Isaiah 3

3 ¹Kaja yanglu, saikorawui Avāna Jerusalem eina Judahwui eina shaikhavai kala khavavāt saikora khuithui kharāna: kashakazā saikora eina tara̱ saikora, ²raikapinga kala raimi, bicharwo kala marān, khanong kala arara, ³hangphangāwui kathāna kala khayākakāpā, machinme, kaho them-kathemapa, kala ngakaishitingting mahei kathema.

⁴"Ina naoshinaobingli athumwui wungnao sāngasakra, kala naoshinaowui ningphanin athumwuitungli mungra.

⁵Mibingna akha eina akha, mi kachiva̱ awui khongnainaoli rekharek ngararchingra; yaronnao kasarnaoli ngakarthuira, kala khangazanana khayākakāpāli ngakarthuira." ⁶Mi akhana awui avāwui shimli awui achināli tukkhuida hānga, "Nali kachon leilaga, na ithumwui akhavā sālu; ruinganai hi kashina sālu." ⁷Kha chithanghon ana ngakaora, "I shirinme maningmana! Iwui shimli kashakazāla kachonla maleimana; ili mibingwui akhavā masāngasakalu." ⁸Kaja Jerusalem kongluihaira kala Judah pitāhaira; khikhalajila awui tekhamatei mangāli kasida, athumwui tui kala athumwui ot ithumwui Avāwui khalāngli lei. ⁹Athumwui maiwui zakmai athumli shākhi mi; athumna athumwui morei Sodom kathā khangkā—chi mathumhaimana. Athumli kakhanang ngasaranu, kaja athumna khalatta akhali kalākashi sākhuihaira! ¹⁰Khangarong mibingli, athumna kaphā samphangra da hānglu, kaja athumna athumwui otsakwui athei shaira. ¹¹Makhayābingli kakhanang ngasaranu! Ali makaphā pheora, kaja awui pāngna sākahai chi awuili sāman mira. ¹²Iwui mibing, naoshinaobingna athumli rekharek ngasaka, kala sha̱naobingna athumwuitungli munga. Iwui mibing, nathumwui thānmebing nathumli ma̱zat ngasaka kala nathumna zatkhavai shongfa chi mayuitāhaira.

¹³Ithumwui Avā awui tuingaphun khuirā khavai nganinga; ana miyurbingli bichar sākhavai ngakarthuira.

¹⁴Ithumwui Avāna awui mibingwui khararnaobing kala wungnaobingli bichar sākhavai zangra: "Nathumna drakhā yāmgui chi shaihaira; kachāma miwui ngaponkakhui nathumwui shimbingli lei. ¹⁵Nathumna iwui mibingli khisāda ngataikachupda kala kachāma miwui mai rungkhala?" da saikorawui Avāna hānga.

¹⁶Ithumwui Avāna hānga: "Khikhalajila Zionwui sha̱naobing lāngsolaka; kahung katingda kala mik eina sotkhamasao zatta, pheikār naina eina thākta zatta, athumwui pheiwui chara̱-chāsān khon ngasakta, ¹⁷Chiwui vang eina Proho Avāna Zionwui sha̱naobingwui kuili raiji eina shaora, kala ithumwui Avāna athumwui khavei seoshokmira."

¹⁸Chithang Proho Avāna athumwui sāri-khongnāng khuithuira: pheiwui kazao, kuiwui khara̱, chā, ¹⁹unra̱, kazao, mairār, ²⁰kuihon, pheiwui khalap, shānneira̱, nganamkaphā thaokhong, laivā chara̱bing, ²¹shoi khutop, nārenra̱, ²²phanitwui kashankachon, kachon khamato, phahon, pheisākhao, ²³kalāra̱ngayot, khamanaka kashankachon, kuitei, kala faror khavai kachonbing.

²⁴Chieina, nganamkaphā thaowui mahutli nganamshi ngasāra; shānneira̱wui mahutli khara̱ ngasāra; khamathā hākharikta samwui mahutli kuisam mavāt ngasāra; khamathā kashankachonwui mahutli bora eina khaluihai ngasāra; khamathāwui mahutli meina thengkahai ngasāra. ²⁵Nawui mibing raighai eina pitāra, nawui raimibing raili pitāra. ²⁶Awui ngaveibing sifara kala chapngachāra; raikormihaida, ana ngaleili pamra.