Galatia 6

6 ¹Ará, bí a bá bá ẹnìkan nínú ẹ̀ṣẹ̀ kan, ẹ̀yin tí ẹ jẹ́ ẹni ẹ̀mí, ẹ fi ìwà pẹ̀lẹ́ mú un padà bọ̀ sí ipò rẹ̀. Ẹ máa kíyèsi ara yín, kí a má bàa dán ẹ̀yin náà wò pẹ̀lú. ²Ẹ máa ru ẹrù ara yín lẹ́nìkìíní-kejì, bẹ́ẹ̀ ni ẹ ó sì mú òfin Kristi ṣẹ. ³Nítorí bí ẹnikẹ́ni bá rò pé òun jẹ́ ohun kan nígbà tí òun kì í ṣe nǹkankan, ó ń tan ara rẹ̀ jẹ. ⁴Kí olúkúlùkù dán iṣẹ́ ara rẹ̀ wò. Nígbà náà ni ohun tí yóò fi ṣògo yóò wà nínú ara rẹ̀ nìkan, kì í ṣe ní ìfiwéra pẹ̀lú ẹnìkejì rẹ̀. ⁵Nítorí olúkúlùkù ni yóò ru ẹrù tirẹ̀. ^a a v5 ‘Ẹrù’ ti ara ẹni yìí jẹ́ ojúṣe ojoojúmọ́ — ó yàtọ̀ sí ‘ẹrù’ ìnira wíwúwo tí a sọ nínú ẹsẹ kejì. ⁶Ẹni tí a kọ́ ní ọ̀rọ̀ náà gbọ́dọ̀ bá ẹni tí ó ń kọ́ni pín gbogbo ohun rere.

⁷Ẹ má ṣe tan ara yín jẹ—a kì í fi Baba wa ṣe yẹ̀yẹ́: ohunkóhun tí ènìyàn bá gbìn, òun náà ni yóò ká. ⁸Ẹni tí ó bá gbìn sí ara ẹlẹ́ṣẹ̀ rẹ̀ yóò ká ìbàjẹ́ láti inú rẹ̀; ẹni tí ó bá gbìn sí Ẹ̀mí Mímọ́ yóò ká ìyè àìnípẹ̀kun láti inú Ẹ̀mí. ⁹Ẹ jẹ́ kí a má ṣàárẹ̀ nínú ṣíṣe rere—a ó ká ìkórè ní àkókò tí ó yẹ bí a kò bá rẹ̀wẹ̀sì. ¹⁰Nítorí náà, gẹ́gẹ́ bí a ti ní àǹfààní, ẹ jẹ́ kí a ṣe rere sí gbogbo ènìyàn—pàápàá jùlọ sí àwọn ará agboolé ìgbàgbọ́.

Ẹ Máa Ṣògo Nínú Àgbélébùú Nìkan

¹¹Ẹ wo bí lẹ́tà ńláńlá tí mo fi ọwọ́ ara mi kọ sí yín ti tóbi tó! ¹²Àwọn tí ń rọ̀ yín láti kọ ilà fẹ́ kí a rí wọn ní rere lóde. Ìdí tí wọ́n fi ń ṣe èyí ni kìkì kí a má bàa ṣe inúnibíni sí wọn nítorí àgbélébùú Kristi. ¹³Nítorí kódà àwọn fúnra wọn tí a kọ ní ilà kò pa òfin náà mọ́; wọ́n fẹ́ kí a kọ yín ní ilà kí wọ́n lè máa ṣògo nípa ara yín. ¹⁴Ṣùgbọ́n kí a má rí i pé èmi ṣògo bí kò ṣe nínú àgbélébùú Olúwa wa Jesu Kristi, nípasẹ̀ èyí tí a ti kan ayé mọ́ àgbélébùú fún mi, àti èmi fún ayé. ¹⁵Ìkọlà tàbí àìkọlà kò jẹ́ nǹkankan; ẹ̀dá tuntun nìkan ni ó ṣe pàtàkì. ¹⁶Àlàáfíà àti àánú kí ó wà fún gbogbo àwọn tí ń rìn gẹ́gẹ́ bí òfin yìí, àti fún Israẹli ti Baba wa.

¹⁷Láti ìsinsìnyí lọ, kí ẹnikẹ́ni má yọ mí lẹ́nu, nítorí mo ru àmì Jesu lára mi. ^b b v17 ‘Àmì’ Paulu ni àwọn àpá tí nínà àti ìjìyà tí ó faradà nítorí wíwàásù Jesu fi sílẹ̀.

¹⁸Oore-ọ̀fẹ́ Olúwa wa Jesu Kristi kí ó wà pẹ̀lú ẹ̀mí yín, ará. Àmín.