ገላትያ 6

6 ¹ወንድሞች ሆይ፤ ማንም ሰው በኀጢአት ቢያዝ፣ መንፈሳውያን የሆናችሁ እናንተ በገርነት መልሱት። አንተም ደግሞ እንዳትፈተን ራስህን ጠብቅ። ²እርስ በርሳችሁ ሸክም ተሸካከሙ፤ በዚህም የክርስቶስን ሕግ ትፈጽማላችሁ። ³ማንም ምንም ሳይሆን አንድ ነገር የሆነ መስሎ ቢታየው፣ ራሱን ያታልላል። ⁴እያንዳንዱ የራሱን ሥራ ይፈትን። ያን ጊዜ የመመኪያው ምክንያት ከሌላው ጋር በማነጻጸር ሳይሆን፣ በራሱ ብቻ ይሆናል። ⁵እያንዳንዱ የራሱን ጭነት ይሸከማልና። ^a a v5 ይህ የግል ‘ጭነት’ የዕለት ተዕለት ኀላፊነት ነው፤ በቍጥር 2 ላይ ካለው የችግር ጫና ‘ሸክም’ የተለየ ነው። ⁶ቃሉን የሚማር ሰው፣ ከሚያስተምረው ጋር መልካም የሆነውን ሁሉ ይካፈል።

⁷አትታለሉ፤ አባታችን አይዘበትበትም፤ ሰው የሚዘራውን ሁሉ ያንኑ ደግሞ ያጭዳል። ⁸ለኀጢአተኛው ባሕርዩ የሚዘራ ከእርሱ ጥፋትን ያጭዳል፤ ለመንፈስ ቅዱስ የሚዘራ ከመንፈስ የዘላለም ሕይወትን ያጭዳል። ⁹መልካም በማድረግ አንታክት፤ ተስፋ ባንቈርጥ በጊዜው መከርን እናጭዳለንና። ¹⁰እንግዲህ አጋጣሚ እስካለን ድረስ፣ ለሁሉ፣ ይልቁንም ለእምነት ቤተ ሰብ መልካም እናድርግ።

በመስቀል ብቻ መመካት

¹¹በገዛ እጄ ምን ያህል በትልቅ ፊደል እንደ ጻፍሁላችሁ እዩ! ¹²ግዝረትን በእናንተ ላይ የሚጭኑት፣ መልካም መስለው መታየት የሚፈልጉ ናቸው። ይህን የሚያደርጉት ስለ ክርስቶስ መስቀል እንዳይሰደዱ ብቻ ነው። ¹³የተገረዙት ራሳቸው እንኳ ሕጉን አይጠብቁምና፤ በሥጋችሁ እንዲመኩ ግን እናንተ እንድትገረዙ ይፈልጋሉ። ¹⁴እኔ ግን በጌታችን በኢየሱስ ክርስቶስ መስቀል ካልሆነ በቀር ከቶ አልመካም፤ በእርሱም ዓለም ለእኔ ተሰቅሏል፣ እኔም ለዓለም ተሰቅያለሁ። ¹⁵መገረዝ ቢሆን አለ መገረዝ ዋጋ የለውም፤ አዲስ ፍጥረት መሆን ብቻ ዋጋ አለው። ¹⁶ይህን ሥርዓት ለሚከተሉ ሁሉ፣ ለአባታችንም እስራኤል ሰላምና ምሕረት ይሁን።

¹⁷ከእንግዲህ ወዲህ ማንም አያስጨንቀኝ፤ የኢየሱስን ምልክቶች በሰውነቴ ተሸክሜአለሁና። ^b b v17 የጳውሎስ ‘ምልክቶች’ ኢየሱስን በመስበኩ ምክንያት ከደረሰበት ድብደባና መከራ የቀሩ ጠባሳዎች ናቸው።

¹⁸ወንድሞች ሆይ፤ የጌታችን የኢየሱስ ክርስቶስ ጸጋ ከመንፈሳችሁ ጋር ይሁን። አሜን።