ናይ ሓድሕድኩም ፆር ተሰከሙ

ነቲ ብሓጢኣት ዝተታሕዘ ብህድኣት ኣቕንዕዎ፥ ናይ ሓድሕድኩም ፆር ተሰከሙ፥ ናይ ባዕልኹም ግብሪ ኸዓ ደጋጊምኩም ፈትሽዎ። ኣቦና ዝላገፀሉ ኣይኮነን፥ ምዝራእ ድማ ዓፂድ ኣለዎ። ጳውሎስ ባዕሉ ብኢዱ ፀሓፈ፦ እቶም ግርዘት ዘገድዱ፥ መስቀል ክሃድሙ ይደልዩ፤ ንሱ ግና ብኻልእ ገለ ኣይመካሕን።

ምዕራፍ 6።

ኦ ኣሕዋተይ፥ ሓደ ሰብ ብገለ ሓጢኣት እንተ ተታሕዘ፥ ንስኻትኩም እቶም መንፈሳውያን ብህድኣት ኣቕንዕዎ። ንስኻውን ከይትፍተን፥ ንባዕልኻ ሓሉ። ናይ ሓድሕድኩም ፆር ተሰከሙ፤ ከምዙይ ጌርኩም ድማ ሕጊ ክርስቶስ ክትፍፅሙ ኢኹም። ሓደ ሰብ ገለ እኳ ዘይኮነ፥ ገለ ነገር ዝኾነ ኢሉ እንተ መሰሎ፥ ንርእሱ የታልል ኣሎ። ነፍሲ ወከፍ ነቲ ናይ ባዕሉ ግብሪ ይፍትኖ። ሽዑ ዝምካሓሉ ኣብ ባዕሉ ጥራሕ ይኸውን እምበር፥ ምስ ብፃዩ ብምውድዳር ኣይኮነን። ነፍሲ ወከፍ ናይ ባዕሉ ፅዕነት ክስከም እዩሞ። ^a እቲ ቓል ዝምሃር፥ ኵሉ ፅቡቕ ነገር ምስቲ ዝምህሮ የካፍል።

ኣይትታለሉ፤ ኣቦና ዝላገፀሉ ኣይኮነን፤ ሰብ ዝዘርኦ ዘበለ፥ ንእኡ ኸዓ ክዓፅድ እዩ። እቲ ናብ ሓጢኣተኛ ስጋኡ ዝዘርእ፥ ካብ ስጋ ጥፍኣት ይዓፅድ፤ እቲ ናብ መንፈስ ቅዱስ ዝዘርእ ግና፥ ካብ መንፈስ ናይ ዘለኣለም ህይወት ይዓፅድ። ሰናይ ብምግባር ኣይንድከም፤ እንተ ዘይተሓለልና፥ በብጊዜኡ ዓፂድ ክንዓፅድ ኢና። እምበኣር ጊዜ ክሳዕ ዘለና፥ ንዅሉ ሰናይ ንግበር፤ ኣውራ ኸዓ ነቶም ስድራ ቤት እምነት።

ብመስቀል ጥራሕ ምምካሕ

ብገዛእ ኢደይ ክንደይ ዓበይቲ ፊደላት ናባኻትኩም ይፅሕፍ ከም ዘለኹ ርኣዩ! እቶም ክትግረዙ ዘገድዱኹም፥ ፅቡቕ ክመስሉ ይደልዩ። እዙይ ዝገብሩ ኸዓ፥ ስለ መስቀል ክርስቶስ ከይስደዱ ጥራሕ ኢሎም እዮም። እቶም ዝተገረዙ ባዕልቶም እኳ ሕጊ ኣይሕልዉን እዮም፤ ብስጋኹም ክምክሑ ምእንቲ ግና፥ ክትግረዙ ይደልዩ። ኣነ ግና ብዘይ መስቀል ጐይታና ኢየሱስ ክርስቶስ ከቶ ኣይመካሕን፤ በዙይ ድማ ዓለም ንኣይ ተሰቒላ ኣላ፥ ኣነ ኸዓ ንዓለም ተሰቒለ ኣለኹ። ግርዘት ኮነ ዘይግርዘት ገለ ኣይጠቅምን፤ ሓድሽ ፍጥረት ደኣ እዩ እቲ ዝጠቅም። ነዚ ስርዓት እዚ ንዝስዕቡ ዅላቶም፥ ከምኡውን ኣብ ልዕሊ እስራኤል ኣቦና፥ ሰላምን ምሕረትን ይኹን።

ደጊም ሓደኳ ኣይተፀግመኒ፤ ኣነ ኣሰር ኢየሱስ ኣብ ሰብነተይ ተሰኪመ ኣለኹ እሞ። ^b

ፀጋ ጐይታና ኢየሱስ ክርስቶስ ምስ መንፈስኩም ይኹን፥ ኣሕዋተይ። ኣሜን።