በሽማግሌው ላይ፣ ወራዳውም በከበረው ላይ ይነሣል።” ⁶ሰው በአባቱ ቤት ወንድሙን ይይዛል፤ እንዲህም ይለዋል፤ “ልብስ አለህ፤ አንተ መሪያችን ሁን፤ ይህን የፍርስራሽ ክምር አስተዳድር።” ⁷ነገር ግን በዚያ ቀን እንዲህ ብሎ ይጮኻል፤ “ፈዋሽ አይደለሁም! በቤቴ እንጀራም ልብስም የለም፤ የሕዝቡ መሪ አታደርጉኝም።” ⁸ኢየሩሳሌም ተሰናክላለችና፣ ይሁዳም ወድቃለችና፤ ቃላቸውና ሥራቸው በአባታችን ላይ ስለ ሆኑ፣ ክቡር ፊቱን ይገዳደራሉ። ⁹የፊታቸው መልክ ይመሰክርባቸዋል፤ እንደ ሰዶም ኀጢአታቸውን ይፋ ያወጣሉ፤ አይሰውሩትም። ወዮላቸው፤ በራሳቸው ላይ መዓትን አምጥተዋልና! ¹⁰ለጻድቃን መልካም እንደሚሆንላቸው ንገሩ፤ የሥራቸውን ፍሬ ይበላሉና። ¹¹ለክፉ ሰው ወዮለት! ክፉ ይሆንበታል፤ እጆቹ ያደረጉት ይከፈለዋልና። ¹²ሕዝቤ ሆይ፤ ልጆች ጨቋኞቻቸው ናቸው፤ ሴቶችም ይገዟቸዋል። ሕዝቤ ሆይ፤ መሪዎችህ ያስቱሃል፤ ልትሄድበት የሚገባህን መንገድም ውጠውታል።

¹³አባታችን ክሱን ለማቅረብ ይቆማል፤ አሕዛብንም ለመፍረድ ይነሣል።

¹⁴አባታችን ከሕዝቡ ሽማግሌዎችና ሹማምት ጋር ወደ ፍርድ ይገባል፤ “የወይኑን ተክል የበላችሁት እናንተ ናችሁ፤ የድኾች ብዝበዛ በቤቶቻችሁ ውስጥ ነው። ¹⁵ሕዝቤን ስትጨፈልቁ የድኾችንም ፊት ስትፈጩ ምን ማለታችሁ ነው?” ይላል የሰማይ ሠራዊት አባት።

¹⁶አባታችን እንዲህ አለ፤ “የጽዮን ሴቶች ልጆች ትዕቢተኞች ስለ ሆኑ፣ ዐንገታቸውን ዘርግተው በሚያማልል ዐይን እየተራመዱ፣ በፈጣን ትንንሽ ርምጃ እየተንቈለቈሉ፣ በእግሮቻቸው ያሉትን አልቦዎች እያንቃጨጩ፣ ¹⁷ስለዚህ ጌታ አባት የጽዮንን ሴቶች ልጆች ራስ በቍስል ይመታል፤ አባታችንም ግንባራቸውን ያጋልጣል።”

¹⁸በዚያ ቀን ጌታ አባት ጌጣጌጦቻቸውን ያስወግዳል፤ አልቦዎቹን፣ የራስ ማሰሪያዎቹን፣ ጨረቃ መሰል ጌጦቹን፣ ¹⁹ጒትቻዎቹን፣ አምባሮቹን፣ መሸፈኛዎቹን፣ ²⁰የራስ ጌጦቹን፣ የእግር ሰንሰለቶቹን፣ መቀነቶቹን፣ የሽቶ ብልቃጦቹን፣ ክታቦቹን፣ ²¹የማኅተም ቀለበቶቹን፣ የአፍንጫ ቀለበቶቹን፣ ²²የበዓል ልብሶቹን፣ ካባዎቹን፣ መጐናጸፊያዎቹን፣ ኮሮጆዎቹን፣ ²³የእጅ መስተዋቶቹን፣ ከጥሩ በፍታ የተሠሩ ልብሶቹን፣ ጥምጥሞቹን፣ ሻሾቹንም።

²⁴ከዚያም በሽቶ ፋንታ ግማት፣ በመቀነት ፋንታ ገመድ፣ ባማረ የፀጒር አሠራር ፋንታ መላጣ፣ በተዋቡ ልብሶች ፋንታ ማቅ መጐናጸፊያ ይሆናል፤ በውበትም ፋንታ ዳግ። ²⁵ሰዎችሽ በሰይፍ ይወድቃሉ፤ ተዋጊዎችሽም በጦርነት ይወድቃሉ። ²⁶በሮችዋ ያዝናሉ፤ ያለቅሳሉም፤ ባዶዋን ቀርታ በመሬት ላይ ትቀመጣለች።