ገላትያ 5

5 ¹ክርስቶስ ለነጻነት ነጻ አወጣን። ስለዚህ ጸንታችሁ ቁሙ፤ ዳግመኛ በባርነት ቀንበር አትያዙ።

²ስሙ፤ እኔ ጳውሎስ እላችኋለሁ፤ ብትገረዙ ክርስቶስ ምንም አይጠቅማችሁም። ³ዳግመኛም እመሰክራለሁ፤ መገረዝን የሚቀበል ሰው ሁሉ ሕጉን በሙሉ ሊጠብቅ ይገባዋል። ⁴በሕግ ልትጸድቁ የምትፈልጉ ከክርስቶስ ተለይታችኋል፤ ከጸጋም ወድቃችኋል። ⁵እኛ በመንፈስ ቅዱስ በኩል፣ በእምነት፣ የጽድቅን ተስፋ በጕጕት እንጠባበቃለን። ⁶በክርስቶስ ኢየሱስ መገረዝም ሆነ አለመገረዝ ምንም አይጠቅምም፤ በፍቅር የሚሠራ እምነት ብቻ እንጂ።

⁷በመልካም ትሮጡ ነበር። እውነትን እንዳትታዘዙ ማን አገደባችሁ? ⁸ይህ ማባበል ከሚጠራችሁ ከአባታችን አይደለም። ⁹ጥቂት እርሾ ሊጡን ሁሉ ያቦካል። ¹⁰በጌታ ዘንድ ሌላ አሳብ እንደማትይዙ እተማመናለሁ፤ የሚያውካችሁ ማንም ቢሆን ፍርዱን ይሸከማል።

¹¹ወንድሞች ሆይ፣ እኔ አሁንም መገረዝን የምሰብክ ብሆን፣ ስለ ምን አሁንም እሰደዳለሁ? እንግዲያስ የመስቀሉ ዕንቅፋት ተወግዶአል። ¹²የሚያውኩአችሁ ራሳቸውን ቢቈርጡ እመኛለሁ! ^a a v12 ጳውሎስ ቢላዋውን አጥብቆ ያዞራል፤ መቍረጥ ዋናው ነገር ከሆነ፣ የመገረዝ አስተማሪዎች እስከ መጨረሻው ይሂዱ።

¹³ወንድሞች ሆይ፣ ወደ ነጻነት ተጠርታችኋል፤ ነገር ግን ይህ ነጻነት ለሥጋ አጋጣሚ እንዳይሆን፤ ይልቁንም በፍቅር እርስ በርሳችሁ ተገዛዙ።

¹⁴ሕጉ ሁሉ በአንዲት ትእዛዝ ይፈጸማልና፤ እርሷም፦ “ባልንጀራህን እንደ ራስህ ትወዳለህ” የምትል ናት።

¹⁵ነገር ግን እርስ በርሳችሁ ብትነካከሱና ብትበላሉ፣ እርስ በርሳችሁ እንዳትጠፋፉ ተጠንቀቁ።

¹⁶እኔ ግን እላለሁ፤ በመንፈስ ተመላለሱ፣ የሥጋንም ምኞት ከቶ አትፈጽሙም። ¹⁷ሥጋ ከመንፈስ ተቃራኒ የሆነውን ይመኛል፣ መንፈስም ከሥጋ ተቃራኒ የሆነውን ይመኛል፤ እነዚህ እርስ በርሳቸው ይጋጫሉና የምትወዱትን ታደርጉ ዘንድ አትችሉም። ¹⁸ነገር ግን በመንፈስ የምትመሩ ከሆነ፣ ከሕግ በታች አይደላችሁም። ¹⁹የሥጋ ሥራዎች ግልጥ ናቸው፤ እነርሱም ዝሙት፣ ርኩሰት፣ መዳራት ናቸው። ²⁰ጣዖትን ማምለክ፣ ጥንቈላ፣ ጥል፣ ክርክር፣ ቅናት፣ የቍጣ ፍንዳታ፣ ራስ ወዳድነት፣ መለያየት፣ ወገንተኝነት፣ ²¹ምቀኝነት፣ ስካር፣ ዘፈቀደ ዳንኪራ፣ የእነዚህም ዐይነት ነገሮች ናቸው። ቀድሞ እንደ ነገርኋችሁ፣ አሁንም አስጠነቅቃችኋለሁ፤ እንደዚህ ያሉትን የሚያደርጉ የአባታችንን መንግሥት አይወርሱም።

²²የመንፈስ ፍሬ ግን ፍቅር፣ ደስታ፣ ሰላም፣ ትዕግሥት፣ ቸርነት፣ በጎነት፣ ታማኝነት፣ ²³የዋህነት፣ ራስን መግዛት ነው። እንደዚህ ያሉትን የሚከለክል ሕግ የለም። ²⁴የክርስቶስ ኢየሱስ የሆኑትም ሥጋን ከክፉ ምኞቱና ከፍላጎቱ ጋራ ሰቅለውታል። ²⁵በመንፈስ ብንኖር፣ በመንፈስ ደግሞ እንመላለስ። ²⁶በከንቱ አንመጻደቅ፤ እርስ በርሳችን አንነኳኰስ፤ እርስ በርሳችን አንቀናና።